***

Ушось авардсь-авардсь — лоткась,

Таго кармась…

Вачкодсь вальмас — мезе ёвтась

Кельме вармась?

Мезде ранги потмо валсо,

Мезе алтни?

Кармить сюдомонзо валскес

Сыре кальтне.

Кортат-кортат эсеть марто —

Сельметь нардтнят.

Потстот сардонть, сыре сардонть

Таргамс снартнят.

Весь нирежди — вайксни-ойкстни,

Кувси-нувси.

Оймесь кияксонтень комси,

Лекси-пувси.

Сыргси-сыргси лия таркав —

А сыргави.

Таргат-таргат сыре сардонть —

А таргави.

Яла вельмевтят кемеманть,

Ансяк стяко...

Венть кувалмозо лайшемань —

Пек кувака...

Сизи оймесь — озякинекс

Кирьмицяви.

Валот ойми эзем принес —

А маряви.

Прат арсемас, ды чарькодят,

Ды... эшкеват:

Те вармадонть а оргодят,

А кекшеват.

Сави ойментень тонадомс,

Оймамс сави:

Сыре сардось пингес кадовсь —

А таргави.

Ушось авардсь-авардсь — лоткась,

Таго кармась...

Мезе, мезе тонать ёвтась

          Кельме вармась?