***

Тон мазыят, ава, эрьва  шкасто, -

Эйдень лавсьстэ мазыть сыречис                  

Моли, теке кизэнь чипай, састо

Ды свал вети цецянь келей кис.

Умарь чама, ашо килей рунго,

Превей сельме, тусто розень черь,

Ловдо ашо пейть инзеень кургсот,

Валдо оймсэть менель потмонь сэрь.

Тонь лангс ванозь сявады мик ковось,

Мекс икелеть цецякс тештне прыть.

Тонеть моры пингень перть цёковось,

Апак оймсе моры веть ды чить.

Кунсолока, дугай, кунсолока,

Седейшкавань валон седейс сайть:

Тон монь тундонь цецяв пингень луга,

Лисьмапря  ды тиринь моронь гайть.