* * *

Ине Изнямонь Чись

Эйтнень лазомо чачк

Уйсь, мольсь, ливтясь ды чийсь,

Ломань, седееть пачк

Ине Изнямось уйсь

Кельме ливезьга свал.

Зяро модантень тусь,

Ломань, кутьмерстэть сал?

Ёвтак, эрямот перть

Зяроксть пильгалдо стить?

Зяроксть ливтямсто прыть?

...Зяро ёмавтыть верь?

Тертязь масторось мольсь,

Ломань, эрямот трокс,

Ды, прок превтемень ёвкс,

Тиринь эйкакшот порсь.

Ульнесть тердемат псить;

Сыненст седееть кемсь.

Ульнесть ветицят, кить

Пелить ваномо сельмс.

Кува кекшнесть ней сеть,

Конат «ИКЕЛЕВ!» пансть,

Конат эрямост перть

Ансяк эсест лангс вансть!?