ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Алина Подгорнова. Пиземев ве

Пиземев ве


Пиземев вестэ мезть ансяк а эрсить….

Зярдо сэви модасонть сэтьмечись

Ды нармунень вайгельть коштсонть а керсить

Ды лисеме а капши валдо чись…

 

Зярдо певерить верде сиянь ямкскеть

Ды тон а содат, мекс сынь истят начкт,

Зярдо ковось а нолды валдо карькскеть

Раужо виздиця чоподанть пачк…

 

Зярдо тонь вакссо кие-бути ашти,

Паморды-правты эрьва-кодат валт,

Ды сонсь чоподась вановтозот пачти

Седеень кирвазтиця лембе налт…

 

Зярдо, маряви, чаракавты преветь

Ды куцти судот таргамонь чинесь,

Толбандя лангсо лакавты тонь вереть

Сэтьме ды оймавтыця тундонь весь.

 

Зярдо тынк ютксо чаво тарка ламо,

Та-мекс чалгамс малав виеть арасть.

А маряви лангсот виздемань сталмо

Ды а содави кавтолдомань тансть.

 

Зярдо чарькодят: те аволь вечкема,

Но истямо а эрси ялгаксчи,

Зярдо седейтне максыть тенк кевкстемат –

Вановтонк каршо валт пельденк учить,

 

Зярдо весемесь маряви теть кельмекс

Ды ойметь лембе вал марямс капши,

Сон мери тонеть: «Кодат мазыйть сельметь!

Сынст эйсэ ветькак эльни-налкси чи…»

 

Ды кода кавто лейть вейке ведьбрамос

Ламо масторга ютазь-чудезь, прасть,

Тынк кенярдыця вановтонк аламос

Вень чоподасонть вейкест-вейкест вастсть.

 

Сынст эйсэ гайнесь асодавикс толось,

Раужо чоподасонть сэвнесь-порсь …

Кортнеманк апак учо лазовсь,колавсь,

Ды кувать каштмолемась ютксонк мольсь…

 

Тон эзить сода, мезе тензэ меремс.

Сон яла таргась ды ве ёнов вансь…

Шержей качамось капшась туемс верев…

Кадсь кирьгапарьзэть стака сэпей тансть…

 

Пелевенть трокс састыне ютась-чалгась

Вакссонк аштиця сыре атя шкась.

Тынь кортнетядо, кода паро ялгат,

Ды мезеяк лия ютксонк арась.   

         

Категория: Стихи | Добавил: tati (08.09.2010)
Просмотров: 738 | Комментарии: 3 | Рейтинг: 4.4/5 |
Всего комментариев: 3
3  
Покш сюкпря комментариенк кисэ! Мария, ней Маризь кемалень валонзо аволь ансяк тынк, но моньгак превс кадовсть. Сонзэ стяеонь валонзо а эрсить,секскак эряви кунсоломс ды а стувтнемс зярдояк сень, мезенть сон корты. Пек паро, валдо ломань,конась тейсь ламо паро литературанок туртов. Ёвтатано сюкпря сонензэ!

2  
Кадык кувакаяк аламодо, ловномстонзо те а неяви, а маряви. Апак лексе, нилезь нилевить валтнэ. Улить кой-кодак ильведькскеть, ансяк сынь шождасто витевикст. Саемс, аволь толбандя лангсо - толбандя велькссэ. Сэви модасонть, коштсонть керси... модасонть, коштсонть - саезь формась а виде. Эряви моданть, коштонть эйсэ. Монськак сеедьстэ те ильведьксэнть нолдтнян, секс мекс кортан истя ды сеске тень а редяви диалектэнь формась. Ансяк шкань ютазь ледстявкшныть Маризь Кемалень валонзо, сон свал тень коряс корты семинартнэсэ. Нейгак меревель:" Алина, коштонть тон мезень керямс саик? паряк, вайгельтне коштонть эйсэ а керсить?...".

1  
Вааааадря!!!
Пек мелезэнь тусь.
Сюкпря,Алина.

Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz