ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Ольга Сусорева. Од эрямо

Од эрямо

(Ёвтнема)

Ванды од ие…

Ванды эряви молемс парикмахерскоев. Ломанькс прянть теемс…

Ванды эряви теемс салат… Ламо… Весенень сатост…

Ванды эряви  ёвтамс ялганень седейшкавань валт кецямочинь кувалт…

Ванды ушодан од эрямо. Эрьва ие ушолекшнан…

 

Будильникесь гайгезевсь вейксэце чассо. Панжия васня вейке сельмем. Ашолгадсь. Стямс вийтне арасельть. Пряудемесь носксь: «Стяк, а кенерят». Рунгось те шкане пижнесь: «Куш вейке минута удомс!» Панжия омбоце сельмем. Ушосонть паро: чувтнэ ашот, ловось ашо, менелесь ашо. Ансяк каршо аштиця лавкань суликатнесэ покш якстере буквасо цяпадезель: «КРУГЛОСУТОЧНО». Кода минек эрямосонть: весемесь паро, ансяк свал муеви се, мезесь весе  артовксонть коласы. Зярыя шкань перть пряудемем пелькстась рунгом марто. Сестэ превей ломань ладсо меринь эстень: «Ине тевтнень мон кевейкее чассояк кенерян теме. Эряви эсь прянть вечкемс. Куш лиясто»…

Стинь кемгавтовоце чассо. Парикмахерскойтне од иень каршо пешксельть тыц. Очередтнэ весеметнева  – Питеров пачкодемс. Мезе теемс? Варштынь чамачамава эсень лангс: судо, сельмть, курго – ломань ёнов молян. Мезе тень а сатны? Од иенть вастаса неть чертень мартояк.

Кудов чиинь прянь-полдань синдезь. Эрявсь теемс салатт. Панжия кенкшенть, поровт лансто эль эзимим правто  кузонь чинесь – тантей, ванькс, валдо. Нупальсэм сон марясь эсь прянзо азорокс. Мелем ульнесь озамс. Мадемс. Ледстявсь эйкакш пингем, кода минь чийнинек кузтнэнь алга вишка азаром марто. Кода весть правтокшнынек мазыйстэ оршавтозь кузонть. Те шкане гайгезевсь телефоном:

– Мон теть течи а саван, – мария ялгань вайгелензэ. – Нолдык чумом. Лиянь марто карман.

«Вейке салатто седе аламо теян», –  кивчкадсь пряудемеван.  Ды ансяк кенеринь путомо кортамо кечиненть, кода тень гайгсь васня вейке, мейле омбоце ялгам. Весе яволявтсть, келя илямизь учо, а сатано, плантнэ полавтовсть. «Весень вейке шкасто, – нусманясто арсезевинь. – Мезе од эрямом карман ськамон вастомо?»

Маринь, кода сельведтне аламонь-аламонь куродыть сельмем. Киргасомгак чапаськадсь.

Ёмсиця ломанькс варштынь частнэнь лангс. Шказо кавксо част. Од иень самонтень лиядсь ниле част. Чарькодевсь вейкесь – од эрямось течи а вастови.

Васняяк, а панжови шампанскоесь.

Омбоцекс, вийтне а сатыть панжомс винанть.

Колмоцекс, а кинень карми ёвтамс тост.

Нилецекс… Авардезевинь вайгельсэ….

Сельведть валынь талайс. Мейле жо чарькодинь: сельведтне чама ёжонть коласызь. Течи жо  од ие! Эряви мазыйкс улемс! Сеске  ёртовинь артомкатнес:  ваднинь-тапинь, чамась паролгадсь – ёжось  потмура, мейсэяк а пейдевтеви. Арась, те а тевть!!!

Шказо кевейкееце част. Мон озынь телевизоронть икелев. Нуртинь «Колокольчикенть» – мезесь панжовсь. Путынь икелем мандаринатнень ды «телень» салатом, конанде «научнойкс» мерить «Оливье». Монень ялатеке.

Мезе оште эряви??? Истякак уцяскаван.

Телефоном эзь лотксе гайгемеде. Все анокольть ёвтамс тень седейшкавань поздоровт. Мон, теке покордавинь ды аштян озадо дивансонть. Киньгак марто а кортан. Кияк тень а эряви. Васецеде ськамон. Паряк, истя седеяк вадря. Ули шка од эрямонть лангаяк арсемс.

«Мезть арсемс, – пейдезевинь  пачкам. – Эряви учомс. Зярдо учат – свал сы».

Апак учо вачкодсь превзэм: мезекс монень од эрямось? Мейсэ таштось  а тукшны мелезэм? Мекс минь эрьва ие снартнетяно мезеяк полавтомс эрямосонок, одонть  совавтомс бажатано?

Мезе ули монь эрямосо? Салат, парикмахерскойть, апак панжо шампанской, ялгам, конатне эзть са. Варштавинь «Колокольчикенть» лангс.

        Те лимонадось монь эрямом.

Течинь чись монь эрямом.

Эряви эрямс течи ды нейке! Кие соды, мезе эйсэнек учи ванды?

Ледстявсь тень, кода вишка пингстэ чийнинь кудо вакссо касыця кирмалавтнень юткова. Пурнынь весе кирмалавтнень. Ялаксонень тев теикшнинь – сон эйсэнь пель чи витнесь-петнесь. Ледсь мелезэм, кода пионерэкс примимизь. Эзинь машто витьстэ кедень кирдемс ды сюлмсемс якстере галстуконть. Ялаксом сюлмсилизе, зярдо кувать икелензэ нернинь. Кода вишка пингстэ пелилинь кадовомс чопода нупальсэ. Тень марявсь – нейке жо сы Бобаесь ды сэвсынзе пильгень.

Кодамо вадря ульнесь шкась! Ней жо стакачитнень удолдо а нейсынек эрямонок. Яло чийтяно, пельтяно а кенеремс. Пракшнотано, стякшнотано, кецятано, майсетяно. Ютнетяно од шканок вакска. Карматано эйсэнзэ вешнеме ведьгеменьшка-кодгеменьшка иетнестэ.

Монень аволь кодгемень! Моненень комсьте седе ламо! Весе кенерян! Те арсемась пештизе мештем валдосо. Сеске чапамоськак киргапарьсэнть ютась, сельведтнеяк потасть,  потмура ёжось, прок арасельгак.

Мезекс мон учан од эрямонть, бути те эрямось ней юты?!

 

Кода вадря аштемс ськамот диван лангсо, ваномс апак панжо шампанскоенть лангс. Кода вадря, зярдо кудот икеле ашти лавка, конань вальматнесэ якстере буквасо сёрмадозь «КРУГЛОСУТОЧНО». Кода вадря, зярдо улить ялгат, конатне гайгить тонеть пельчасошкань перть.

Кода вадря, зярдо од иень самонтень кадовсть кемгавтово секундат ды тон поладат од эрямот!


Категория: Мои статьи | Добавил: tati (26.11.2009)
Просмотров: 640 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz