ЭЙКАКШЧИСТЭНЬ

Карксамосон — чувтонь кедьге,

Сонзэ эйсэ лисьма ведь.

Те ведьстэнть рунгован, кедьган

Вийть валовить чить ды веть.
 

Менель ацазь равжо коцтсо,

Ёндол невтни аксун кор.

Кезэрь Мурза пандонть потсо

Монь учи ёвкс виень тор.
 

Виренть вельксс новоли чокшнесь,

Оймась, каштмоли вармась.

Яга-баба, чувттнэнь тёкштнес

Ванозь, мунямо кармась.

Симан лисьмань веденть эйстэ,

Сон эрязачи максы.

Ёвксонь маралякс сэрейстэ

Тумо икелень касы.
 

Пизем пельть паксятнень велькссэ

Велить, сюротнень валныть.

Од тейтерть вирявань сельмсэ

Тень неить, кецязь талныть.
 

Ва максызе Мурза пандось

Монень ёвкс виень торонть.

Тусть пельтне, эсь летькест кандозь.

Сынь лездасть кастомс сюронть.