ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Ольга Сусорева. Масторава

Масторава

 (Ёвтнема)

Кода паро эрзя моданть лангсо чилисеманть вастомс! Седеть а пешкеди  мазый артовксстонть, сельметне а содыть, кода кецямс. Ансяк тевтне велесэ а учить. Чилисеманть марто ушодови од чи, од кемема, од эрямо.

Скалтнэнь ды реветнень шалтост марто Иваж течи стяськак. Ансяк кенерсь ловсонь симеме, кепень пильгть ношкстась ушов, тосо летьке жы экше тикшесь кутькась пильгечалговксонзо. Сон истя вечкиль тейнеме. Течи эряви теемс ламо тевть.

– Иваж, адя налксеме, – каятотсь пилезэнзэ.

Те истя сонзэ тердсть ялганзо. Покштнэ паксясо-вирьсэ важодить, эйкакштнэ налксить. Кода свал кармасть кекшнинесэ налксеме. Весе кенерсть кекшемс вирень сэрей чувтнэнь удалов, ансяк Иваж кодаяк эзь муе, тарка, косо кияк аволизе нее. Те курось а лади, тонась истя жо. Вана се покш кевенть удалов сэрьцек кекшеват, аваткак а мутанзат. Цёрынесь чийсь малазонзо, комась вакссозонзо. Учи, зярдо мусызь. А куш-а каш. Прок весе кулость. Таго учи. Кияк.  Ансяк ней Иваж редизе, кевесь конань удало сон ашти… лексесь. Неявсь кода потсонзо чавсь седеезэ, ды лексемазояк коштсонть марявсь. Те вана тевть! Цёрынесь варштась удалов ды седеяк пек абунгадсь, маласонзо аштесть истят жо зярыя кевть, покшольть, умок аштемасост сынст вельтизе луганар. Ды сыньгак лексесть. Вейсэ. Иваж абунгадсь. Мелезэ ульнесь чиезь туемс тестэ. Вельть а ён тензэ теевсь. Ансяк пильгтне эзть кунсоло, чувтомсть. Тандадомадонть Иваж натой сельмензэяк конинзе. Зярдо панжинзе, кевенть таркас икелензэ аштесь мазыйдеяк мазый ава. Котова таразь сисем суронь панарсо, сырнень сюлгамось мештьсэнзэ налксесь чинть налонзо марто, кумбрядонзо сельметькак а саевить, прясонзо цецянь каштаз, кувака раужо черензэ моданть ланга сравтозельть. Эйстэнзэ марявсь потмо вий ды сэтьмечи. Сельмсэнзэ неявсь вандынь чинтень кемемась.

– Иля пеле эйстэм, Иваж. Сак малазом, – оймавтызе авась сэтьме, кеме вайгельсэ. Ды венстизе кедензэ. Цёрынесь абунгадсь:

– Косто содасак монь лемем?

– Мон весементь содаса. Мон – Масторонь кирди.

Те лементь ёвтамсто коштось лоткась лексемадо, шкась ёмась, модась соракадсь, менельксэсь бигерьгадсь. Масторавась аштесь цёрыненть икеле ды вансь лангозонзо. Иважонь пильгензэ теевсть нулакс. «Сонсь Масторавась икелем ашти, – те арсемась цёрыненть прясо кенерсь толокс кивчкадемс. – Мон эзинь кемтя сонзэ улемантень».

Авась те шакне сась овсе малазонзо. Лексемазояк марявсь, лембеськак эйстэнзэ. Иважонь судос каятотсь тикшень тантей чине, мейле модань соркстамонь.

– Варштак перть-пельга, – мерсь Масторавась. – Несак се паксянть.

Иваж варштась тов, козонь кедьсэ невтсь Масторонь кирдись:

– Вант ды мельсэть кирдик, цёрынем – те модась – тонь вандынь чить. Бути ванстови сон тонеть – ванстови эсь пряткак. Сон тонь эрямот – лексемат… Маштындеряйть виеть – сак те таркантень. Онкстык сонзэ педе-пес ды чарькодят – вана косо тонь ойметь, вана косо лавсеть. Бути  эряви тюремс кисэнзэ, маштыть душмантнэнь, бути эряви андомс роднят-раськеть – сокик ды изык сонзэ. Вачодо  а кадтанзат. Ванстык сонзэ толдо, апародо, зыяндо-берянде. А ванстовиндеряй – чить-пазот стувтсак, ёнксоткак а муеви, леметькак а кадови масторонть лангсо. Илить стувто валлон, саить сынст превс. Лиятнененьгак пачтить.

Авась прядынзе валонзо. Перть-пельксэсь зэльть эзь мере, прок учось масторонь кридицянть валтнэнь поладоманть. Иваж таймазкадсь, сон вишка урыне ладсо энгамсь, пельсь лекстямскак, кедензэяк сыргставтомс. Кургонь автезь вансь мазыйчинть лангс. Масторавась варштась цёрыненть сельмс, прок весе оймензэ тосто неизе. Ды аламонь-аламонь кармась соламо. Цёрынесь парсте эзь чарькодтяк, солась эли тикшекс-модакс велявтсь. Прок мезеяк арасельгак, кияк эзь кортаяк. Ансяк пилесэнзэ Мастораванть валонзо кшникс арасть. Иваж напустясь кудов. Пильгензэ ало модаськак  эзь маряво. Кодаяк кудов. Ёвтамс марязденть аванстэнь. Чийсь киланга, мейле паксянь-паксянь трокс, мейле… Иваж апак учо лоткась. Арсезевсь. Сон чии моданть ланга, конань эряви ванстомс. Цёрынесь ландясь, сайсь коморозонзо мода паморькске ды ледсть тензэ Мастораванть валонзо: «Сон тонь эрямот, лексемат».

«Мон чиян эсь эрямонть ланга», – арсезевсь пачканзо Иваж. Кодаяк кудов. Вармась керясь пилензэ, тикшесь тапась цёрыненть пильгензэ. Эряви пачкодемс ды ёврамс Мастораванть валонзо.

– Авай! Авай! – серьгедсь цёрынесь, зярдо неизе аванзо паксясо важодемстэ. – Авай, мон  неия Мастораванть.

Авазо кепедизе прянзо.

– Сон кортась мартом, – эзь лоткаво Иваж.

– Масторавась кортась? – эзь кеме авась.

– Сон.

– Иваж, паряк, те  тонеть неявсь?

– Арась, те ульнесь Масторавась. Сон монень мерсь ванстомс моданть. Бути ванстови сон – ванстови прянок.

Аванть кедьстэ стамбарнэ новольсь тарвазось. Чамаумарьганзо  цивтёрдозевсть кавто сельведень чудикерькст.

– Мезде, теде башка, мерсь теть Масторавась, Иваж?

– Мерсь, модась – те монь лексемам.

Авась комась цёрынензэ вельксс ды мерсь:

– Иваж, эряви Мастораванть кунсоломс. Сон минек  кирдицянок, превспутыцянок.

– Содан, авай, – мерсь цёрынесь, – ванстса. Ды коморонзо потсто невтсь модапаморькскенть. – Эсь вием а кадса.

Ды седеяк кеместэ лепштизе коморозонзо паморьксэнть.

Аванзо сельмстэ те шкастонть неявсь вандынь чинтень кемемась, Мастораванть кемемась…



Категория: Мои статьи | Добавил: tati (27.11.2009)
Просмотров: 644 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz