* * *
Те масторсонть эрязь, ки эзь сизе?..
Тесэ берянь, кортамскак а мезть.
Туеде ды кодадо од пизэ, —
Эрямось максови ансяк весть.
Тесэ берянь, тесэ ёнось ёмась,
Тесэнь читне бабань пештть невтнить.
Те масторганть яксить ломанть комазь,
Те масторсонть менеленть стувтнить.
Тосо, козонь тыненк валгомс сави,
Паряк, лиякс пиземесь пизи…
…Самолётось моданть эйстэ явовсь,
Стакасто, прок пешксесэ, кузи.
Моненьгак бу кияванк каявомс,
Витемс рунгонть, китне зярс тердить.
Ансяк тень те модастонть а явомс, —
Эйсэнь кудо вальматне кирдить.
Кершавинь те пайстомо модантень,
Кершавинь — а туеван ковгак.
Теке пици сэредькс потсом кандтнян,
Конадонть а менян зярдояк.
| 
