Пазонь пеедькшнема

Ледстнян умонь тев. Мон сестэ састыне эскелинь эрьва кодамо тюсонь лопасо вельтязь парконь теине яннэва. Видькстан, пек вечкса те нусманя, сэтьме шканть, секскак яла бажан молемс вирев эли парков: тосо пертьпельксэнть мазычизэ седее редяви, тосо сон оймавты, кази певтеме кеняркс. Каршон састо эскелясть кавто сыре ломанть. Улема, мирдть-нить. Атясь мольсь неже марто. Бабась кирдсь эйсэнзэ кавалалдо ды мезе-бути тошказь ладсо кортась. Чачозо кенярксоволь, валдоль.  Сельмсэнзэ мерят тештинеть пикстердсть. Сонсь ёлганяль. Ансяк удалов пурназь тусто черензэ прянь кавто ёнга токазельть шержесэ.

Полась мельспаросо кунсолось эйсэнзэ. Лиясто каилизе кедензэ аванть лавтов ланга ды истя, кутмордазь, молильть кувать.

Згилямонь толнэ кирвазсь седейзэнь.

«Ванта, - арсинь, - одтнэ. – А визькскак, нать, тенст истя яксемс?»

Мекс мон тень ледстия? Кода кортыть, иетне таштыть превть. Ансяк ней, ламо иень ютазь, тень чарькодевсть сеть сыре ломантнень ёжост, ды ванна мекс. Эрязь-аштезь мария, кода лавшоми шумбрачим, олы чамам. Седеесь ды ёжомарямотне – некеть. Бульчом, вечкемаськак, бути сон алкуксонь, палы свал, эрямонь меельце чис. Мезеяк а теят, нать, Пазось лангсонок истя пеедькшни.