ЭРЬЗЯ

I                         

Вирьга   яксезь, Эрьзя  сизесь, 

Озась шождасто  лекстямо.

Аргентинань  наян- кизэсь,

Вай, мазый течи кодамо!

Скульпторонтень  чивалгомась

Неявсь:  цитни  сырнень  каштаз.

Но  Эрьзя  лецтнесь  эсь   ломанть,

Арсеманзо  сындест  таштавсть.

Баева  велесэ,   паряк,

Сокицятне   розь   понжавтыть.

Ды авазо, дока Маря,

Эйкакшт  пивсэме  тонавты.

Олгсо вельтязь пичень кудост

Оймси Бездна лей чиресэ.

Сонзэ  перька кальтне удыть,

Качадыть   медень  чинесэ.

Ды кенярды лембе чинтень

Ожолгадыця   од   садось.

Эрьзя   лецтни...   Тензэ  питней,

Мезесь   оймезэнзэ   кадовсь.

Соды: веть,  зярдо  сэнь  валскес

Буэнос-Айресэсь  ойми,

Сон  квебрачо чувтос  валсы

Эсь   чачома  енксонь  ойменть.

II

Чатьмониця санов кедть

Мезе-бути керясть   кевстэ

Апак оймсе. Ней жо, веть,

Эзем   ланга   венстязь   чевтьстэ.

Рунгосонзо  трудонь  пси.

Уды  Эрьзя  виень  максозь.

Кевень   тейтересь лекси

Живой ломанькс сонзэ вакссо.