Инечинь вастома

Эрзянь кезэрень койть-кирдат  

Инечинь васенце чистэ Бугурусланонь буень Сапожкина велесэ (Ней Оренбургонь ёнкс) эрси истямо кой. Велень тейтертне эсь юткстост весемеде паро тейтеренть мазыйстэ оршавтсызь. Те ули “Инечи”. Сон туи велеушов чилисема пелев ды козоньгак кекши. Лия тейтертне моразь сыргить велеванть “Инечинть” вастомо. Мартост саить пия ведра. Молемстэ морыть:

Тейтерь-какат, тейтерь-эйдть,

Боярават, азравкат,

Мезень коряс минь сынек,

Мезе тезэнь пурнымизь?

Сень коряс ней минь сынек,

Се ней минек пурнымизь,

Пурнавинек тейтерь-эйдть,

Минь Инечинь учомо,

Мазычинень вастомо.

Коёндо сы Инечись,

Коёндо сы мазычись?

Чилисема сон ёндо,

Инешкипазонь пельде.

Мазыйнестэ наряжазь,

Парынестэ сон пурназь.

Сы сон ашо палясо,

Паля ланга руцясо,

Сы сон парцей пацясо,

Пулопесэ лентазо.

Кецякавтсы веленек,

Мазылгавтсы кужонок.  

Веленть песэ пия ведранть путсызь мода лангс, ушодыть эряза моро:  

Сак, сак, Инечи!

Сак, сак, мазычи!

Нишкепазонь тейтерезэ,

Верепазонь кучовксозо.

Вана ведра пиянок,

Пештезь пия плошканок.

Сюконятам пильгезэть,

Симдятадызь пиядо,

Кедьбезэнек сайтядызь,

Велезэнек вийтядызь,

Сисем чинеть кирдтядызь,

Кавксоцестэ ильтядызь -

Таго пиже лугава,

Мазый цеця юткова.  

“Инечись” лиси каршост. Ансяк несызь, пиянть марто сыргить каршонзо ды морыть:  

Адядоя, тейтерь-эйдть,

Инечинек неяви.

Адядоя, азравкат,

Мазычинек редяви.

Каршозонзо листяно,

Пия плошка кандтано,

Пильгезэнзэ пратано.

Мазый моро моратам,

Кедьбезэнек сайсынек,

Велезэнек вийсынек,

Кецякавтсы веленек,

Мазылгавтсы кужонок.  

“Инечинтень” кандыть пия кече ды весе сюконить пульзядо эрзянь коень коряс (вить пильгенть венстясызь удалов, пульзить, те кумажась тееви седе ало кершенть коряс, но модас ялатеке а токавтови) ды морыть:  

Бояравась Инечи,

Азорава, азравка,

Нишкепазонь кучовтке,

Верепазонь вечкима,

Пазонь пельде кучозят,

Сисем чинеть нолдазят

Мастор ланга якамо,

Пуринеде симеме,

Ирець пирянь саеме,

Мазый моронь морамо.

Неикая сюкпрянок,

Симик пия плошканок,

Кедьбезэнек кундака,

Велезэнек адяка,

Мазылгавтык веленек

Кецялгавтык кужонок.

Веле-сядо, кенярдодо!

Вана сась ней учовксонок,

Киштезь-моразь минь вастынек,

Кедьбенеде минь кундынек,

Минь велес-сядс ней ветинек,

Кеняргавтсы сон веленек,

Мазылгавтсы сон кужонок,

Чилисема ёндо сась сон,

Чивадгомав таго туи

Пиже мазый сон лугава,

Мазый цеця сон юткова.

Инечинь таргонть перть тейтертне истя оймсить ды “Инечинть” марто якить кудосто кудос. Инечиде мейле таргочистэ (недлячистэ) “Инечинть” ливтьсызь.  

Инечинь ильтямо  

Весе эрицятне ливтьсызь “Инечинть” чивалгома пелев велень ортанть видьс, седе тов паксяв молить ансяк тейтертне. Чить веле-ушосо теить олгонь губорь, конань мейле кирвазтьсызь. Тейтертне ильтямсто морыть:  

Нишкепазонь тейтерезэ,

Верепазонь азравказо,

Нишкепазось тонь кучинзеть

Мастор ланганзо якамо.

Сисем чинеть якавтыдизь.

Сась ней шкат мекев туеме

Эсь кудозот, эсь чинезэть,

Эсь тарказот-эземезэть,

Нишкепазонь путонь кудос

Таго тиринь тонь тетятень.

Кундакая кедьбезэнек,

Адякая тон мартонок,

Минек ютазь Инечинек.

Нишкепазонть валгсь чинезэ.

Чивалгомав ветятадызь,

Пиже лугас ильтятадызь.

Туят ниже лугинева,

Мазый цеця юткинева.

Иень перть ней тон кадсамизь,

Омбонь те шкас ней тон а сат,

Инечинь чис прят а невтят.

Кода сы сон, омбонь те шкась,

Пурнавтано, тейтерькакат,

Мазыйнестэ оршнетяно,

Ведра пия пештятано,

Мазый моро серьгедтяно,

Таго каршо вастатадызь,

Велезэнек ветятадызь.  

“Инечинть” меельцеде каванясызь пиясо ды сюконить тензэ истя жо, кода вастомсто. Теде мейле тейтертне велявтыть велев. “Инечись” ськамонзо туи паксяв, моли сельмстэ ёмамос, велев сы шкань ютазь. Тесэ кадовикс ломантне морыть:  

Паро боярт лелянок,

Боярават урянок,

Инечиненть ильтинек,

Мазычиненть кучинек

Пиже мазый лугава,

Мазый цеця юткова

Нишкепазнэнь, тетянстэнь,

Верепазнэнь, кучинстэнь.

Нишкепазнэнь сон моли,

Иень перть мекев а сы,

Иень ютазь таго сы

Чилисема сон ёндо,

Кецякавтсы веленек,

Мазылгавтсы кужонок.  

Паасоненэнь сёрмадовкстнэнь коряс печатьс анокстызе Маризь Кемаль