ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Ольга Сусорева. Анге

Анге

(Ёвтнема)

Элювань сельведензэ чудсть апак визде чамаумарьга. Эзть лоткавтово мейсэяк. Мештенть лепштясть. «Ансяк аволимим нее кияк», – арсесь эсь пачканзо авась. Сон аштесь комадо тувонь кардонть куншкасо. Лиясо а косо тензэ ульнесь седеензэ чамдомс. Пельсь несызь – кортамот кармить. Ёзась-нардтнесь чудикерькстнэнь панаронзо куншкасо.

Кавто иеть кармить, кода Элювань чиявтызь Виряйнень. Элювань авазо эзь сода, кода кецямскак. Семиясонть ульнесть сисем эйкакшт – Элюва веженцесь. Виряень семиясь сюпав, покш. Истямо уцяска тейтеренть туртов прась. Сельгень прамс Элювань  чиявтызь. Вай, стака ней авантень лия семиясо. Ававтонть-атявтонть мелест кодаяк а ванновить. Те аволь истя, тонась  лиякс эряви теемс. Сех пек эзизе вечке Элюва ававтонть. Варштадовксонзояк пельсь, прок уро пупи  эйсэть, сэвезь-сэви. Чалгавксозояк стакаль, валозояк. А весть урьвась авардиль эйстэнзэ. Ойменть панжомс а кинень. Мирдесь чинь-чоп паксясо, тиринь авась васоло, а чият. Сави тувонь кардонть куншкасо шождалгавтомс ойменть.

Ансяк аволь те тувталось керясь аванть потмонзо – кавто иеть кодаяк эзь чачтово эйкакш. А чачтовиця ава – аволь ава, пракста. Ковгак а маштови. Ававтось умок кортамот ветясь тень коряс цёранзо марто:

– Элювань пекезэ кодаяк а касы,  – путнесь валонзо. – Истя седе тов… од ни сави саемс…

Виряй чатьмонсь. Сон эзь вечке стяконь валт ёртнемс коштонтень.

– Куринкань песэ Ташто Инжаень тейтерезэ  Ашава – мазыйгак, ёроковгак. Тонеть лади.

Виряй каштмольсь.

Элюва чарькодсь, мирдезэ кувать чатьмонеме а карми. Зярдояк валозо керясы коштонть. Ков сестэ тейтересь моли, ков туи? Авазо мекев кудов а примасы. Ававтось паневтьсы тестэ. Лиякс ванозь, Виряень ёжоськак чарькодеви: эйкакшот арасть – родонь-племань поладыцят арасть, трицякак арась.

Элюва свал нейсь онстонзо эйде. Сон вишкине кедьнесэнзэ тердсь аванть ды ков-бути ёматыль. Мезть ансяк Элюва эзть тейне – минень-сюнонь тикшеть симнесь, ознось Банявантеньгак, Ведявантеньгак. Лезэсь арасель, прок кияк эйсэнзэ эзь маря.

Весть Элюва неизе, кода ававтось мезть-бути  салава тошкась Ташто Инжаень марто. Элювань сельведензэ таго сыргозсть. Сельмтне мезеяк эзть нее, пьльгалонзо модаськак марявомадо лоткась. Авась пельсь сехте беряненть. Ды берянесь сась.

Се чистэнть Элюва стясь ранаяк. Кенерсь каштомонть уштомо, пидеме-панеме. Ансяк кенерсь редямо – мирдесь течи мекс-бути беряньстэ ярсась. Секе тев варштнесь лангозонзо. Аванть кедьстэ чакш пацясь новольсь масторов. Сон снартнесь оймавтомс эсь прянть, ансяк Виряень сялгавтозь сельмтне эзть тукшно прясто. Мирдесь яла чатьмонсь. Яла вансь. Неявсь – валт кочкси. Пурьгинесь зэрьксты. Ававтось каштмолезевсь стуворонть экшсэ. Турватне мизолдсть.

– Ильтямак монь, – окойники мерсь Виряй Элювань лангс ванозь.

Авась сурекс лиссь мирденть мельга.

– Вана мезе, – мерсь Виряй, зярдо  пачкодсь ортатнень вакс. – Бути иень прядомс а чачтат тень цёра, саян лия ни. 

Чись ковонть марто ёматотсть Элюванень. Модась тапавсь менеленть марто. Ятнэнь налтнэ мештенть а истя пицить, кода ней мирденть валтнэ скирдасть аванть оймензэ. Пингесь олась…

Элюва вийтеме новольсь масторов…

Эйкакштомо ава – кулозь ава…

 

Элюва кудосонть эзь аштеве. Салава чийсь тиринь аванстэнь. Тонась неизе тейтерензэ – тандадсь. Вейсэ арсесть молемс содыця  бабанень, конась эрясь вирь куншкасо. Кортыльть, келя сон сеске редиль – чачтови-арась  авась. Сельмензэ пштить, моданть пачкак неи. Аволь вейкинень лездыль. Элюваненьте бабась − меельце кемемазо.

… Бабинесь кувать вансь Элюва лангс, штюпсесь пексэнзэ. Окойники мерсь:

– Эйкакшот а кармить. Тейтерьксчистэ мезе-бути тандавтынзеть.

Элюва ледстизе, кода весть мельганзо чийсь овто левкске вирьсэ. Тейтерькась тандадсь истя, мик  кеднек-пильгенек сорнось.

– Вергава, паряк мезеяк теемс эряви,  – энялдозевсь Элювань авазо.

– А лездаван тенк мейсэяк…

 

Элюванень лиядсь эрямс ие. Бути Виряй саи лия ни, сонензэ мирденть вакссо а мезть тейнемс. Ломанькскак а путтадызь. Бути ней эрямозо стака, мезе седе тов карми? Кода лиясто сявадыльть сельмензэ лия эйкакшонь лангс ванозь. Лиянь улить, мекс сонзэ арасть? Мекс Пазтнэ сонзэ а марить?

Элюванень мезеяк эзь лиядо… Вийтнеяк арасельть… Сон пачкодсь  сэрей лей чирентень. Варштась алов, авакай, ваномстояк пелезеват. Сон варштась чинть ёнов:

– Покштят-бабат, Нишкепаз, нолдынк чумом. Вием арасть.

Меельцеде варштась тиринь масторонть лангс ды чопавтсь кельме ведентень…

 

Элюва марясь – кие-бути эйсэнзэ токши. Кедте саизе. Косто-бути токась лембе. Те лембесь кармавтсь стямс, панжомс сельмтнень. Аванть киргапарезэ коськсь. Вайгелесь арасель. Рунгось «зыйк» тейнесь. Зярдо жо сон панжинзе сельмензэ икелензэ аштесь сыредеяк-сыре баба. Чамазо сормсевезь,  сельмезэнзэ, мерят, весе менелесь кельгсь. Раужо пацясо, раужо панарсо. Сон кеместэ кирдсь Элювань кедензэ. Ней ансяк авась чарькодсь, косто мольсь те лембесь.

Элюва снартнесь ледстямс, кода сон тезэнь понгсь. Меельцекс  мельсэнзэ ашти ведень кельмесь ды чоподась.

– Кода ёжот? – кевкстсь бабинесь истя, прок вайгельсэнзэ сядо нудейть седясть.

Элюва абунгадозь  вансь бабанть лангс. Авась вестькак сонзэ эзизе некшне: сыре ломанесь ульнесь раужо оршамосо. Истямо коцт Элюва эзь сода. Бабанть эйстэ качадсь медень ламбамо чине.

– Иля пеле эйстэнь, – оймавтсь аванть а содавикс сыцясь. – Берянь теть а теян. Вана брагась, симть, кирьгапаретькак коськсь ванса.

Элюва седеяк абунгадсь – бабась, прок  арсеманзо ловнось.

– Тон кие? – кевкстсь авась.

– Мон аволь тескень. Иля  пеле эйстэнь. Содаса тонь сэредьксэть. Аволь паро эрямодонть леень чирестэ ёртневить.

–Сэредьксэм, сырькай, покш, а кандтневи. Модас лепшти.

– Тон аволик кандтне потсот, ёртовлик, шождалгадовлить.

– Кода ёртса, кода? Пря потсом ансяк бизнэсь «а чачтават». Онстомгак эйкакшт некшнинь. Пазтнэнэньгак ознынь, кияк эзь маря эйсэнь.

Бабанть сельмензэ кирвазсть.

– Пазтнэ весемеде содыть. Весементь неить. Ёжоткак марясызь. Озноматкак несызь. Ломатне тонадсть, весе сыненст эряви нейке ды седе ламо. Истя а эрси. Учомо а маштыть, стака маряви. Пазтнэ тондеть вадрясто содыть, мезе теть эряви. Ансяк илить сынст стувтне. Весе масторось сынст кувалма ашти.

– Нолдык чумом, сырькай, а содан мезть кортан, – энялдозевсь Элюва. Сонензэ теевсь а ён. Марясь прянзо чумокс те бабиненть икеле, конастонть мольсь та-кодамо валдо. – Эзинь сода, мезе тень теемс.

– Ёмавтомс прят, тейтерем, свал кенерят. Вана эрямс лиясто омбоцеде  паряк кияк а мери. Иля пеле теемс ильведевкст – сынь свал витевить, бути мелеть ули. Иля капша туемс те масторонть лангсто, зярс тон киненьгак эзить максо эрямо.

– Теньсэ тевеськак, сырькай,  – эзь кирдеве Элюва, – а чачтован, мерсть монень.

– Иля киньгак кунсоло, Элюва. Тон чачтат цёрыне мирдеть туртов иень ютазь.

Бабиненть сельмензэ ёндолкс кивчкадсть, прок ведесь велявтовсь.

– Стяк нейке ды азё кудов. Тосо тонь Виряй учи.

        – Косто тон содат?

 – Мон весемеде содан. Саик мартот те браганть. Кись а нурькине – маштови.

Неть валтнэнь марто  бабась стясь ды туиксэль. Элюванень ней сон марявсь аволь истямо сырекскак. Натой мазыекс. Авантень таго а ён теевсь. Сон ансяк ней чарькодсь мезе мартонзо лиссь: кода лисевсь ведьпотстонть? Кода понгсь те бабиненть икелев? Кода куш лемезэ?

– Кода леметь, сырькай? – кенерсь кевкстеме Элюва.

 Бабась лотказевсь, прок арасесь мезе ёвтамс:

– Анге лемем. Анге патяй.

Ды чамазо валдомгадсь, сормсевкстнэ нардавсть. Раужо  оршамотне артовсть ашосо. Пильгсэнзэ неявсть сырнень карнеть, конянзо ланга  валдо чись лиси, черензэ пева ковось тештетнень марто цивтёрдыть.

– Иля стувто, мезде кортынь, –  сельмсэнзэ неявсь менелень певтемась.

Элювань келезэяк кундатотсь. Анге патясь, сонсь Ангесь икелензэ ашти. Весе пазтнэнь аваст кирдсь Элювань кедте. Вана, мекс эйстэнзэ мольсь истямо валдо. Кортыть, келя Ангесь эри менель лангсо, тосо сонзэ ули кудынезэ, конастонть сон лиясто пиземетнень, ловонть марто валы эрямонть моданть-масторонть лангс.

Элюва эзизе редя, кода весе перть-пельксэсь каштмолезевсь, кунсолось ванькс ды  морыця Анге Пазонть вайгельсэнзэ. Нармушкатнеяк натой визделгадсть, чатьмонсть. Пиже касовксоськак  нолдызе прянзо Ангень мазычинть икеле. Менелесь кутмордызе Нишке пазонть нинзэ. Молеме кармась – модась пильге алонзо мендяви, кевлангс чалгась – лангозонзо Пазонть пильгечалгавксозо лияды. Паксява карми ютамо – ансяк сулеезэ редяви.

Элюва ансяк ней редизе кедьстэнзэ  Анге патянь казнензэ –  браганть.  Ледстявсь авантень сонзэ меельце валтнэ: «Иень ютазь чачтат цёрыне». Бути сонсь Ангесь мерсь,  истя улияк…



Категория: Мои статьи | Добавил: tati (27.11.2009)
Просмотров: 760 | Комментарии: 1 | Рейтинг: 5.0/4 |
Всего комментариев: 1
1  
Парсте евксось сермадозь, мелезынь тусь эрзянь келесь конасонть сермады Ольга +10

Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz