ШКАДО АРСЕМАТ

Шкась – те стамбаро куловтыця. Теке марто сон – оймавтыця ормаменьскак. Шкась кармавты минек ламонь тееме, ды теке марто весементь велявты чаво озямокс. Вана сон ливти вармакс, а максы варштамс удалов. Мейле апак учо пезны вейке таркас ды кемевттянзат: сон зярдояк а полавтови… Шкась масторонть лангсо – кежей судия ды а кенгелиця адвокат. Паряк, шкась – те весе, мезенек алкукс ули: эрьванть зняро, зяро тензэ онкстазь.

Ломаненть свал ульнесь мелезэ изнямс шканть ды зярдояк а куломс, свал улемс одокс, виевекс… Мон чарькодьса сень (Пазось те эли мезеяк лия, мезесь чаравты Моданок), кона те шкас эзизе тень максо ломанентень. Истяяк эрямонок эрси чаво, ачарькодевикс… Мезе улевель, эрявлинек свал?!

Эрямосонть эрсить истяткак шкат, зярдо варштават удалов. Лиясто мизолдозь, лиясто седей сэредькс марто… Янксезеват, мекс а велявтовить вечкевикс ломантне, кенярксов, чанстев вастовоматне… Ансяк иля максо ютазентень лепштямс течинть, свал вант икелев. Сюкпря Эрямонтень, Шкантень весе вадрянть кисэ, мекс сон ули ледстнемасонок, мекс эзимизь юта вакска!

Весенень миненек эрявкшны лиясто лоткамс, читнень ливтямосонть арсезевемс: мезе мельга чийтяно прянь-полдань синдезь, мезес тонавтыть кевериця шкась, одксчись, шержей прясь? Мейле саемс седе ламо кошт мештентень, кепедемс прянть верев… ды сыргамс седе тов. Кеместэ, апак пеле ды панжадо седей марто.