ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Лежиков Алексей Лукьянович. НУРДЖАНОНЬ КЕНЯРКСОЗО

НУРДЖАНОНЬ   КЕНЯРКСОЗО


 

Душмантнэнь кедьстэ кишлакось нельгезель декабрянь 31-це чистэ, ашолгадома ланга. Афганонь регулярной армиянь отрядонть марто минектне вейсэндязь вейсэ апак учо каявсть кишлаконь мечетенть перька пуромозь душмантнэнь лангс ды пулемётонь виев тол вельде потавтызь сынст маласо аштиця пандтнэнь пелев.

Зярдо леднемась оймась, эрицятне васня пелезь, мейле седе веркасто кармасть лиснеме кудотнень экшстэ. Вишкинетне озязкекс керьксавсть дувалтнэнь прява ды тосто вансть идицяст, лиякс меремс, минек солдаттнэнь лангс. Раужо принеть, берякшкеть, кой-конатне умок апак шлякшно, ламотнень сельмсэ тандадома.

Илядо пеле, минь а токатадызь, — серьгедсь пакшатнень пелев Зарубин сержантось.

Минь пельтяно, душмантнэ илязт велявто,  — марятотсь дувалстонть рузонь кельсэ вишка тейтернень вайгель.

Тон косто келенек содасак? Кода леметь? — мельспаросо кевкстизе Зарубин раужо сельме мазыйканть.

Тейтернесь ёвтнизе: келя, тетянзо-аванзо марто колмо иеть эрясть Ташкентсэ, рузонь келенть тосонь школасо тонавтнизе. Мелят тетянзо маштызь душмантнэ, ней эри аванзо марто. Ёвтызе лемензэяк — Нурджан. Мейле кевкстсь:

А тынь течи куз мазылгавтадо? Эдь Од иесь сы.

Эно кода,  нама,  наряжатано,  — кувать апак арсе мерсь Зарубин ды поладсь: — Сак чокшне мечетенть ваксос, сон тосо улияк.   Пурныть   кишлаконь   весе   пакшатнень,   муаллиментькак тердик.

Сатано! — марявсь кенярксов вайгель.

 

*   *   *

— Капитан ялгай, — пшкадсь Зарубин отрядонь командирэнтень, зярдо сынь келемтизь палаткаст кишлаконь куринкасо ды сыргасть оймсеме, — куз пароль бу наряжамс Од иенть вастомга. Тесэнь эрицятнень марто ялгакс теевемантеньгак бу те лездаволь. — Ды ёвтнизе Нурджан марто кортнеманзо.

Мезе,  сержант  ялгай,  тевесь вадря.  Ды  вана  косто  куз саемс?  Тынсь несынк:  пертьпельга сонзэ ёнов молиця вейкеяк чувто арась,  ансяк саксаул,  тамариск ды лият  мезть.  Кузонть наряжамскак, монь койсэ, улевель а мейсэ.

Капитан  ялгай,   оно  пандочамасонть  вирь  неяви,   паряк, тосто кузгак муеви.  Мазылгавтомс  мусынек мейсэ,  те тевенть мон уш арсия.  Ялгаткак эстень муинь,  оно Тохтаев  рядовоесь, сон  тесэнь  келенть содасы, ды  Сурайкин  ефрейторось. Мереде тенек молемс куз мельга, мон  эдь алтынь Нурджаннэнь...

Ну, бути истя, сестэ азёдо. Ансяк ужока... Гулам! — серьгедизе капитанось афганецтнэнь командирэст,    — кучта эсетнестэ ветешка боецт минектнень марто. Ули вадря арсема: течи Од иенть вастомс кишлаконь эрицятнень марто вейсэ. Кадык несызь, минь  аволь  душмантнэнь  кондятано,   ялгаксчиде  башка  мезеяк берянь   тенст а кандтано. Автоматонк ансяк илинк стувто саемс, ки содасы,  кинь тосто вастсынк.

 

*   *   *

Ве ёндо ванозь, маласо пандочамантень, косто неявсь виресь, кевде пешксе сёвонев паксяванть эрявсь эскелямс кавтошка част. Телень пиземетнеде сёвонесь теевсь тюжа чапаксокс, кона теке кечказ кундсесь кемтнень, эзь максо эрязасто эскелямс.

Помнятадо,   сержант   ялгай,   кода   минсь  мартсто   якинек афганецтнэнь Од иест  —  Навруз  байрамонть  —  вастомо?  Оно кода весёлаль! Сехте пек тусь мелезэнь чуди ведьга палыця олгонь нолдтнемась. Минек Мордовиясояк Од иень вестэ олгт пултыть, ансяк аволь ведь лангсо — куринка куншкасо эли велеушосо кирвазтьсызь,   од  ломантне   кирнявтнить   толпандянть   велькска,   — ёвтнесь Сурайкин.

Хм,   минек  Рязаньсэ   истя   жо   тейнекшнить,   —   каршо пшкадсь Зарубин.

А минек... — ансяк мериксэль Тохтаев, кода — зый-ы-ый! —виренть пельде каятотсь ледема, тра-та-та! — сеске поладызе автоматонь очередесь.

Нейке икелев! Маласо чувтынетнень экшс! — пижакадсь Зарубин, ды ялгатне, афганецтнэнь марто вейсэ, кува чиезь, кува пекекиське лангсо каявсть вирентень.

Пачкодсть весе. Чиемстэ Зарубинэнь касканзо пелизе душманонь пуля, сон ёртовсь прястонзо ды ней нурьгсь кутьмерьсэнзэ ведьме вельде. Прамсто верьс тапизе сержантонть пря боканзо. Омбоце пулясь сезизе Тохтаевень вить кемензэ, пильгстэнзэ чудсь верь. Тапазельть кавто афганецтнэяк. Паро, вирьчиресэнть понгсь идем кевсэ пирявт лушмине, козонь пулятне эзть тока.

Ней мезе? — оймензэ таргамодо мейле кевкстсь Зарубин. — Сави мекев велявтомс, кие содасы, зяро тосо душмантнэде.

А кузось? — пшкадсь Сурайкин.

Кузось, кузось... — ацирьгадсь Зарубин. — Керятано оно саксаул, ды паро.

Се уш а тев. Ванодо, сержант ялгай, кодамо мазый чувтось!  Весемезэ кеменьшка метрат эйзэнзэ.  Мереде тень, молян керяса, — кирвазсь Сурайкин.

Ва, мон теть керяса! Бульчом, те аволь кузгак, несак чей, кипарис. Сон Од иень чувтокс а моли.

А кода эно Нурждан, ялгаксчись? Мерить, манинек, седе тов а кармить тенек кемеме. Мереде  тень,  сержант ялгай,  эдь латкось моли малав чувтонть малас. Мон эзганзо уезь ладсо...

Валот видеть, Сурайкин. Азе. Прят ансяк ванстак, панжадо таркас иля эце.

 

*   *   *

 

Душмантнэ редизь Сурайкинэнь сестэ, зярдо кипарисэнтень кадовкшность весемезэ колмошка метрат. Виренть потсто верьгедсь виев тол. Минектне леднесть каршо, ансяк душмантнэнь таркаст ульнесь седе ён, сынь кекшнесть вирень кевтнень экшс ды тосто валность пертьпельксэнть куломань кандыця кивесэ.

Сурайкин редизе: пулятне ливтнить прянзо велькска ды сонзэ эйс а токить. Ансяк кода керямс чувтонть, эдь сестэ эрявить кепедемс кедтне, конат, секень вант, а менить пулятнестэ. Вана чувтоськак. Кодамо тантей чинезэ, мазый тюсозо, теке од тейтерень оршамо: тусто ды сэншть-пижела. Вейке пулясь цёхадизе чувтонть самай се видьга, кува эряволь керямс. Лисни, таркась ледневи пачк. А кенерят кедеть кепедеме, кода цёхадьсызь. Ней мезе теемс?

Арсемстэ Сурайкинэнь мельс ледсть Нурджанонь аволь пакшакс нусманя сельмензэ. Ледстизе сеньгак, кода сонсь кавто-колмо иеде теде икеле школасо киштнесь-морсесь Од иень кузонть перька. Сестэ мартонзо ульнесь Тоня, Нурджанонь кондямо раужо сельме вечкевиксэзэ. Кода сияждсть-палсть Тонянь сельмензэ!

«Кадык Нурджанонсетнеяк истя палыть куш вейке чи!» — мерсь эстензэ Сурайкин ды мартонзо кандовт ножовканть венстизе чувтонтень.

Вжик-шик, вжик-шик эрязасто пилясь. «Нать, эзимизь редя», — кивчкадсь алянть прява арсемась.

Вана ножовкась ютась чувтонть пачк, ды кипарисэнть тёкшозо чирькась ве пелев. Те шкастонть Сурайкинэнь вить кедьлапушказо теке пицевсь. Ожазо сеске артовсь верьсэ, пшти сэредькстэнть цёрась натой вайкставсь. Ялатеке кавксть ноцковтызе кедьёнксонть, ды чувтось прась. Сурайкин теке онстонзо кармась ускомо сонзэ лушмованть ялгатнень пелев, мейле, нать, ламо верень ёмавтомадо, маштсь ёжозо.

 

***

Чокшне мечетенть ваксос пуромсть кишлаконь весе эрицятне. Тесэ эйсэст учось наряжазь кипарисэсь, конань прязо налкшкетнень таркас мазылгавтозель погонсто тештинесэ, ташто гильзасо, минек масторонь конфеткасо. Кой-кува нурьгсть цитниця лампочкат, конатнень валдомтсь чувтонть алов кекшезь БТР-нь аккумуляторось.

Истямо мазычись курок малавгавтынзе, теинзе ялгакс минек солдаттнэнь кишлаконь эрицятнень марто, ютковаст тусть сур вельде кортнемат, карадо-каршонь мизолдомат. Сурайкин, тапарязь вить кедензэ мештезэнзэ лепштязь, аштесь чувтонть маласо тензэ аравтозь эзементь лангсо ды мельспаросо вансь ломантнень лангс. Ютксост ульнесь Нурджангак. Сурайкинэнь ёжозо седеяк вадрялгадсь, зярдо тейтерненть сельмстэ несь истят жо кенярксов сульть, кодат эрсекшнесть Од иень чокшнетнестэ вечкевикс Тонянзо сельмсэ.



 

Категория: Мои статьи | Добавил: tati (30.03.2010)
Просмотров: 448 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz