ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Ольга Сусорева. Тиринь ломань

Тиринь ломань

(Ёвтнема)

Валске мартось ушодовсь сёвномасо. Кудось зэрнесь, вальматне сорность, весемесь та-кода энгамсь ды ансяк Горинов нинзэ марто онгсь истя, мик, шабратненьгак пилест стядозельть. Кодаяк эзть пра ве мельс. Эрьвась ваткась эсензэ:

− Тон арсят мон мездеяк а содан? А неян? – Катянь сельмстэ сяткот ливтясть.

− Ярсамс кадомак!!!

− Ярсамс мелеть ули? − нинть кежензэ седеяк састь. – Исяк нать те «нумолнэть туртов» истя эзить ватка.

− Катя?!

− Мезе, Катя?! Сакшнат веньперть, тейтерьавань чинесь эйстэть поровт лангсто правтанзат. Минь, келя, ялгань марто кафесэ аштинек. Тон куш манчеме тонадт.

− Да удынь! Удынь мартонзо, − Гориновонь сельмензэ эль эземстэ лисить. Секень учок, пупатанзат седейс.

Катя седеяк азаргадсь. Урнозевсь, сонсь а аварди, а пейдияк. Седейзэнзэ токась. Вадрясто. Апак учо Гориновонь кедьсэ пенчесь сонсь, мерят, ливтязевсь нинть ёнов. Пенчесь свистясь Катянь пилензэ вакска ды вачкодевсь частнэнь лангс, конатне понгавтозельть стенас. Пенчтнек-частнэк лажнозь прасть кияксонтень. Те ульнесь пе. Зярыя шкань перть Горинов азарсь сельмсэнзэ вансь нинзэ лангс. Низэ чатьмонезь  вансь частнэнь лангс. Эрьванть потмозо лакась кежтнеде ды апак ёвта валтнэде.

Горинов капшазьоршнесь ды шлизе пулонзо кудостонть. Удомо эзь са.

Катя лиядсь ськамонзо, частнэнь ды тапазь эрямонзо марто.

 

Вечкевиксэнзэ вакссо Гориновнень  пароль: лембе, чевте, валдо. Эрьва валонть кургстот нильсызь, мелеть вансызь. Аволь кода кудосо: те эряви, тонанть теемс, тон эскеяк а маштат чавомо, пеельгак човамо. Ды кодамо тон цёрат? Сон вансь Инна лангс ды сэвезь сэвсь сельмсэнзэ. Тонанень те эрявськак, маштоволь – ингельёдт велявтоволь икелензэ, ансяк вакссонзо  аштек ды ярмакт тук. Сонзэ Ежов сельминензэ ске тев чийнесть мекев-васов. Нать, арсесть та-мезе вешемс. Улема, шка эрявикс учость:

− Сергей, ванытя, кодат неть каталогтнесэ мазыйть шубатне. Сельметь кадовить.

Горинов аволь чаулатнеде. Сеске чарькодсь: мейсэ тевесь качады. Ансяк меельце зарплатастонзо нинзэ марто рамасть холодильник ды микроволновка. Тевтне кальдявт:

− Мазыйть! – мерсь сон казямосто.

− Пек мазыйть! – эзь арсеяк чатьмонеме Инна. – Монень вана те ладяволь. Ванта, качествазо кодамо ды тюсозояк…

Горинов эзь карма мезеяк кунсоломо. Куроксто стясь, оршнесь ды  пмельганзо кенкшенть. Вечкевиксэзэ эйсэнзэ эзь кирде. Сонензэ эзть максо шуба. «Вечкемась эзь лисе»…

 

Кода лиясто эрси минек марто: ков-бути мольтяно-чийтяно, капшатано-раздетяно. Арсетяно, ки лангот содасак. Мейле? Ульнесь-арасель те кись?

Гориновонь ульнесь весе: важодема, ни, «вечкевиксэзэ». Ве чис сон ёмавтынзе козейканзояк, вечкевикс тейтерьаванзояк. Бути молевлить сыненст мекев, паряк, одов примавлидизь. Ансяк, седеесь эзь са тов эцемс. Ды Горинов тусь… умонь ялганстэнь Зориновнень седеень чамдомо… симнеме…

 

… Чокшнесь удалась. Зориновонь аволь умок кадызе низэ. Тусь лиянень ды саизе мартонзо тейтерест. Зоринов весенень тейнесь, келя,  мон  а карман тень кисэ мелявтомо. Седее однэяк эстень муян. Ансяк мекс-бути кедензэ Алов сеедьстэ понгиль «чапамось».

…Горинов ды Зоринов чокшнень перть чамдтнесть седеест...

Васенце симезь суликанть мельга весе сынст туртов теевсть чаулакс ды берянекс. Омбоцеденть мельга кельтне эзть яксевть, ансяк пряудемест кортасть.

Вень куншкастонть ялгатне арсесть молемс инжекс колмоце ялгаст туртов – Маряновнень. Ансяк пачкодемс тенст эзь саво…

 

… Ялгатне апак капша мольсть ульцянть куншкава. Пильгетне допрок эзть кунсоло, теке марто кельтне вадрясто човсесть. Пачкодсть киулос. Эрявсь ютамс кинть. Кие вень куншкане иредьстэ карми ванномо свотофоронть лангс? Сельметнеяк неть толнэтнень а несызь. Стяконь тев!

… Горинов ледсти, кода сынст лангс ардсь раужо тюсонь ауди. Пряудемесь кодаяк эзь чарькоде – мезе теемс? Пильгтне эзть кунсоло. Сон сонськак  эзь чарькоде, кодамо виесь кармавтызе сонзэ теемс кавто эскелькст икелев. Машинась ёртызе Зориновонь. Горинов сеске ёжос сась: икелензэ аштесь верь потсо ялгазо. Аудисэнть ветицясь кроязь лиссь машинастонзо:

− Сельменк эзть нее? Симемс седе аламо эряволь!

Горинов вансь ачарькодиця сельмсэ. Ялганзо седее курок ускизь больницяв. Горинов ардсь вакссонзо скороень машинасотнь ды арсесь: «Кода мон живстэ лиядынь? Кие тулкадимим икелев? Кавто эскелькст ды эрямось эзь сезевть».

 

… Валске марто Гориновонь седеезэ допрок стакалкадсь. Ков прянть теемс? Ков молемс? Инна таго шубанзо марто карми, Катя? Ков пильгтне пачтясызь…

 

Пильгтне чийсть кудов. Горинов арсесь, низэ, кода несы, карми музгордеме, маштнетеме, згилямо. Кенкшентькак, паряк, судонзо икеле пекстасы…

Катя аштесь озадо цюлансо, кедьсэнзэ кирдсь нардапаця, ссеке тев ёзась чудикерьксэкс чудиця сельведтнень. Зярдо неизе поровт лангсто мирдензэ… седеяк лайшезевсь… кенярдомадонть.

− Мезе тесэ пижеть-ожот кайсят? – кевкстсь Горинов. Сонсь снартнесь а невтемс потмоёжонзо.

− Сюкпря Пазонтень живстэ кудов сыть, − эль марявикстэ мерсь низэ.

Горинов абунгадозь варштась созэ сельмтнес: ризкстэ пешксеть, мелявтомадо ды... вечкемадо.

− Эно ков тееван? – пейдезевсь мирдесь.

− Веньперть седеем ризнэсь кисэть. Тарка-эзем эзинь мукшно. Пазаванть икеле цела ве ознынь… Тон ковгак зыянс эзить понгоне?

Горинов седеяк абунгадсь.

Тиринь ломанесь марясы тонь потмоёжонть васолдояк ды идитянзат куломадонтькак.

− Катя, Пазось валот маринзе.

− Алкукс?

Горинов весе седейстэ кутмордызе тиринь ломанензэ. Кода паро улемс кудосо…




Категория: Мои статьи | Добавил: tati (15.12.2009)
Просмотров: 702 | Комментарии: 1 | Рейтинг: 5.0/3 |
Всего комментариев: 1
1  
If you want to get read, this is how you sohuld write.

Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    Сделать бесплатный сайт с uCoz