БОЛДИНАСО

Сэтьме  валскесь ертсь певтеме   маней,

Веленть  лангс  кольги   сонзэ   сырнесь.

Тесэ ине Пушкин умонь шкане

Стихсэ Гончаровадо лецтнесь.

Мерят, тия,  покш парконть малава,

Охотав Онегин ласте ардсь,

Зярдо Таня Ларина салава

Тензэ   алтазь   серманть   велькссэ   тардсь.

Чувтнэнь  лангсто  прыть  лопатне  велязь,

Кашторкссо  пиризь  ютамо  кинть.

Евтнить, сонсь поэтэсь, тесэ эрязь,      

Сынст  юткссо   вастнесь   лисниця  чинть,

Панжтни    кенкшть   умонь   кудо-музеесь,—

Экскурсантонь   вайгельть  сон   марясь.

Сыть ломанть, штобу эсь сельмсэ неемс,

Кода  Пушкин колмо сексть эрясь.

Монгак ютксост. Кувать тердсь тей мелем,

Секс  седеем, одкстомтозь,  кеци!

...Велень  ульцят  сравтозь  кувалт,  келес,

Сынь ине поэзияс ветить.