ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Лежиков Алексей Лукьянович. АВАНЬКС ОРМА

АВАНЬКС   ОРМА


Мелезэнь ледни се, кода велень шабранок парынестэ парявтнизе тензэ а содавикс ломаненть ансяк сень кис, мекс тона «Сёма покштяй» пшкадемантъ таркас серьгедсь  «Шёма дедай!». Атясь эзь сода ломаненть пелькелекс улемадонзо, кона свал с-нть таркас ш-нть ёвтылизе: шёвонь, шёкш, шапонь…Секс «Шёма» пшкадеманть покштясь ловизе покордамокс ды ломаненть, ловт, а мезень кис калгизе. Эрь, тенень седе тов велявтано, васня эсенъ эйстэ ёвтнян.

1988-це иень ноябрянь кемгавтовоце чистэ Шемешеенъ «Заветы Ильича» районкась кельгстизе тосонь тарка лемтнеде монь сёрмадовксом. Эйсэнзэ ёвтнинь Няньгакс лемдезь лейнедентькак. Захаркина велентъ малава, сонзэ трокс, юты Пензасто Шемешеев кись. А эрзянь, а рузонь кельтнесэ леентъ лемензэ туртов смустень панжома эзинь муе, ялатеке арсинь-лапаксынь кувалманзо...

Шкань ютазь понгинь Захаркинанть каршо пандочамасонтъ сравтовозь эрзянь апокш велинес. Лемезэ Янгопря. Кевкстинь тосонсетнень, мекс велест лемезэ истямо, косто сон саевсь? Ёвтызь, келя, тестэ Янго леесъ ушодови, секс Янгокс лемдезель сон куш мазя ды теинька, перьканзо модатнень янгазь янги, порезь пори. Шемешеень кинть томбале, ловт, сон сеске пры корьмай Сурас. Кортан, натъ, секс картасонть лейнесь Няньгакс лемдезь!

Эрь, эзинь ильведеве, тевесь истя аштияк.

Теке мазысь Эрьмеёв веленек куншкава чудиця Эрзя леенть мартояк: Пенза ёнксонь картатнесэ сон лемдезь Армиёвкакс. Мезеяк а мерян, бути рузтнэнь, печказтнэнь, ветькетнень туртов стака ёвтамс минек эрзянь тарка лемтнень, кадык эно ёвтасызь эсест ладсо. Ансяк картат­несэ, документтнэсэ, китнень кувалт сёрмадовкстнэсэ тарка лемтне эрявить сёрмалемс истя, кода сынь гайгить тосонь эрицятнень кельсэяк, лиякс меремс, кода сынь лемдезельть васенцекс.

Кодамо теньстэ лезэсь? Мерян, лезэсь питнепевтеме. Сайсынек Няньга леенть лемензэ, кода сон тешкстазь картатнесэ. Карминдеряй юронзо вешнеме эрзянь кельс а чарькодиця ломань, сон васняяк эшкеви рузонь «нянька» валонтень ды тестэ ушодыяк «киштеме». Теде марязь, шовинисттнэ сэньшкадомас кармить пижнеме леенть лемензэ кувалт: «Искони руськей». Теке мельга поладыть: «А вас, мордвов, здеся фапче никада не стояло!» Эно, эно, минь истямонтень умок тонадынек. Секс сеедьстэ историясонть лиснить кенгелемат, мезесь шкань ютазь, велявты теке алкуксонь тевекс. Истят кенгелематнень а нолдамга Эрзянь келень идема фондось секе тев кепси вайгелензэ тарка лемтнень кавто кельсэ сёрмадомадост. Секе улезэ лавкатнень, учреждениятнень ды организациятнень лемест мартояк. А кода минь тейнетяно? Ванстовить-арась тенек покштянок-бабанок пельде казевть тиринь тарка лемтне? Паряк, ансяк кой-конатне. Ды покш пиштемаяк тень кувалма а марятано. А сон, ков чи, тов седеяк ёмболдозь ёмить эрзякс ёвтазь лейтнень, виртнень, велетнень алкуксонь лемест. Теке тундонь ловокс солыть. Мерят, лангаст ювнозь юты аванькс орма.

Эно, минек масторсо ламо мезе эрси-лисни. Вана истямоскак пачколетяно. Марсинь куля: Мордовиясо вейке эрзянь велесэ тонавтницятнень тетяст-аваст кучность МР-нь минобразованияв сёрма, косо сельведь марто энялдсть... пакшаст туртов школасост эрзянь келенть а тонавтомадо. Кевкстнян, неть ломантнень пазост ули?! Содазь, Пазось весень туртов вейке. Явовксось оно мейсэ сон Христосонь, Мухаммедэнь, Моисеень ды сынст кондят лия пророктнень вельде мода-масторонтень нолдась христианства, ислам, иудаизма ды пазнэнь кемемань лия лувт (религият). Весе сынь тердить ло­мантнень Верепазонтень кемеме.

Ней кунсолодо! Христианонь Священной писаниясь пачти тенек Верепазонть истят валонзо: «Сак монень, пшкадть тень эсеть кельсэ мон марятан ды чарькодтян». Мезе, ледстязь сёрманть сёрмадыцянзо совасть пежетьс, колызь Верепазонть тиринь кельдест те кармавтоманзо? Лисни истя, покштянзо покордамонть кис нерь ланга, Пазонть тонавтоманзо лангс апак вано тиринь келенть пакшатнень кедьстэ нельгеманзо кис мезеяк?.. Мезекс сестэ истя тейницятне якить церьковав? Велень репештянть вакска ютамсто кинень седеень таймазкадозь сюконякшныть?

Тынк эйсэ кевкстнян, ЭРЗЯНЬ ЛОМАНТЬ!

 

Алексей Лежиков, Москов ош

 

 

Категория: Мои статьи | Добавил: tati (04.04.2010)
Просмотров: 847 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz