***

 Кандтнинь кемема потсом салавине.

 Капшинь эрямо. Чавот ульнесть зептне.

 Арсинь — кись келей. Чалгинь — сон теине,

 Нусманят читне ды чоподат ветне.

 Кеверсь вановксом сэпей моданть ланга,

 Стувтнинь, кодамо тюсозо менеленть.

 Молинь чатьмонезь. Састо. Апак ранго.

 Прок сокор, аштесь уцяскам икелень.

 Прок локшосо пансь ломанень згилямось.

 Кильдсть эйсэнь. Эзь тонговт кирьгазом ашкось.

 Кекшнинь ломанде. Якстерьгалесь чамась.

 Прок отьмас, онс оймсеме оймесь пракшнось.

 Сорнынь — совсекшнесь потмозом тардема.

 Пелинь кежей инжень пей алов понгомс.

 Ды эзинь сода, мезе тень теема,

 Шка сакшнось — кискакс анок ульнинь онгомс.

 Монсь ансяк содынь, кода лайшинь онстом,

 Мик тосояк седеем кемсэ чалгсесть.

 Кияк эзь нее: оймесь монь верь потсо,

 Ды танстесь кадовсь вейке — вандынь валскесь.

 Пандынь, пандынь мон эрямонтень питне,

 Эзь кирде оймем, пеняцямо кармась.

 ...Кувать солавтсть седеенть маней читне,

 Кувать вадяшась эйсэнь лембе вармась.