ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Ольга Сусорева. Ведява

Ведява

(Ёвтнема)

Эрямосонть сеедьстэ лисни се, мезенть минь эзинек учнеяк ды а содасынек. Секс, нать, покштятнок-бабанок кортасть: «Зярс эрят, семс тонавтнек», «Ванстак пертьпельксэнть, сон тонь кудот». Миша марто Колят, улема, тень а содылизь. Покштятнень-бабатнень валост пиле юргаяк эзизь ютавтне. Паряк, те тевесь аволь лисеяк…

 

Течи ялгатне стясть чилисеманть марто калонь кундсеме. Каникулатне, эно мезекс максневить? Паро, лейнесь аволь васоло эйстэст. Куш калонь ям пидят. Седеть витьсак.

Сельгень прамс Мишат-Колят пачкодсть таркантень. Кодамо тесэ мазый – лейненть вакссо, кона сурекс таргавсь веленть куншкава, аштесть  нусманя кальть. Марявсь, сынь а вайке ие ванстыть веденть. Вармань пувамсто сынь навсесть эсь тарадост ведентень. Улема, лейнесь ды чувтнэ кортнесть эсь ютковаст. Миша марто Колянень ялатеке. Сынь вешнесть седе домка таркине, нолдызь ведентень ульмаст ды кармать учомо.

Учость талайс. Мезеяк эзь понго. Мишань сельмтне аламонь-аламонь кармасть пекставомо. Вант, ульматнеяк кедьстэнзэ пры. Коля эртизе кедензэ:

− Иля удо! Кельмат!

Миша тарск тейсь.

− Кельматкак.  Мекс-бути мезеяк а понги.

Те шкане Мишань ульмазо сорнозевсь. Мезе-бути понгсь. Те ульнесь лапашка карпа. Вейке калонть мельга понгсь омбоце, колмоце…

Колянь ульмазо чатьмонсь

− Тон весе калтнэнь эсеть ёнов ускить. Эрявикс валт, нать, содат?

− Кода эно!?

− Туемеде икеле меринь: «Калнэть, покшнэк-вишкинек кирнявтодо ведразом!»

Коля эзь пейдезеве. Мекевланг, кежензэ састь.

− Мон бреднясо карман кундсеме, − окойники мерсь сон.

Аламо шкань ютазь цёрынесь сась велень эрицянь Инзай Митьконь марто. Кандсть бредня. Тевесь ней тусь седе эрязасто. Кодак весть-кавксть ютыть кавонест лейганть – колм, ниле понгить. Ансяк аволь покшкеть, истяк, пейтнень юткова мешамга. Миша вансь-вансь лангозост. Ульмасо истя а кундсеват. Эряви муемс лия тарка. Неть калонь кундсицятнеде тесэ оймамо а карми. Бреднясо кундсемась – те аволь тев. Зярдо ванат-ванат кельме веденть лангс, мейле «сырк» мери недесь, ды,  кал, ёртовт ведрантень. Вана, косо оймесь оймси.

Ансяк стиксэль таркастонзо. Маризе, кода удалонзо кие-бути састыне мольсь ды ней пштистэ ваны кутьмерезэнзэ. Миша тандадомадонть ведентень эль эзь пра. Стамбарнэ велявтызе прянзо. Ды седеяк абунгадсь… Икелензэ аштесь сэрейдеяк-сэрей ава ашо руцясо кувака ашо черь марто.  Истямо мазый, сельметькак а саевить, прок артовкс. Кедьсэнзэ асодавицясь кирдсь ведь марто ведра.

Неявсь, мелезэнзэ мезе-бути а тукшны:

− Кие мерсь тенк бреднясо калонь кундсеме? – авань жойниця, чольдердиця ведекс вайгельденть Коля марто Митькот таймазкадсть. Сынь ачарькодиця сельмсэ вансть мазыйканть лангс, прок чопача несть.

− Васенцекс муевсь Коля:

− Саинек бреднянть ды кундсетяно. Мезе, жаль теть?

− Кода а жаль? Тесэ малав весе калнэтне вишкинеть. Сыненст касомс ды касомс. Нолдынк. Сындест паро уха ям а пидеват ды а сюпалгадаткак.

− Нейке чиян, − згялязевсь Коля. – Зяро кундынек – весе монь. Теветькак арась ломань калтнес.

− Неть калтнэ монь, − кеместэ мерсь авась. – Те тон апак кевксте лейзэм совить.

Миша ве ёно вансь лангозост ды эймельдсь. Зярдо седе вадрясто варштась аванть лангс весе рунгозо соракадсь: мазыйканть сельмензэ таркас ульнесть кавто ведень повнеть: сэть ды потмакстомот, прок салы эйсэть. Миша неизе тосто эсензэ сулеензэ. Мерят, авась ойметь пачк неи.

− Авай, азё мольть эсеть киява, − Коля кодаяк а лоткави.

Миша допрок чувтомсь. А соды мезе теемс. Тандадомадонть понксонзояк соракадсть. Чарькодсь – аволь стяко тезэньсась. Те теть аволь компьютерсэ вирусонь чавомс. Каспрский путат – ды весе. Те те-мазе лия? Ансяк кие те авась? Ды кода ней улемс?

− Нолдынк калтнэнь, − мерсь мазыйкась истямо кармамвтомань вайгельсэ, мик, сеске стявлить ды топавтовлик мелензэ.

Мишань эйстэ ведрынесь ульнесь а васоло. Сон варштась васня Коля лангс, мейле аванть ды ахолдызе ведранть. Те чомболк мерсь ведентень. Калнэк-мезнек. Азе вешнек! Коля азаргадозь рангстась:

− Мезе теят?

− Мон а чуман, − эль марявиксстэ мерсь Миша. – Сонсь прась.

− Кода сонсь прась?

− Мон эзия токше.

− Мезть лавгат? Кода истя прась?

− Те паряк, авась правтызе?

− Авась? Косо, биш, авась?

Весе варштасть удалов. Тосо – кияк. Ансяк кальтне тошкасть веденть марто.

Колянь чизэ колавсь. Зярс-бути сёвность-рангсть ды кудов ношкстасть. Коля чумондсь лисезь тевсэнть весень. Секе тев тейнесь: «Кодат ансяк прявтомот масторганть а яксить? Миша эзь чарькоде, мезе те ульнесь. Сонензэ марявсь – те ульнесь аволь ломаньгак. Ды ансяк Митьконень ульнесть жальть калтнэ. Ухадояк кияк эзь ярса…

Омбоце чистэ Коля ормалгадсь. Кие соды мезде? Пильге лангс эзь стяво. Врачтнэньгак тердтнизь. Неть ваннызь цёрканть, аволдасть кедьсэст, келя, орма а мутано. Эйкакшось шумбра-паро. Анализэнзэ – седе вадря –а вадря. Ансяк цёркась солазь солась эрьва чистэ. Чамазо ловташкадсь, лоткась ярсамодо, кармась коськеме, сормсевкст, мик, конясонзо лиссть. Велесэнть кортасть, колдувизь, келя, цёрыненть. Кие? Эзть сода?

Миша сех пек ризнэсь ялганзо кис. Парсте чарькодсь: Колянь ормазо кода-бути сюлмазь асодавикс аванть марто. Паяк, сон колдувизе? Ансяк кие те авась, ды кода сонзэ муемс?

Цёркась эзь кирдеве ды ёвтызе весементь Паша атянстэнь. Сырель бодясь. Войнанть-нужачинть неизе. Мейле од эрямо строясь. Ней вана ськамонзо лиядсь. Куломась эйсэнзэ эзь сае. Тень кисэ весементь содась. Эрьва кевкстема лангс каршо валткочкиль. Кортыль стамбаро, прок вачкиль арсеманзо.

Атясь кунсолызе Мишань. Чатьмонсь кувать. Цёркась, мик, кургонзояк автизе, кода учось бодянзо валтнэнь:

− Миша, содат, кие те ульнесь?

− Кие?

− Ведявась.

− Кие?

− Ведьавась. Ведень ванстыцясь, кирдицясь. Зярдо-бути тензэ покштянок-бабанок озность. Пельсть коронзо эйстэ. Кортыльть, келя, сон Эри веденть сехте домка таркасонть ды лиясто экшелицятнень эстензэ сайниль. Тундат, зярдо кармиль соламо ловось Ведявантень энялдсть максомс шумбрачи, а кежиявтоволь ломантнень лангс, максниль тензэ сараз, морот морсасть ды озность. Кортнесть, сон орматкак ломантнень лангс кайсиль, бути мелезэ а топавтови. Ведявась вадря, сон жо берянентькак кучсы. Кинень кода. Орок, Коля сонзэ марто пелькстазевсь, мейле васов кучизе. Ды ней ормалгадсь. Ведяванть марто истя а кортамаль. Кирдиця… Тон мелензэ топавтык, нуцькам, видестэ теить. Сон тонеть мезеяк эзь тее.

Мишань седеезэ абунгадомадонть кирьгапарьс сась ды ней тосо токнось.

− Бодяй, мон арсинь – те ёвкс.

− Э, нуцькинем, косо ёвкс – тосо эрямоськак. Эрят, эрят, ловат, весементь, келя, содаса. Ды свал муеви од. Ведявась мекс кежиявтсь, эзить чарькоде?

− Чарькодинь, калтнэнь эзинек ёрто.

− Во-во. Ванстомс эряви пертьпельксэнть, ведентькак, калтнэньгак, чувтнэньгак. Весемесь сюлмавозь. Чувтнэ эрявить ведентень, тонась а коськезэ. Ведесь чувтнэненьгак максы эрямо. Ведьсэнть калтнэ эрить. Те сынст кудост. Тон, вана ульмасонть кундсят вейке-кавто. Седе ламо а ульмават. Коля бреднясо сыргась? Бути весе сыргить бреднясо, ламо калт кадовить? Во-во. Уха ямдояк мейле а ярсават. Ведявась видестэ корты. Сон вансты.

Миша чатьмонсь

− Вана мезе, нуцькинем. Колянь эряви выручамс. Сон Ванды а стяви, секскак ськамот молят. Ведявась Тонь лангс а кежиявты. Валске ранаяк молят таркантень, косо калт кундсиде. Колянь чумонзо нолдавтык. Озномань валтнэнь кияк а помнясынзе. Истяк снартнек ёвтамс. Мейле ведентень ёрт сюлмосо сал, кши печть, суро ямкст. Зярдо ёртсыть, тук се таркастонть, иля велявтне. Чарькодить?

− Уху.

Валске марто Мишань кирьгапарезэяк коськсь. Пелемадонть кедензэяк сорность. Кода лиякс! Ведень кирдицянтень моли пшкадемс ялганзо кис. Те тенть аволь компьютерэнь программа путомс. Лепштясак кнопканть ды стувтык. Те – Ведява! Те лемденть цёрканть рунгозо  «зыйк» мериль.

Курок пачкодсь таркантень. Варштась ве ёнов, омбоцев – кияк.

− Ведява кирдиця. Нолдык чумонок теезенть кувалт. А содылинек... Ну… Весе…

Седе курок ёртызе ведентень кшинть, салонть ды суро ямкстнэнь. Ды кода ношкстась кудонть ёнов. Кодат тосо велявтомс. Пильгетне модантькак эзть маря, сынсь кудов чийсть. Чийсь, чийсь. Оймесь эль  мештентень кельги, лисевель. Эряволь лоткамс, лекстямс. Апак учо марясь, буто кие-бути лангозонзо ваны, прок кутьмерензэ уросо пупить. Велявтомс – пелят. Миша варштась удалов… Икелензэ аштесь Ведявась. Ней сон марявсь седеяк мазыекс. Сон сулей ладсо аштесь леенть лангсо. Пильгензэ мик ведентеньгак эзть тока. Кодась кувака черьсэнзэ. Миша а соды, зярс истя вансь Ведяванть лангс. Кодамо-бути потмо вайгель кармавтсь цёрыненть молемс Ведень кирдицянть мельга. Авась ливтязь ливтясь веденть ланга. Пильгензэяк эзинзе начто. Миша мезе вийть чийсь мельганзо. Ведявась секе тев варштниль удалов. Сон ков-бути тердсь цёрынесэнть. Окойники, кирдицясь лоткась.

Сынь пачкодсь кодамо-бути лисьмапрянть видьс. Ведявась венстясь Мишанень суликине:

− Пештть тестэ ведь.

Дивань тевть. Ней, Ведяванть вакссо аштемстэ Миша мезеяк эзь пеле. Мекевланг, кодамо-бути сэтьме кенярдомо саизе мештензэ. Сон стамбаро пештизе суликиненть. Сонськак тосто симсь. Цёрынесь зярдояк истямо тантей ведь эзь варштне. Седеетькак витеви. Симат – а симеват.

Ведявась мизолдозь вансь лангозонзо:

− Максык те веденть ялгать туртов, − вайгелезэ чольдердсь тундонь чудикерьксэкс. – Илязо тейне ильведжевкст. Ней азё чийть кудов. Ды иля велявто удалов.

Миша чийсь кудов ды кецясь. Чийсь ды абунгалесь. Ёвтнемс киненьгак – а кеми. А ёвтамс – кевкстить кодамо ведь?..

Недлянь ютазь Коля пичкась. Дивамодонть пе-карй арасель. Миша весть арсесь весементь ёвтнемс ялганзо туртов:

− Коля, содат кие  ульнесь те авась?

− Кодамо авась?

− Се, конась калтнэнь ёртомс кармавтымизь.

− Ну?

− Ведява.

− Кие?

− Ведень кирдиця. Сон тонь ормас панинзеть. Сон тонеть ормаменькс максь.

− Алкукс? Мон сестэ превтемекс лемдия. Те вана тевть! Калт ней бреднясо а карман кундсеме.

− Монгак ней покштнэнь карман кунсоломо…




Категория: Мои статьи | Добавил: tati (15.12.2009)
Просмотров: 760 | Рейтинг: 5.0/2 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz