Раськень Озкс

Раськень Озкс – те покш чи,

Эрзят, тыненк шумбрачи!!!

Ламо вийть, ламо арсемат!!!

Вастовомат ды кортнемат!!!

Те чистэнть Атянь эземесь

Одов инязор кочки,

Истя изни вейке лемесь,

Тевтнень ветямо карми.

Эрзят пуромить озномо,

Весе «Паз чангодть!» мерить,

Штатол лангс кармить ваномо

Конань эйсэ кирвазтить.

Монгак ванан штатолонть лангс

Ды весень марто ознан.

Чарькодян, вадрясто содан,

Верь эйсэнь чуди эрзянь.

Седейтне чавить бойкасто

Ды сельведтнеяк чудить,

Кедте кедьс кундазь те шкасто

«Эрзя мон!»,- весе рангить.

Весе эрзянь оршамосо,

Улияк ярсамопель,

Весе лексить эрзянь коштсо,

Гайги мазый эрзянь кель.

Ялгат, сы Озксонтень садо!

Пазонтень свал сюконядо!

Мааронть лангсо ознотано!

Седе виевекс теевтяно!!!