ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Кузьма Абрамов. Вастнемат. 1

Вастнемат


1

Мезе ули седе паро, ледстнематнеде башка? Монь койсэ, арась мезеяк. Ломанесь вейкетьстэ ледстни ютазь вадрянтькак, берянентькак. Ютазесь весе маряви вадрякс. Зярдо ванат мезентькак лангс ве пельде, сон теть неяви мазыекс. Истя тесэяк. Мон ёвтавлинь седе ламо. Се, мезесь ульнесь умок, мезесь кадовсь эрямо кинтень васов удалов, теевсь ломаненть пельксэкс ды а явови эйстэнзэ зярдояк, мейсэяк. Лиясто се улезесь маряви теть онокс, ды а содасак — онстот ульнесь эли алкукс чисэ.

Сайсынек вастнематнень. Эрьва од вастомась канды ломанентень од кеняркс, покш уцяска. Эрямосонть эрсить истят вастневемат, конат марявить теть амадиця толокс. Сынь свал валдомтыть эрямонть. Ледстнемс эрямонь неть валдо таркатнень — евтаса омбоцеде — мезе ули седе паро?!

Васень вастомась ульнесь кизна, омбоцесь... Мейс капшамс? Седе паро, ёвтнемс неть вастнематнеде вейке омбоце мельга, сестэ эрьвась ары эсь тарказонзо.

Оймсема чистэ сеедьстэ мон каднылия пулев ды качамов ошонть, туилинь вирев эли паксяв. Якилинь чиньберть. Зярс иля эря ошсо, кодамо паро ды мазый сон илязо уле, паксясь ды виресь ялатеке тердтядызь эстест. Ансяк сынст сэтьмесэнть оймави седеесь.

Истя ульнесь те сестэяк. Чись валгома лангсоль, зярдо мои сыргинь кудов, ошов. Ютынь лей чирень каль куротнень юткова ды валгинь ведентень, карминь ванномо седе алка тарка. Сэдентень молемс марявсь васов, арсинь ютамс веденть трокс. Леенть томбале, васоло пандо чамаванть, сравтовсь ошось. Тусто садтнэнь потсто якстердить жестьсэ вельтязь кудо прятне, валгиця чинть каршо кумболдыть ашо стенатне, каштом кургокс палыть вальматне. Ошонть велькссэ уи сэнь качамо пель. Чугункань кинь станциянть пельде кайсетить паровозонь вешкемат, паронь тыжнэма, стака лексема. Те весе ульнесь васоло, леенть томбале, пиже лайменть омбо песэ. Тесэ, леенть чирева касыця каль куротнень потмова, чоледить нармунть, куцясо касыця нартемкстнэнь потсто секе тев марявить пакся цирькунтнэнь пильсемаст. Монь кедьсэ ульнесть цецят. Кодак пачкодинь лей чирентень, цеця пусмонть каия ашо кевтнень лангс. Юкснинь ботинкам, илиштынь брюкан ды совинь ведентень. Сыргинь ютамо омбо ёнов. Куротнень потсто каятотсь вайгель:

     Цецянк стувтынк!

Мон лоткинь ды варштынь серьгедицянть пелев. Лембе ведесь чевтьстэ кутстясь ливезькадозь пильге сур ютктнень ды састынька нолаштсь пильгтнень ёжова. Зяро эзинь ванно каль куротнень юткова, киньгак костояк эзинь нее. Кадозь цецятне аштесть ашо кевнетнень лангсо ды мерят тердсть ваксозост. «Паряк, сынь серьгедстькак?» — арсезевинь мон ды мизолдозевинь.

Таго сыргинь молеме.

     Мейс кадыть цецятнень? — марязевсь секе вайгелесь.
Таго ушодынь ванномо. Таго кияк арась.

- Тонеть алтасынь! — серьгединь анеявиця ломанентень ды омбо ёнов пачкодемс вестькак эзинь варшта удалов.

Ведъстэнть лисемадо мейле нардтнинь начко пильгем ванькс чевте тикшентень ды карсинь. «Кие сеересь тень? Кинь ульнесь те чевте ды мазый вайгелесь?» — кевкстнинь эсь прям ды яла ваннынь леенть томбалев, конань ансяк кадыя. Учомс савсь а кувать. Вана явовсть каль куротне ды экшстэст лиссь од тейтерь. Оршазь сэнь платиясо, начко кувака прячерензэ сравтозь лавтовганзо. Сон снартнесь кодамост пулос ды вишнянь кондямо якстере турвасонзо кирдсь сэнь парсеень ленточка. Мои ванынь лангозонзо ды анок ульнинь ютамс ваксозонзо. Тейтересь кодызе черьбулонзо, мольсь цецятненень ды комась саемест.

     Вай кодат мазыйть ды вадрят! — мерсь сон теке марто.
Мон,  нама,  чарькодинь,  мекс  сон  аштесь  куротнень потсо, кекшезь. Самодон икеле экшелясь, неизе сыцянть ды совась оршнеме. Минь карминек кортамо леенть трокс.

- Мекс эзить лисе, зярдо ульнинь тона чиресэ?

Мейс эзимик учо?

Ды мон одовгак ютан!

Неть валтнэнь ёвтазь, мон коминь ды седе курок снартнинь ботинкам юкстнеме.

     Иля юта, ней мон а учотан, нейке туян! — серьгедсь тейтересь, никстинзе цецятнень ды састыне сыргась леенть чирева.

Сон меельцеде аволдась кедьсэ ды тусь капшазь. Куроксто каль куротнень юткова лыйнесь ансяк сэнь платиязо. Кувать ванынь туицянть мельга, семс, зярс сон эзь човоряво виренть ёндо сыцятнень марто. Мейле монгак сыргинь эсень киява. Чись кекшсь паксятнень томбалев. Ошонть велькссэ сэнь качамось ней чополгадсь, ды весе менелесь таргавсь потмура шаршавсо. Молемань перть арсинь те вастомадонть. Ошонть маласо сасымизь минек институтонь тонавтниця ялгам, вейсэндявинь мартост, кортазевинь ды аламос стувтыя од тейтеренть. Омбоце чистэ сон таго ледсь мелезэнь, ды мейле зярдояк эзь явно прястон, свал аштесь икелем — сэрей, кувака прячерь. Ламо чить ды ковт ютасть, зярс нардавсь превстэм те валдо мазый сулеесь.


Категория: Мои статьи | Добавил: tati (21.05.2010)
Просмотров: 500 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz