ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Эрюш Вежай. Ёвтнема. Маньчема

Маньчема

Ёвтнема


Медьков. Коштсонть медьарвонь тансть. Чизэ азорокс кутмордызе лембе, эждий кедьсэнзэ валдос навазь пертьпельксэнть, эрзянь ёнксонть-масторонть. Чипаенть лангс а варштават, сельмть кери. Сон теке пициця тюжа пачалксе поводсь пря велькссэ, ванькс менеленть сэрей тёкшсо ды пси вечкемань толсонзо палсезь палси эрямоилыксэ пешксесэ Нороваванть-моданть, сень весементь, мезентень сон эсь лембесэнзэ казсь ине казне - Эрямо.

Чипаень лембентень, эрямонтень кецнесть, марявсь, эрзянь Кажвелень кудынетне-кардазтнэ, икелест касыця сэрей, рацяня ветлатне, кувакатне, леенть видьс таргавозьтне эмеж пиретне, пире песэ цитниця Сургут леесь, чиреванзо пижес навазь тусто кальвиресь, томбалензэ - тюжалгадыця сюро паксятне ды чополт мери пиже вирень киксэсь.
Чинь налтнэ нолштызь Киятань чаманзо, теке лембе ды аламошка иржаня скалонь кельсэ, зярдо цёрынесь кирнявтсь кудыкельксэнь сэрей чалгамостонть витьстэ пулев кинть лангс, кона ёзнэкс меньчевезь венстявсь Алопень кудотнень икельга. Чалгамось ансяк 'чи-икорр-рк' тейсь.

Цёрынесь аламнешкинес лоткась, теизе кедьлапушканзо лазнэкс, аравтызе конязонзо, чивалдось сельмензэ илязо пек керя, ды варштась пиретнень томбалев, тов, косо цитнесь каль куракштнэнь ды чей пулотнень юткова чудиця леесь.
Чопода кудыкельксэнть потсто, панжадо кенкшканть, мельганзо каятотсь Федай сырькаензэ мелявксов вайгелезэ:

-Ва, нуцькинем, ванок: Кувать илядо экшеле, ормалгадат! Ды илядо чопавтне кува а эряви. Прянк ванстадо!:

Нама, неть превс саема валтнэнь цёрынесь маринзе уш удалдонзо, зярдо ношкстась Верепе ёнов Осипинь пандо чиреванть молиця теине, кудонь ракшасо шешкевть яннэванть. Тосо, Верепесэ, учость эйсэнзэ Оря васол сырькаензэ нуцьканзо, Киятань васол лелятне - Серьгут-Микольть, кирдажозо - Михал ды Нина васол сазорказо. Сынь исяк мартонзо кедьсэ чавсть молеме вейсэ Чирекс лисьмав экшелямо.
Кията чиезь-чиезь ютызе Осип атянь кудонть, Олёшкань пандочаманть, конань ало каргокс венстизе кувака кирьганзо менельс сэрей очоп лисьмась. Тестэ саеви Кажвелень Верепесь, алопенсэнь цёрынетнень туртов - лома пе. Киятань икеле ней ульнесь пелема ки пельксэсь. Тесэ эрить Маёртнэ. Торпингень паксясто тетяст велявтсь 'майор' ушманлемсэ, секскак велень продештяст истямо. Сынст кавто покшке цёрынетне та-мекс а вечксызь Киятань, секс кодак несызь, пачк терявтыть кундамонзо ды 'вачкамо' тензэ парстине. Судонзояк цёрыненть а весть порксакшнызь-тапакшнызь. Пилень стявтозь, пштистэ кудост ёнов ванозь, Кията комазь-комазь ютынзе Маёрынь удалсь кардтнэнь-утомтнэнь. Таргизе оймензэ:Седе тов кись ульнесь ванькс, пеляскалемс ней ульнесь а мезть. Цёрынесь курокке пачкодсь Оря сырькаензэ кудо юртонть видьс.
Зярдо сон совась чивалдостонть экше кудыкелксэс, сельмензэ чоподадонть теке сокоргадсть. Кальцькадсь синдерькссэнть. Кедензэ икелензэ венстязь, ютась панжадо кудо кенкшканть, совась удалсь кудос. Тесэяк чоподаль. Вальматне вельтнезельть, налкставт кизэнь карвотне кудос иляст совсе-ливтне.

Васолсырькаезэ чоподаванть каштом чирестэнть цёрынентень сеск эзь нееве. Тонантеньгак эзь содаво, кие сась. Кията маризе тосто корсяня вайгелензэ:
- Те кие сась ? Тон, Михал?

- Аволь. Те мон, Кията, - макссь вайгель каршонзо цёрынесь. Куйсь
каштомонь алсе, пильгтнесэ валакавтозь, чалгамонть лангс. Ней нурькинестэ наразь прязо сатыль каштом лангонь видьс.
Оря сырькаесь сырель, якиль стакасто. Коське, лавшо кедьсэнзэ вадяштызе Киятань прява.
- Ва-ай, левкскем, кода кецявтык седеем. Варштамом сыть?
- Аволь! - тей-тов ахолдась прясонзо Кията. - Экшелямо. Косот Михалт-Микольть? - терявтсь сон сеске валгомо кияксов.
- Аштека, аштека вакссом куш аламнешка, витик мелем, - кирдизе сырькаесь цёрыненть кедте.
- Иля капша, кенерят экшелямо. Васня ёвтника тень, кода тосо эрить-аштить Кият ды Федай покштят-сырькаеть? Шумбрат-парт? А сэредить?
- Арась. А сэредить. Покштям нешкть ванкшны. Од дадана тейсь. Магазинт
аноксты.- Киятань сельмензэ тонадсть кудонь чоподантень, вальма сляниканть пачк сон неинзе ялганзо. Пакшатне эмеж пиресэ кочксть чурька пандят.
- Мон туян, сырькай! - Оря сырькаесь чарькодсь, кодамо акирдемасо
пешксель Киятань оймезэ. Седе тов эзь карма цёрыненть кирдемензэ.
- Азё эно, цёрынем. Ванан пек капшат. Ванодо тосо. Экшелямсто ков а эряви
илядо эце. Кият атянень ды Федай сырькаентень ёвтак шумбракстнемат пельдень. Кадык сыть варштамон ютко шкасто:- Неть валонзо Кията маринзе уш кудыкелькстэнть.
Кочкицятне сазь ялгаст вастызь чатьмонемасо. Ансяк варштасть лангозонзо. Прянь апак кепсе капшасть кочкома паест прядомост. Кувака чурька пандясь явтазель колмов. Сехте покш пельксэнть кочксь Серьгу. Сон покшось. Тензэ моли кемнилееце ие. Ялатеке сон кочкомсто икельдинзе Миколень ды Михалонь-Нинань. Кията кундась лездамо кирдажнэнзэ. Тевесь курок прядозель.

Эйкакштнэ вешсть сырькаест кедьстэ модамарень-чурькань сывтень, скалойсэ рестазь прякинеть. Шкань апак ёмавтне сеск ношкстасть Покш пандонть алга Грань лисьманть ёнов. Косо лисьмась прыль лейс, ульнесь эйкакштнэнь сехте вечкевикс экшелямо таркаст.

Вана сонгак, Грань лисьмась. Истя тензэ мерить вана мекс. Сон ашти Захарка ды Адлякува велетнень модаст граньсэ. Тесэнь эрзятне ловить сонзэ Пазонь лисьмакс. Коське шкасто тей сакшныть ломантне Пургине Пазнэнь озномо, пиземень вешеме. Лисьмапрязо пек виевстэ чави эрексиянь кондямо ведьсэ Покш пандонь чамалондавксонть алдо модапотмонь чопода потмаксстомо варятнестэ.

Пакшатне сеске кайсизь понкскест-панарнэст чевте луганаронть лангс. Варакань лопасто тейнесть симема ваканкат, амолькшнесть лисьмапрястонть сиясо кувтолдыця кельме ведтенть ды ярсасть прякинеде ведень корштнезь. Тансть дык тансть те ульнесь! Келетькак нильсак:Вейкесь превс а саеви: мекс неть прякинетне истя курок сэвевсть?!
Лисьмапрядонть аламодо седе ало Сургутось лиси тусто каль ютксто панжадо таркав. Сельме икелев сон ливти есь ванькс, сэтьме ведензэ. Тесэ сон теи келей ужо. Те ужосонть леесь келемти чирензэ ды алкиньгавты сэрензэ. Теи мик веденькеверькс таркат, косо састыне шольни потмаксстонть неявиця кевтнень велькска чудемстэ. Пачк невти ведьсэнть парсте неяви тюжала човарось, сёвоньсэ ацазь лей потмаксось. Эзганзо чудеманть каршо юв-яв ёзмолдозь укшныть та-мезень вешнезь модарькат. Седе сэрей таркатнева, косо ведесь седе чопода, веденть потсо тей-тов ювныть валдо пижеть, рацяня ведьпарсейть. Ужонь алка лейчиретне теке кумбосо ацазь мода ёжова касыця чевте, вишка ожо цецине марто тикшинесэ - 'дигань лапинесэ'. Те лейчиресэнть налксемскак пек ён ды паро. Улить вишкинетнень туртов пулькамо таркаткак, покштнэнень - сэрей чирестэ чопавтнема таркаткак.

Мельга меельцек эйкакштнэ чопавсть леентень. Ансяк вете иесэ раужо сельме Нинань кадызь лей чиресэнть. Сон зярс укшномо а машты. Сонзэ мейле Серьгу экшелявтсы.

Серьгут-Микольть сеск уйсть домка таркав, кармасть сэренть онкстнемензэ. Михалт-Киятат бакакс пулькасть-ботасть алка таркасонть, вейкесь омбоценть терявтсь прянек-мезнек навамонзо. Лейчире лондавксонть алдо коморосо таргсесть сэньшт молиця, чапаксокс ичевиця сёвоненть, идемевсекс ваднилизь чамаст-рунгост, пижакалезь кирнявтнильть ведьс. Тень пингстэ веденть чамава укшныця ваксошкань покшолмасо синтёпкатне ды лия кал левкстнэ эрьваксть тандадозь сралесть эйстэст эрьва ёнга ды шкань ютазь одс пурнавильть секе таркантень. Леенть велькска васов кайсететсть эйкакштнэнь гайтев вайгелест. Ансяк Нина сазоркась лей чирестэнть вешсь ниреждезь:
- Мо-оньга-ак экшеля-а-а-втами-и-изь:

Окойники сонзэяк Серьгу састыне, кедь педе, нолдызе ведев. Пекине алга кирдезь аламнеде укшновтызе тей-тов. Нинань раужо плаштинень кондят сельминензэ тень пингстэ цитнесть а ёвтавикс кеняркссо. Сон мезе вийсэнзэ плестяесь ведьганть кедь лапушкасонзо, киска левксэкс цийнезь цийнесь мельспародонть.
Эйкакштнэ кельместь, рунго киськеваст пупстасть пупорькат, ёжо понасткак стякшность, пейзаласкест сорномадост кармасть кальцкаеме, турваст сэньшкадсть. Пакшатне кирнявтсть лейстэнть, маднесть пекест лангс вейке-вейкень ваксс чевте, лембе луганаронть ланга. Чинть ало киськень калямо. Чизэ курок костинзе ды эждинзе рунгинест.

Кията велявтсь кунст, путынзе кедензэ прянзо алов. Чи валдось валдо якстересэ неяви пекстазь сельмекерьтнень пачк. Чинь лембесь тантейстэ кутьсти сельмтнень, кости сельмепонатнень. Кията соды: ломанень вересь - якстере, секскак сельмекерень пачк чи валдоськак неяви якстерестэ. А вана пиже тикше лопанть пачк сон неяви пижестэ, ванькс веденть пачк сон валдо сэньшт моли:Та-косо пек вере, певтеме сэрей менельсэнть, жойсэ моры а неявиця норовжорчось:Кода сон тонадсь истя мазыйстэ морамо?
Пилензэ вакссо бийнезевсь сеське, омбоце:Ней неть идемевстне сэтьместэ эжнеме а кадтадызь.
- Эрь! Адядо Покш пандо пряв! - кирнявтсь таркастонзо пакшатнестэ сехте эрязась, Миколь.

Пандо чамаванть касыця тикшетне седе коськеть, калгодот, пупсить кепе пильгтнень. Ялатеке эйкакштнэ вейкень-вейкень икелькстнезь, чиезь-чиезь кузить пандонь чиречамаванть верев ды верев, тов, косо пандо прясь вастови менеленть марто, тов, косто, маряви, ансяк кедеть венстик ды вана сон, ашо вецана пель панкскесь, карми кедь коморсот:Киятанень маряви: сон теке витьстэ сэнь потмаксонь менельс кузи:
Стакасто лексезь лоткасть пандо пря чиресэнть оймень таргамо. Кията мари, кода мештькесэнзэ ирдезкетнень пачк озяз левксэкс сиземадонть чави седейнезэ, пря бокасонзо токнозь чави, чави верь саннэсь: Тесэ, Покш пандо прясонть, Кията мари эсь прянзо ливтиця нармунекс, вадовокс эли мик куцьканокс. Мастор элесь теке потазевсь удалов ды васов. Сон ней неяви эрьва ёнов васолксонь лембеденть сорныця сувнэсэнть. Ансяк пондакш пель панкскетне шождасто кепетсть седеяк верев, кодаяк а сасавить:Сынь истя, улема, мик чипаенть сэрьс кузить:А вана цикниця цянакатне ней леенть кувалт мик алонзо ёндолокс ливтнить:Кията арси:

- Вана мон ливтян таргавозь штапо пря пандокерьксэнть велькска Якстере пандонть ёнов, мик эль-эль неявиця Адлякува веленть видьс. Мейле пурдан мекев, ютан паксятнень велькска Микольскоенть ёнов, мейле - чипелев, Лёксандровка рузонь веленть велькска теян састо кирькс ды валган Отрада велень калонь сёлтнэнь ваксс. То ёнов чизэ чокшнэ ланга ланди: Штапо керш лавтовозонзо кирнявтсь покш, пиже пакся цирькун, сезинзе Киятань маней, шожда мелензэ-арсеманзо, ды апак учо валгстызе цёрыненть верьга-васолга ливтниця оймензэ Мода масторонть лангс. Цёрынесь соркстась лавтовсонзо. Цирькунось цирьсэ цирьнезь ливтясь та-ков ашо ковёлтнэнь потс, ёмазь ёмась.

Ялганзо те шкане ульнесть уш таго пандонть ало, кармасть лисьмапрястонть чудиця лейненть сёлтамонзо, теить экшелямо сёлт. Сёлт пирявксокс кантнить пакся кевть, карягат, коське тарадт, тюжа ичевиця сёвонь. Ёроков, эряза эйкакшонь кедтне курокке вачкизь сёлтонть. Мода потсто чавиця, эекс тарькс кельме ведесь чаразь-велязь пешти келей керезень кондямо домка сёлткенть. Вана сон кармась чадомо сёлт пирявксонть трокс, теевсь дорныця ведьпрамо ды дорны чакш.
Шказо сась чопавтомс эзэнзэ! Тулевксэкс цирьнезь пакшатне кирнявтсть кельмесэ пициця ведентень. Ведьсэнть те кельмеденть васня ойметькак сеск а таргави, кельмесь сэрьс толсо кирты-тапарды рунгонть. Эйкакштнэ пелькстыть: кие седе куватьс цидярды те кедень-пильгень катаргавтыця тол кельме ведьсэнть?!

Васенцекс тандавтозь вашинекс кирнявтсь ведьстэнть та-мекс сехте покшось, Серьгу. Паряк превензэ лиятнень коряс седе ламольть? Мельганзо - Киятат-Михалт. Весемеде куватьс эсь рунгонзо те ведьсэнть нарьгизе Миколь. Сонзэ вана пачк истямо корозо, зярдояк валдонзо-тевдензэ удалов а поты.
Ней нейке эряви чиезь чопавтомс Сургут леентень! Самай теньсэ те тевенть весе зэмезэ аштияк. Сестэ леень экшине ведесь лисьмапрянседенть мейле маряви малав-малав мик псикс!

Вана кедтнень пря велькссэнзэ венстязь домка таркас прясо чопавтсь кувака Серьгусь, мейле вейсэ Микольть-Михалт: Мельгаст истяяк, прянь икелев, кирнявтсь серейне лейчирестэнть Киятаяк:Сон маризе, кода плестядсь прянзо алдо эрьва ёнов эждиця ведесь, маринзе ашо човонь булдоркатнень лажномаст-каштордомаст: Пря човонезэ нерькставсь мезес-амезес калгодос, теке узерень обушкас. Сельмссэнзэ кирвайсть кавто валдодояк валдо тол кесакт, гувны толонь кирькст, конатне кармасть келейгадомо, эчкелгадомо, касомо. Теке толга тодовонь пачк Киятанень марявсть та-кодат а чарькодевикст вайгелькст-пижнемат, конатнестэ тензэ чарькодевсь ансяк вейкине валось:

- Верь:верь:верь:

Сон марясь, кода чуди ведесь састыне уски лавшомозь рунгинензэ алов:Мейле сон уш мезеяк эзь маряяк:

Зярдо стакасто панжовсть сельмензэ, неизе эсь прянзо кунст мадезекс лей чирень луганаронть лангсо. Прязонзо путозель томба верьсэ вадневезь панарнэзэ. Сельмезэнзэ пштистэ вансь Серьгу, чевелявтсь сэньшкадозь турвасонзо.
- Кода ёжот? Пек тонеть? - окойники маринзе Кията кевкстеманзо пилесэнзэ марявиця увтонть пачк. Аламонь-аламонь сэнь менелесь велькссэнзэ кармась лоткамо велямодо. Цёрынесь озась, кармась сонсь кирдемензэ порксазь прясонзо комказь верев панарнэнть.
- Кията! Кода ёжот?! - таго кевкстизе Серьгу.
- Пп-п-парст-тте:ашназа турванзо эль-эль явтынзе Кията. - А-ансяк п-пилесэм мезе б-бути б-бийни: Серьгунь чамазояк мик валдомсь. Кортазевсь цёрынесь!
- Те мезес истя мон? - кевкстсь Кията.
-Улема, кевс, - ёвтызе мелензэ Миколь. - Се паро, сон аволь пшти понгсь, меремс, мик валаня. Верепазось аламнешка ванстынзеть.

-Ва-а-ай:мезе ней мон кудосо ёвта-ан:- кармась ней ниреждеме Кията. - По-онги-и тень:Ав-в-аам прям сейсы-ы:

-Лоткак!..- казякадсь Серьгунь вайгелезэ. - Васняяк эряви мейсэяк прят тапардамс, - арзезь сон поладызе валонзо.- Оно, панарось тунь вериясь:Эсиньсенть, паряк, сезнеса, - кармась сон эсь панаронзо каямо.

- Аштека, - лоткавтызе сонзэ Миколь. - Эрьде, Нинань кучсынек кудов. Кадык веши Оря сырькаенек кедьстэнзэ кодамояк ванькс коцт панкске. Кадык Нинась тензэ мери, келя Киятань пильгезэ тапазь сляникасо керявсь экшелямсто, секскак панкскесь эряви пильгенть сюлмсемс: Те мелесь весень мельс тусь. Нина сеске чиезь ношкстась велиненть ёнов.
- Ней эряви арсемс, мезе тенек ёвтама кудосо, зярдо кевкстьсамизь, кода истя те апаро тевесь Кията марто лиссь, - поладынзе арсеманзо Серьгу.
-Эрь, мертяно: минь экшелилинек, ардсть Покш пандо пряс Адлякувасто та-кодат ласте цёрынеть, апак учо кармасть тосто лангозонок ёртнеме кевсэ. Вейке кевесь вана понгсь Киятанень пря ланга:- ёвтась превей мель ёжов Миколесь. Прасть ве мельс: истяня кудосо кармить теевезденть ёвтнемеяк.
Шкань ютазь велявтсь ней уш пек апак капша Нина. Ве кедьсэнзэ пельс сэвезь прякине, омбоцесэнть - вишкинькине якстере панкске, конаньсэнть аволь мик лазозь пря, пелька пряяк а сюлмави. Венстизе сонзэ Серьгунень:

-Вана, кандыя:

Тона тетькинзе лангозонзо сельмензэ:

- Те мезе, панкс истямо?

- Па-анкс:

- Арази те панкс?! Эх тон, вазонь пря:Тонь мезе мельга кучныдизь? - кальцкадизе лелясь тейтерьканть куншка сурсонзо конява. - Тон несак мезе кандыть?!
Нинань чамазо чапаськадсь, раужо сельминестэнзэ пургасть сэпей сельведть, тейтерькась аварьгадсь эчкела, икныця вайгельсэ.

- Па-анкскенть тень сы-ырькаем м-максызе:

- Паро, эно. Лоткак ильсемеде,- мерьсь тензэ Серьгу ды кармась таго каямо панаронзо. Ансяк эзь кенере. Экшелямо таркастонть аламодо седе ало теезь печкимантень кальстэнть лиссь ава ломань ды серьгединзе сынст. Те ульнесь Ёвга васол патяст, кона эрясь Адлякувасо ды ней Микольскоенть трокска мольсь инжекс Кажвелев. Вана сон печкизе састыне леенть, ютась пакшатнень малазост ды абунгадозь вачкодсь кедьсэнзэ пукшованзо:
- Вай-вай-вай! Нишкепаз! Верепаз! Те мезе истямось Кията марто?! Кие сонзэ истяня?!
Цёрынетне, сельмень модас пезнавтозь, вейкень-вейкень сезнезь, ёвтнесть тензэ 'ластетнеде'. Келя, вана ардсть, вана апак учо ёртсть ды вана понгсть кевсэ Киятанень пря ланга. Ды вана сеске тусть ардозь Адлякува ёнов:
Ёвга патясь каизе прястонзо ашо пацинензэ. Сюлмсизе эйсэнзэ Киятань прянзо, кепедизе цёрыненть, озавтызе кедензэ лангс ды келейстэ эскельдязь сыргась мартонзо велиненть ёнов. Эйкакштнэ нувара пулынекс мольсть мельганзо. Киятянь тапазь прязо ней а сэредильгак, ансяк превензэ аламодо велясть ды уксноманзо шкань-шкань кепсевсть, рунгозояк тень пингстэ марявсь нулакс лавшокс.

Цёрынентень ульнесь пектеяк пек виськс: кода эно, вана теть, пачкодсь истямо тевс - сон уш покш цёра, а вана кандыть эйсэнзэ кедь лангсо теке потякшонь кудотнень-вальматнень икельга весе веленть кувалма:Секскак сон зярыякс терявтнесь валгомо Ёвга патянть кедьстэнзэ ды тонась эссекшнэ нолда, седеяк кеместэ лепштылизе чевте, лембе мештезэнзэ. Кията кекшизе сельведтнеде начко судынензэ аванть лавтов юрс, косо сталмодонть токнось чавиця седейверь саннэсь ды истя, сельмень конязь ды кекшнезь ютавтызе весе молема кинть.

Кудосонть, зярдо сынь совасть, весе талнозевсть. Киятань авазо, Насько, зярс Ёвга патясь ёвтнесь ластетнеде ды сынст апаро тевденть, курокке шлизе армотьксонть ды томба веренть, тапардызе цёрыненть прянзо ванькс марлясо. Путызь Киятань икельсь кудосо кшнынь, чевтьстэ ацазь коникенть лангс, вельтизь лембе вельтявкссо, макссть тензэ симеме та-кодамо куслянь кондямо симемка, марявсь тензэ теке вецана кулага. Прялксокс путсть сэрейстэ чавозь, чевте тодов.

Цёрынесь неть мелявкстнтнэде-ваноматнеде ды кудонь лембеденть кармакшнось уш сутямомо, зярдо маризе, кода удалсь кудос совась Кият покштязо. Тона сеск чийсь кудов велень вейсэнь кардайстэ, зярдо тозоньгак пачкодсь кулясь нуцьканзо марто теевезь зыяндонть. Кията марясь пельс панжозь кенкшенть пачк, кода аватне атянтеньгак ёвтнесть адлякувань ластетнеде: Вана кияксонтень вачкодевсть тубареткань пильгтне. Кият атя истя сезевсь-стясь лангстонзо. Кежензэ лаказь лаказевсть!
- Федай! Косо панстось ды локшось?! Панстаса Бунчуконть, стардсынь злыдартнень, киськест верьс ваткасынь! - марявсть мик икельсь кудоскак кежень пачк ёртозь валонзо.
Киятань седеезэ киторк тейсь, мерят, чавомодояк лоткась:Вить кодаткак ластеть арасть ды арасельтькак! Сеть ластетне - голь маньчемат!! Седеезэ эзь цидярдо:
- Ава-а-ай-й!..- верьга вайгельсэ тюрьсэ рангозевсь цёрынесь эчке вельтявксонть алдо. Авазо тандадозь кирнявтсь удалсь кудостонть ваксозонзо.
- Тон мезе, левкскем?! Истя пек теть?
- А-аво-оль.., и-и..,- ниреждсь Кията ды терявтсь кекшемензэ прянзо тодовонть алов. - Кады-ык по-окштя-ям ковгак а ардтни-и:Ко-одаткак ла-астеть арасе-ельть:Те мон экшелямсто ке-евс:Но-олдынк чумо-ом:Мо-он ма-аньчинь:
Виськсэсь псисэ валызе-пештизе цёрыненть весе оймензэ:

* * *

Ниленьгеменьшка иесэ цёра ашти озадо Покш пандопря чиресэнть, кувать ваны Сургут леенть лангс, леенть томбале лымбиця товзюро паксятнень лангс. Сон мари прянзо теке куцьканокс эли вадовокс, кона ливти пандокерьксэнть велькска васня Адлякува веленть ёнов, мейле паксятнень велькска, Микольскоенть велькска ды валги плёсанть томбалев:
Штапо лавтовозонзо кирнявтсь пижела пакся цирькун:
- Па-акшт! Пакшт-пукшторрр!!!- апак учо сезизе пертьпельксэнь кашкамонть ды сэтьменть теке гранатань сезема пандонть ало, тосо, косо Грань лисьмань лейнесь прыль Сургутс ды теиль ведьулыне. Ды сеск тосто каятотсть казямо вайгельть:
- Вот это пиз:анули! Рыбы-то тут! Ох:еть! Да ху:ли ты её руками!! Сачком! Сачком её греби!
Каршозонзо седе човинестэ:

- А ты не п:зди! Сам давай лови. Тут всем самарским бл:ям хватит!
Озадо цёрась стясь таркастонзо, теке пувтась. Соракавтызе лавтовстонзо цирькуннэнть. Велявтызе чаманзо леенть эйстэ ды тусь то ёнов, косо зярдо-мень шка ульнесь эрзянь Кажвелинесь. Ней таркасонзо ансяк чаво тарка. Тия-тува неявить калавтнезь кудоюртонь губорькскетне, азортомо касыця шукшторовкс курынеть, пельс синтрезь умаринат. Ракшасо шешкезь-тапазь калмазыренть таркасо ладс аштесь ды кунсолось варматнень ансяк вейкине лецтнема палмань. Эйсэнзэ сёрмадозь:
                                                                     1894-1972 иеть

                                                      Тесэ         калмазь         Кият  атя
Цёранть превсэнзэ налкставт карвокс чавсь-токнось кевкстема:
- Кинень мешась те идемевсь Масторсонть вишка эрзянь велинесь?!

--- --- ---
Севастополь-Полярной. 2000-2001 иеть.

Категория: Мои статьи | Добавил: tati (17.09.2009)
Просмотров: 873 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    Сделать бесплатный сайт с uCoz