ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Юлия Шведкова. ВАСЕНЬ ВЕЧКЕМАНЬ ТОЛНЭ

ВАСЕНЬ ВЕЧКЕМАНЬ ТОЛНЭ

                                                          Ёвтнема

  Лепичей велесь покш, од ломантнедеяк ламо, ансяк Миколень содылизь весе. Пек уш сон бойкаль, мездияк а пелицяль, аламодо мик злыдарь ёнов мольсь. Бабинетне неемстэнзэ натой крёстыльть: «Таго те идемевсесь сыргась та-ков!». Тонавтнесь Миколь кеменце классо, обуцязо жо иестэ иес аволь вадрялгадсь, цёркась седеяк кежев ды набой теевсь. Велень од ломантне пельсть мартонзо пельксатамодо, содасть: кувать кортнеме а карми – сеске виев мокшнанзо пезнавтсы нерезэть. А кадовильть эйстэнзэ ялганзояк. Истя якастькак сынь, прок азорт, велеванть тандавтнесть малаваст ютыцятнень. Тонавтницятнестэ ламот сакшность школав томбазь, сэнь сельме-чама марто.

  Тедеде Лепичеев сась эрямо семия: полат-вастат ды тейтерест. Састь ошсто. Те неявсь весемева: оршамост, прянь ветямост, кортамост коряс. Кудопотмоськак ульнесь аволь велень эряцятнень кондямо. Таня тейтерест кармась якамо школав, вейксэце класос. Сон пек мазыель, сэтьмель, прок вишка цецине, кона, секень вант, синдеви кежей вармадо. Классонтькак эйстэнзэ прок седе валдо теевсь. Эрьвантень вечкевсь Таня, ансяк сон киненьгак пек эзь бажа, прок пельсь пицевемс.

  Миколь марто сон вастовсь тунда, зярдо чадыця лёмзеркстнэ пештизь весе веленть аёвтавикс качадомасо. Тона вечкиль тандавтнеме тейтерькатнень, секс нейгак, зярдо редизе кинть лангсто Танянь, пек кенярдозевсь. Эскельдясь икелев, ялганзо мизолдозь ойсесть кие тикше лангс, кие чувто прява: весе учость а стувтовиця пеедькшнема.

  Тейтересь мезеяк эзь редя, сон мольсь ды ванкшнось пертьпельксэнь мазычинть, кунсолось чувттнэнь велькссэ варманть тошкамонзо. Миколень неизе, ансяк зярдо эшкевсь мартонзо конядо коняс. Таня абунгадозь варштась ве пеле аштиця  цёрынькатнень лангс ды апак учо мерсь:

  – Мон пелян ськамон тува ютамс. А ильтясамак аламонь тарка?

 Неть валтнэ Миколень теке кельме ведьсэ шлизь. Сон варштась тейтеренть валдо сельмезэнзэ. Сынь вансть чевтестэ, учозь, видьстэ седейс. Миколь таго-мезе мериксэль, ансяк келезэ кундатотсь, теевсь прок кевень. Варштась удалов, косо ялганзо учость, мейсэ прядови кортнемась.

  – Ильтятан… – окойники менсь кургстонзо. – Адя мартон.

 Сон сонськак эзь чарькоде, кода ды мекс истя лиссь. Таня апак кавтолдо саизе кедте, прок эрямонзо перть содылизе раужо сельме, кеме рунго те од цёранть. Миколень таго-мезе прок сыргавтовсь седейсэнзэ, зярдо тейтересь истя лембестэ, кемезь кундась кедезэнзэ.

Ялгатне кургонь автезь вансть, кода сынь ютыть вакскаст, кияк валгак эзь ёвтаво, ансяк прясост чаравсть. Вейкеськак эзь чарькоде, мезе теевсь прявтост марто…

  Се шкастонть саезь Лепичеень ломантне ансяк Микольде кортнестькак. Тона сэтьмелгадсь, энгамсь, допрок полавтовсь. Ялгатне седе чуросто кармасть тердтнемезэ кодамояк тевс, лоткасть кунсоломодонзо. Ансяк Миколь прок мезеяк эзь нее ды эзь мелявто тень кувалма. Таняяк эзь кунсоло келятнень-лавгамотнень. Сон несь икелензэ тунь лия ломань…

  Те ульнесь васень вечкемань толнэ, кона вельмесь од ломантнень ютксо ды аноколь кирваземс покш толбандякс. Ансяк лиссь лиякс.

  Танянь тетянстэ-аванстэнь эзь вечкеве Микольде кортамотне, семиязояк аволь сюпаволь. Ды весть, зярдо од цёрась кода свал учось Танянь пирявтонть вакссо, апак учо лиссь тейтеренть тетязо. Миколь вырновтызе цигарканзо ды варштась тензэ видьстэ сельмс. «Вай, кодат вейкеть сельмест!» – кивчкадсь пряванзо. Тетясь прясто пильгс ваннызе церанть, згилязь ладсо пейдезевсь ды прок эстензэ мерсь:

  – Те истямо нулав шпана марто якси вейкине тейтернем?!

 Миколь псилгадсь, мик эзь лекстявояк. Сон зярсыя чатьмонсь, мейле окойники пшкадсь:

  – Мон чуман, мекс  вейке эйкакшонк? Паряк, омбоцесь а андови?

  Сон эзь сода, мезекс ёвтынзе неть валтнень. Паряк, обуцянзо невтиксэлизе. Танянь тетянзо мокшнанзо сювордавсть ды сеске лавшомсть мекев.

  – Вана мезе теть мерян: Танянь перька иля чарсе, сонензэ тонь кондямо мода унжа а эряви. Иля тапа эрямонзо. Бути яксеськак мартот, те ансяк а мезень теемадо! Вант, иля понго монень омбоцеде!.. Неть валтнэнь марто сон велявтсь ды совась кудос.

  Миколь талакадозь мольсь пирявтонть вакска ды ваннось вальматнева, арсесь неемс вечкевиксэнзэ. Ды неизе. Таня вальмава вансь ушов. Сельмест вастовсть. Ансяк аволь кувака ульнесь те вановтось, тейтересь якстерьгадсь, велявтызе прянзо ды кекшсь. Миколь весементь чарькодизе…

  Кудов церась мольсь прок онстонзо, пупорькшнесь кевтнень трокс ды мезеяк эзь маря. Эсест икеле кепедизе прянзо ды варштась колмо вальмасо чувтонь кудынест лангс. «Нулав шпана!» – кивчкадсь пряванзо. Сон содась: Таня зярдояк а сырги тетянзо каршо. Озась кустембес ды кундызе прянзо…

Теде мейле Миколь седеяк полавтовсь. Ламо эзь кортне, школав кармась яксеме эрьва чи ды прядызе сонзэ а беряньстэ.

  Танямезть тусть мекев ошов. Церась пек майсесь, ансяк содась: мезеяк а теят, кист явовсть…

Те васень вечкемась теизе Миколень тунь лия ломанекс: полавтызе бажамонзо, эрямонть лангс вановтонзо. Сонзэ пилесэ свал гайгсть Танянь тетянзо валтнэ, сынь прок тулкадсть эйсэнзэ икелев, кармавтсть улеме аволь «нулав шпанакс» – кеме, виев ломанекс, конадо зярдояк а поты вечкевиксэзэ, конань кувалма тензэ а ули визькс киньгак икеле.

Секе сёксестэнть сон тусь ошов, кармась тонавтнеме университетсэ.

  …Ламо иеть ютасть теде мейле. Микольстэ лиссь паро журналист. Ансяк зяро вечкемат эзть ульне эрямосонзо, васенцесь кадовсь седейсэнзэ весемеде тантей сэредьксэкс.


Категория: Мои статьи | Добавил: tati (06.06.2010)
Просмотров: 470 | Комментарии: 2 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz