Оймсема шка

Кизэсь сась! Кизэсь сась!

Те вадря оймсема шкась!

Ламот ошсо свал оймсить,

Ламотне велев ардыть.

Кить-бути лия масторов

Эрьва иестэ ливтнить.

Мень паро сынь тосо муить

Зярдо пельсраужот сыть?!

Кить-бути лагерьсэ оймсить,

Пиче вирень кошт лексить,

Чить свал экшелямо яксить,

Чокшнень пелев свал киштить.

Сех вадря оймсемс велесэ,

Ярсамс кши, симемс ловсо,

Ваномс мазыйне пертьпельксэнть,

Марямс нармунень моро.

Эсь мастордо ансяк арсемс,

Малавиксэть свал ледстнемс,

Паро валт эсь туртов марсемс,

Паро ломанекс улемс.

Чилисеманть ёнов ваномс

Кода сон веленть стявты,

Кода лезды стаданть панемс,

Ды важодемс кармавты.

Сех вадря оймсемс велесэ,

Мень велесэ оймсемат?!

Тесэ лездат эрьва мейсэ:

Валнат якстерькайть, куярт.

Ледят тикше, ускат пенгат,

Шлямокудонтькак уштат,

Эсь ялгат парямо тердят,

Мартост течинь чинть ледстнят.

Сех вадря оймсемс велесэ!

Эрьва валске свал чийнемс,

Ды экшелямс Сура лейсэ,

Лия берёков уемс.

Апак фатя юты кизэсь!

Те вадря оймсема шкась!

Ды кадык ки-бути сизесь,

Ошов мель ардомс арась.

Минек масторсо оймседе,

Кизна велев свал ардтнеде,

Мазый таркат тынь нетядо,

Тантей лисьмань ведь симтядо.

Оймсеманк юты вадрясто,

Тесэ шкась ливти бойкасто,

Аволь истя, кить пек сеедьстэ ливтнить,

Зярдо пельсраужот сыть.