ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Кузьма Абрамов. ТЕЙТЕРЬ

ТЕЙТЕРЬ

 

Поездэсь мольсь састодояк састо. Сон лотксесь секе тев. Балашовсто саезь Пензас молемс весе кись ульнесь пешксе эшелондо. Мольсь война. Чилисема пелев усксть заводонь оборудованият, чивалгомав — войскат.

Минек вагонсонть тесналь ды якшамоль. Сон, улема, понгонесь бомбёжкас. Вальматнева суликатнень таркас тия-тува ладсезь фанерат, поволезь паця нулат, ве вальмась мик потомдазь олго сюворкссо. Фанератнень юткова лазкстнэва пуви варма, ливтить лов паморькскеть.

Купесэнть ойсезь аштинек сисемшканенек. Военнойтнеде минь Якушкин марто кавоненек. Лиятне: атят, ават, эйкакшт — ардыть войнанть эйстэ чилисема ёнов. Каршонок озадо аштесь од тейтерь. Иензэ, паряк, кемготовошка или кемзисемгешка — а седе ламо. Кувакине ловтаня чаманзо лангс оймась сыре ломанень сизема. Раужо покш сельмензэ нолдазь алов, ваныть, мерят, чаво таркас. Вить сельмечирькесь ашти аламодо кепедезь ды секе тев ноцковтневи. Ардомань перть мон  а весть снартнинь мартонзо кортамо. Сон  эзь варштаяк монь пелев, отвечась нурькинестэ ды амельсэ. Истя минь ардынек чи, ве, мейле таго чи. Пензась арасель маласояк, мерят ёмась, ёмась ловсо вельтязь нусманя паксятнень юткс. А мезть теемеде минь Якушкин марто а весть юкснинек солдатонь мешоконок ды порнинек кошкседе. Минек каршо тейтересь кадновсь аштеме икеле ладсо, сон вестькак эзизе калавтне элесэнзэ вишка сюлминенть. Якушкин снартнесь максомо тензэ кошксе, сон аволдась прясо, теке тандавтсь педиця карво. Омбоце чистэнть монь эзь кирдеве седеем, кортазевинь кежень сазь:

— Арась мелеть кортамс, чатьмонть, минь а кежиявттано. Ансяк вана мекс а ярсат? Тень кисэ уш простямизь: а кадтадызь. Ярсамс ломанентень эряви!

-        Эзь вачо пекем, — кармиксэль кортамо тейтересь.
Минь эзинек кадо кортамо седе тов. Тесэ муевсть лият
как, конат пшкадсть, ды сон окойники сайсь минек кедьстэ кши сускомо. Якушкин текень учось, седе курок панжизе консерва банканть ды путызе сюлмонзо лангс.

-        Кортнеме кенертяно мейлеяк, васня ярсак парынестэ, — мерсь сон пейдькшнезь ды поладсь: — Пензась ули а курок, паряк, вандыс а пачкодтяно.

Неть валтнэ тейтеренть, мерят, токизь седеензэ. Сон капшазь варштась минек пелев, турванзо лыказевсть шожда мизолдомас, чамаванзо нолаштсь валдо сулей ды ушодсь ярсамо. Ярсась а кувать. Сусксь вейке-кавто сускомо, састыне поринзе, колмоце сускомось лоткась кирьгапарезэнзэ. Покш сельмензэ друк пешкедсть сельведте. Сон лоткась ярсамодо ды кекшизе чаманзо. Те шкастонть мон максовлия весе эрямом сень кисэ, ансяк неть мазый од сельмтне улевельть коськть. Мон чарькодинь, сонензэ сась мель ёвтнемс эстедензэ. Састыне коминь эйзэнзэ, чевтьстэ токия лавтовс ды меринь:

     Ёвтнек, ёвтнек эсь мелявкстот, ули седе шождыне...
Тейтересь кортазевсь састо, апак капша. Купесэ аштицятне весе кунсолость каштмолезь. Сонзэ ёвтнемасонть минек туртов мезеяк арасель од, ды аволь ансяк минек туртов. Те ульнесь истямо жо тев, кодат ламо ульнесть войнань шка­стонть. Немецень самолётнэ веленть лангс ёртсть бомбат, ды вейке бомбась прась витьстэ сынст кудонтень.

     Зярдо мон сынь бомбоубежищасто, — ёвтнесь тейтересь, — минек вишка кудынесь ёртнезель чочконь-чочко... Кудосонть ульнесть тетям, авам ды ялакскем... Мон содан, сынь эзть кенере лисеме... Паряк, кенерсть?.. Паряк, сынь кекшсть козоньгак?.. Мон учинь кавто чить. Сынь костояк эзть са... Мон пелинь молеме кудо юртонтень... пелинь муемс сынст тосто... Мейле туинь чилисема ёнов... Паряк сынь живть?..  Паряк, монень а туемаль?.. Ялатеке, ней тосо немецть, мезе кармавлинь тееме...

Сон каштмолезевсь. Каштмольсть кунсолыцятнеяк. Те сэтьмесэнть марявсть, кода седе пек чавозевсть вагон ало чаротне, кода вешкезевсь вальманть томбале якшамо вармась.

Тейтеренть оймавтомга мон пшкадинь:

Тетят   ды   ават,    улема,    тандадсть   ды   козоньгак кекшсть.

Козоньгак эзть кекше! — капшазь мерсь тейтересь. - Ды кекшемскак а козонь. Велесэнек весемезэ вейке бомбоубежища, сынь эзть кенере тов молеме. Самолётнэ ливтясть апак фатя... Сынь эзть кенере кудосто лисеме...

Мон таго снартынь оймавтомонзо:

Кие соды, паряк, кенерсть. Мейле жо, зярдо састь ды неизь калавтозь кудонть, тонь ладсо тусть чилисема пеле;

Васня монськак арсинь истя, — таго кортазевсь тейте­ресь. — Минек ламот тукшность истя... Сынь авольть туемонстемень...

Седе паро а кортамс теде ды а арсемс, — мерсь Якушкин. — Зярдо прядови войнась, сестэ вансынек, кие кадовсь живстэ, кие ёмась. — Ней а эряви стякодо мелявтомс. Миненек эрявить ванстомс виесь ды нерватне...

Сон зярсыя кортась истямо ладсо, ды сонзэ вайгелесь аламонь-аламонь пансизе тейтеренть чамасто раужо сулеенть, а шкастонь сиземанть. Якушкин аштесь вальманть маласо, келей лавтовонзо новольсть. Эчке санов кедензэ путозельть кумажанзо лангс, умонь пуворькстнэ теевсть тюжакс, валдомсть, мерят невтить пачк. Неть кедтненень эряволь кирдемс плуг эли молотка. Сынь жо кадызь вечкевикс тевенть ды сайсть винтовка...

Поездэсь ала шаштсь ды шаштсь, састо, каштансто. Ловсо вельтязь паксятнень вельксс новольсь телень потмура чокшне. Вагонсонть теевсь чопода. Тейтересь ярсась ды матедевсь эйкакшонь сэтьме удомасо. Сон сявордизе стакалгадозь прянзо элесэнзэ сюлмонть лангс ды лексесь цють маравозь. Апак фатя матедевинь монгак. Сыргозинь поездэнь лоткамодонть. Вальманть тамбале неявсь пакся, чаво чопода пакся. Вагонганть ютась ильтицясь ды ёвтызе: тесэ сави аштемс валскес. Пензась а прими. Сеяк паро, минь Пензанть маласо. Вагонсо ломантне лыказевсть, кортазевсть, друк кепететсь шалнома, виде-паро базарсо. Сыргозсь тейтересь, лыкавтынзе якшамодонть лавтовонзо ды кирьмицявсь. Якушкин вальманть маласо пыхаесь цигаркань сятксо. Сон эшкизе пильгензэ алов цигарканть ды мерсь:

-Адядо удомо велев. Тесэ вандыс кельмат. — Алкукс, адядо! — пшкадсь каршонзо тейтересь.

Сындест эзинь кадово монгак. Умок эзинек некшне лембе кудо потмо, эзинек варштне пси ям ды чевте тарка. Минек марто муевсь таго вейке молиця. Се ломанесь Пензань ды содасы те тарканть. Минь лисинек кельме вагонстонть ды туинек паксянь-паксянь трокс. Ловось а пек сэреель, молемс ульнесь а стака. Икелепеле куроксто цитнезевсть толнэть. Минь валгинек лушмос ды совинек а покшке велес.

Кудосонть, косто вешинек удома тарка, вастымизь сыре ава. Минь весе тензэ маштовлинек эйдекс. Сон седс курок совавтымизь, кайсевтинзе оршамонок, кармась мелявтомо: а мейсэ каванямс.

-        Модарькат улить? — мерсь Якушкин. — Эрь, коли улить, пидек седе покш чугун. Ды иля стувто ливтемс салведне!

Гайгезевсь голландкась. Кудосонть теевсь лембе, валдо. Тесэ весемесь ульнесь се, мезесь сеедьстэ а сатны солдатонтень. Азоравась кортыцяль. Сон вайкстнесь ды укстнесь минек кисэ, жалясь тейтеренть. Каштомо лангсто вансть минек пелев кавто ашо прят.

-   Неть, нуцькат? — кевкстия мон.

-   Нуцькам, эно кить, — мерсь авась. — Тетяст войнасо, аваст роботы Пензасо, заводсо.

Минек марто сыця тейтересь, мерят стувтызе весе апаронзо, кузсь эйкакштнэнь ваксе каштом лангов, кортнесь, пейдькшнесь ды ансяк валгстовсь ярсамо.

Вадрясь, несак мерить, прядови куроксто. Чокшнесь ютась эзь марявгак, мельганзо ютась весь. Лембе таркасонть весь марявсь пек нурькинекс. Валскестэнть карминек пурнамо туеме. Пензась те велинестэнть нилешка вайгельбе. Минь арсинек молемс ялго. Простинек азораванть марто ды ульнинек анокт лисеме кудостонть. Авась варштызе тейтеренть, варштымизь минек, мейле таго - тейтеренть.

-        Тынь мольтядо войнав, те чарькодеви. Ков эно моли тейтересь? — кевкстимизь сон.

Минь колмоненек варштынек сельмеде сельмс. Тейте­ресь нусманясто комавтызе прянзо. Авась апак фатя сокардызе эсензэ кевкстемасонть се сыявксонть, конань минь лецинек кавто чить.

-        Сон туи васов тылэв. Тосо карми тонавтнеме, паряк, роботамо, — меринь мон.

     Тесэ, нать, а тыл?! — серьгедсь авась. — Тынь учотадо, шайтян немецесь пачкоди тей? Кабу а пачкоди!.. А нолдаса ковгак, — велявтсь сон тейтерентень. — Кайсек,  эйдинем, кайсек! Ушосо теле, якшамо, лангсот оршамотне кизэнь. Ков молят истя оршазь?

Тейтересь талнозь варштась минек пелев. Сон эзь сода, мезе теемс, кода улемс.

Нама,  кадовт,   коли  авась  кады  эйсэть, — пшкадсь Якушкин.

Ды  мезть  стякодо  кортамс! — таго  мерсь  авась ды ушодсь тейтеренть кайсевтеме.

Тейтересь аштесь киякс куншкасо, сельмензэ цитнесть кенярдомань валдосо, ловтаня чамаванзо чудесть кумболдыця сельведть...


Категория: Мои статьи | Добавил: tati (21.05.2010)
Просмотров: 643 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz