ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Маризь Кемаль. Мезе те Инечись?

Мезе те Инечись?

 

Эрьва раськенть улить покшчинзэ. Сынь тешкставить ламо-ламо пингень перть, секс ломантне содасызь, кодамо покшчись, зярдо сон эрси, кодамо смустезэ, ютавтомань коезэ. Тюркань раськетнень, содатано, эрсить сабантуест, курбан-байрамост, нардуканост, рузтнэнь — рождестват, пасхат, миколат, троицят, покровт, казанскойть ды сядот лият. Улить-арасть эрзянь покшчить? Те таркасонть, секень вант, ловныцясь мери: минекак роштоват, миколат, троицят, покровт ды седе тов. Ды ансяк пасханть таркас, паряк, ёвты Инечи. Тень пингстэ а арсияк: весе вере ёвтазь покшчитне — авопь эрзянь. Минек кезэрень пингень покштятнень ульнесть эсест покшчист. Кодат? Терявтано невтемест. Ушодтано тундосто. Весе содыть: Инечиде икеле эрси Эрьбань чи. Ней сонзэ ловить христианонь покшчикс, келя, те чистэнть Иисус совась Иерусалимс. Вана Евангелиясто саевкс: “Тонавтницянзо ветясть од осёл, озавтызь лангозонзо Иисусонь, ды сон поладызе кинзэ, кода сёрмадозель: “Иля пеле, Сиононь тейтерь! Те тонь Инязорот моли, од осёл лангсо аштезь”. Иисусонь мельга молиця ды учиця ломантне ацасть кинзэ ланга оршамост, кирдсть кедьсэст пальмань тарадт ды сеересть: “Осанна Давидэнь цёрантень! Чанстев улезэ Пазонь лемстэ сыцясь! Осанна верцетнесэ!” Зярдо Азорось совась Иерусалимс, весе ошось талнозевсь. “Кие те? Кевкстематнень каршо мельга молицятне кортасть: “Те Иисус, Галилеянь Назаретстэ пророкось”. Азорось совась кудозонзо, Пазонь xpaмс, конань микшницятне теизь злыдарень пизэкс. Азорось пансинзе храмсо микшницятнень ды рамсицятнень, пичксевтинзе сэредицятнень, визделгавтнинзе озатятнень ды книжниктнень ды лиссь”. Те саевксэнть ловномадо мейле чачи кевкстема: кона ёндо тесэ эрьбась, Эрьбань чись? Ды кона ёндояк! Эрьбань чись — те кезэрень финнэнь-угрань покшчи. Эрьбась ушоды панжовомо (цветямо), зярдо ушосонть лов, натой якшамояк, ансяк тесэ-тосо неявить солазь модапанкскеть. Сон ашназа, чевтине пупорькасонзо невти: сась Тундось, Мастораванть лангсо эрямось одов кармась вельмеме. Те одс чачомань, певтеме Эрямонь символ. Кезэрень пингене те чинть тешкстасть весе финнэнь-угрань раськетне, конат шканть молеманзо марто човорявсть славянтнэнь марто (мерятне, муроматне, мещератне). Те човорявксось улияк рузонь раськесь. Церковниктнэнень эзь лепштяво, эзь кардаво Эрьбань чись, ды сынь яволявтызь сонзэ христианонь покшчикс. Кода эрзятне тешкстыльть Эрьбань чинть, ловнок “Чилисемасто” (1994 иень 5 №).

Эрзятне, кода ламо тёжат иеде икелеяк, нейгак тешкстыть Инечи, аволь пасха. Мезе истямось “пасхась”? Евреень те валонть смустезэ — ютамо (переход). Те кезэрень еврейтнень историянь покшчист. Зярдо сынь оргодсть Египетстэ, савсь тенет ютамс Кулозь иневеденть трокс (Мёртвое море). Улънесь ведень потамо шка (omлuв), еврейтне ютавсть, лиссть тона чирентень — ушодовсь веденть мекев самозо (прилив).

Египетэнь ушмось, кона пансь мепьгаст, весе ваясь. Еврейтне тень ловизь Пазонь Лездамокс ды се шкастонть саезь свал тешкстыть пасханть—ютамонть. Ульнесь те тевесь Иисусонь чачомадо пек седе икепе, те покшчистэнть еврейтне панильть ламбамсто сюкорот, кодаткак артозь алт арасельть. Христианствась, кода секта, чачсь иудаизманть (евреень религиянть) потсо. Зярыя сядот иеде мейле христиантнэ, иудаизмадонть явомга, кармасть пасхантень путомо лия смусть: те, келя, кулозь Хрисосонть эрицятнень юткс одов ютамозо, лиякс меремс, вельмиямозо. Артозь алтнэ, келя, тусть Мария Магдалинасто, кона сась Тиберий римень императоронтень, казнекс венстясь тензэ ашо ал ды мерсь:

“Христос вельмесь!” Императорось мерсь: кулозень вельмемас кемемс истя жо стака, кода стака кемемс — те ашо алось якстерьгады. Зярс сон тень кортась, алось, келя, кармась якстердеме, тюсозо чополгадсь ды теевсь тусто-якстерекс. Тестэ, келя, тустькак артозь алтнэ. Неть “келятнень” кемсынзе бути ансяк 4—5 иесэ эйкакш. Алкукс тевесь ашти тунь лиякс.

Инечись сюлмазь Инешкипазонть (Чипазонть) — Модамасторонть теицянзо марто. Финнтнэнь-угратнень арсемаст коряс, Инешкипазось Мастораванть (Моданть) теизе ведьнармунень алонь формасо ды артызе-мазылгавтызе сонзэ. А стяко эрзянь фольклорсо истя сеедьстэ вастневи Иненармунень чачось! Секс Инечись эрзятнень туртов аволь “пасха”. Инечись — Модамасторонь Чачома Чи (День Сотворения Земли), сонзэ тешкстамс артыть-мазылгавтыть алт — Модамасторонь символ. Кона варштавксось седе домка, превей ды мазый, арседе тынсь. Лия раськень историянь ды культурань содамось — тевесь вадря, эсетенть асодамось улемаль визьксчамакс.

 

МАРИЗЬ Кемаль

Категория: Мои статьи | Добавил: tati (05.11.2009)
Просмотров: 1311 | Рейтинг: 2.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz