Вейкесь — прядовиця моро,

Омбоцесь — ансяк ушодовсь, —

Аштить вейсэ тетят-цёрат —

Корты сыресь, корты одось...

Одонть валтнэ сынсь кеверить —

Вешить варма сёлмо алов.

Сыренть валтнэ керязь керить,

Ускить цёранть моданть малав.

Одось эзь эшксевть даволтнэс,

Конат тетянть мерькасть-лепштнесть:

Савкшнось алов сёлмтнэнь нолдтнемс,

Савкшнось васов валтнэнь кекшнемс.

Ульнесь стака сыренть кизэ,

Пек сэпейть сыренть валонзо:

Пели эсь цёранзо кисэ,

Пели — синдтресызь сёлмонзо.

Одось пейди сыренть каршо,

Вал а ёвты апак рака —

Прянть а лови сон эйкакшокс.

Сыресь корты, ансяк стяко…

Мейле одонтень пачкоди

Эрьва валось, теке куля.

Мейле, мейле сон чарькоди,

Ансяк тетязо… а ули.