ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Доронин А.М. ВИШКА-ВИШКИНЕ

ВИШКА-ВИШКИНЕ

Ютась ие, кода автобуссо ардомсто чавовсть Олянь тетянзо-аванзо. Сындест сон а ледстнияк — ульнесть тензэ кавто иеть. Ды а чарькоди, кодамо те ёмавкс. Певтеме горядонть бабазояк кулось. Кадовсь вейкине покштязо, Сёма атя, конань марто эрияк. Покштязо чевте ойме ломань, ды седеезэ а шумбра, свал сэрели. Олянь кутморямсто сон вейкетьстэ ушоли:

— Вишка-вишкине…

Моцька сакалганзо лосьсэ туильть сельведть.

Оля ушоды ладсемензэ:

— Покштяй, иля аварде, курок лавкав мольтяно…

Атясь «витсь» прянзо дёшова винасо. Сими ве стопкине —ризксэзэ аламнес ды поты. Лавкасто сынь мизолдозь лиснить, урозксчинь апак маря: Сёма атя аламнеде копордазь, Оля — коське пряникень порнезь. Марявсь, сэрей атясь кедте кундазь вети аволь эйкакшке — кортамо маштыця наряжазь няка. А уш кодамо превейне тейтернесь!

Сыретнень коряс, эйкакштнэ чудат-юдат эрьва чи некшнить, эрьва панжовксось тенст — певтеме эрямо. Сех покш дивакс Олянень теевсь мандаринэсь. Лиссь те секе лавкасонть, ков совсекшнить. Сёма атя, кода свал, симизе вина стопканзо, чиполасо аштицятнень марто кортазевсь. Оля стясь ве ёнов пряникень потсеме. Ды тесэ сон эсензэ шкавань цёрабайненть неизе, кона аванзо платиядо ноцковтнесь. Тона эзь цидярдо, юдмастонзо таргась ожола-якстере шарнэ, цёрынентень венстизе. Цёрабайнесь таго педясь чачтыенстэнь. Авась арась чиполадонть ве ёнов, кармась шарнэнть ванськавтомо. Лавкась пешкедсь истямо тантей чинеде — Олянь натой сельгензэ тусть.

Цёрабайнесь пезнавтынзе мандаринэнтень уро пеензэ — сень эйстэ ведь пургась. Мезенть-мезенть, а уш тень Оля эзь учне —истямо мазычинть сэвемс. Цёрабайнесь чирьстэ вансь — пельсь, нать, тейтернесь нельгсы кедьстэнзэ. Сокось пештизе кургонзо, чудсь улованзо. Зярдо мандаринэсь прядовсь, цёрабайнесь мольсь Оля ваксс ды венстясь тензэ цитниця ваткавкст. Тейтернесь кенярдозь саинзе — цюдавсть тензэ чиньжарамонь панжовксокс. Сынь ульнесть чевтть ды начкт. Оля тонгинзе пальто зепс, вейкенть коморо потс кекшизе. Налксемань кисэ.

Ваткавкстнэс Сёма атя кудосо фатясь.

— Те мезе кедьсэть, вишка-вишкине? — пшкадсь сон нуцькиненстэнь. — А-а, мандаринэнь лукшт, — окойники чарькодсь.

«Лукш» валось Олянень стувтовсь, а вана «мандаринэнть» эсензэ ладсо ёвтызе:

— Даринэнь-даринэнь?..

— Даринэнь-даринэнь, — пейдезевсь Сёма атя. — Мезе, сындест эзить ярсне?

Тейтернесь прясонзо ахолдась.

— Те кода истяня, мандаринт теть эзинь рамсе? — кудованть яказевсь атясь.

— Даринт-даринт рамат?! — кеняргадсь Оля.

— Ва кандсызь пенсиям, ды Вася лелятень кармавтан. Сон райцентрасто теть уски.

Вася лелясь — шабраст, кона «Вельхозтехникасо» токарекс важоди.

Онстонзо Оля несь мандаринт. Буто сынь, ожола-якстере шартнэ, кеверькшнесть киякска, кепсевсть верев, валгонесть сонзэ ды покштянзо лангс. А сынь, покштят-нуцькат, киштсть-морасть. Мельстуиця те налксемась талайс мольсь.

Тесэ Олянь икелев стясть кавто ломанть — ава ды цёра. Мизолдсть тензэ, прянзо вадяшасть. Кортасть мезде-бути, ды валост Оля эзь маря. Мейле арасть покштянзо ваксс, кундызь кедте ды кармасть мартост ускомонзо. Оля ёртовсь идемензэ —тесэ мандаринтнэ ёматотсть. Неезденть тейтернесь сыргозсь ды аварьгадсь.

Сёма атя нуцьканстэнь чийсь.

— Вишка-вишкине, мезе мартот?.. — ушодсь кевкстнемензэ.

— Ле-лясь, па-тясь… — моткодсь тейтернесь.

— А мон арсинь… Лелят ды патят эрьва чи некшнят, эйстэст мейс пелемс? — кармась атясь оймавтомонзо.

— Кедьстэнь даринтнэнь нельгизь! — яла рангсь тейтернесь.

— А-а, мандаринтнэнь… Дык сынст налксемань кисэ саизь. Матедеват — мекев теть велявтсызь, вансак ва. Удок, вишка-вишкине…

Сёма атя палызе тейтерненть ды, зярдо тона матедевсь, лиссь удалце кудов таргамо. «Вантака, мандаринтнэ кода педясть оймезэнзэ — онстонзояк эйсэст неи. Кандсызь пенсиям — Васянень сеске чиян», — ризнэзь арсезевсь.

Мандаринтнэ эзть учово. Олянень мерсть, покштязо пек ормалгадсь ды ней больницясо. Аламос тейтернесь эрясь шабраст кедьсэ. Велесэ роднянзо арасельть — семияст Узбекистансто оргодсь, косо кепсесть пряст националисттнэ, — ды Олянь ильтизь урозонь кудов.

Зярс учость тосонь директоронть, ускицязо, райсобесэнь авинесь, вадяшась эйсэнзэ пря касмова ды кортась мелявтозь:

— Осподи, мейс кадыдизь, истямо мазыйненть?..

Курок сась директороськак, Кира Петровна. Сильгев чама, турванзо велькссэ раужо понынеть. Кувака ды чова кирьга. Мирдевтеме-эйкакштомо, весе эрямонзо сон алтызе урозонь кудонтень. Эйкакшпингезэяк тесэ ютась. Пединститутонть прядомадо мейле важодсь васня воспитателекс, мейле завучокс, ды вана комсь иеть, кода сон директор.

Кабинетсэ Олянь ускицянзо кунсоломсто Кира Петровна секе тев тейтерненть лангс варштнесь. Зярдо авинесь кадынзе, сон озась Оля ваксс. Тона чатьмонезь кенкшенть пелев вансь, конань томбалев кекшсь меельце содавикс ломанезэ. Мейле Кира Петровнань сельмукшонзо лангс варштась ды пшкадсь нусманясто:

— Покштям больницясо...

«Уроз-урозке», — арсезевсь Кира Петровна. Ульнесь покш мелезэ кеместэ сонзэ кутмордамс, каземс тензэ весе седей толонзо, ансяк а майсевель. Ялатеке кирдевсь — теньсэ тейтернентень а лездат.

— Покштят больницясо? — рукштядинзе кедензэ. — Ды тосто а сеске нолдтнить!..

Эйкакшкесь, секень вант, уракады. Ней эрявсть кирдемс сельведензэ, а уш седе тов, зярдо кудост эйс тонады, мартонзо седе шожда ули. Ды сон ушодсь ладсемензэ:

— Тон иля мелявто, покштят пички!

— Саемень сы?! — кеняргадсь Оля.

— Покштят гайневтсь монень: кадык, келя, нуцькам учи аламнес. Зярдо пичкан, ардан мельганзо.

Оля чарькодсь: зярскак тесэ сави эрямс, бути покштязо истя кармавтсь сельмукшов патянтень.

— А ней адя кудонок теть невтьса, конанень вейсэнь кудо мерить. Содат мекс? Тесэ веенст эйкакшт эрить. Се нупалентень совавттан, косо удсеме кармат ды оят марто налксеме. Тейтернетне теть патякс теевить, цёркатне — лелякс.

Кундызе Олянь кедте, ды лиссть кабинетстэнть.

— Вантака, кодат мазыйть гирляндатне! Курок куз ускить, Од иенть вейсэ вастсынек. Казне марто, — покш залс совамсто мерсь Кира Петровна.

— Кузонть покштям усксы? — талнозевсь Оля.

— Покштят, нама. Якшаматя лемезэ…

«Верепаз-Идиця, — эськанзо ризнэзевсь директорось, — сон истямо вишка, натой Якшаматядо эзь марсе…»

— Наряжазь сы, кескав казне марто. Тонеть сень казьсы, мезесь сехте пек туи мелезэть.

— Даринт-даринт? — весёлгадсь тейтернесь.

— Даринт-даринткак… — талакадсь Кира Петровна.

Омбоце этажсонть се нупалентень совасть, косо ниле тейтерькат эрясть. Сынь эрьва кодамо иень, покштнэ вишкатнень мельга яксесть.

— Вана, тейтернеть, од сазорнэ тенк ветинь, карми мартонк эрямо. — Директорось велявтсь Олянь пелев ды поладсь: — Эно ёвтыка патять туртов леметь.

Олянень ледстявсь, кода покштязо тензэ мериль:

— Вишка-Вишкине…

— Кира Петровна, сонензэ, улема, Вика мерить. Те лемесь тензэ пек лади, — эзь кирдеве сех покшось.

Кира Петровна аламнес арсезевсь, мейле мерсь:

— Арась, арась, документтнэнь коряс сон кода Вишка-Вишкине юты, — манчесь тейтернетнень туртов. — Истя тензэ меремеяк карматано. Ды, ванодо, мартонзо чевтестэ кортадо, жалязь-васькавтнезь. Несынк, сон теке дюймовочка…

Вишка-Вишкине (те лемесь тензэ педязь педи) кармась эрямо покштянзо учомасо. Ялганзо налксесть-кеняргалесть, сон прок мезеяк эзь нее ды эзь маря. Сельмензэ икеле покштянзо чачось аштекшниль.

Нусманячис седеяк пек ваяволь, бути авольть анокста Од иентень. Урозонь кудось увнось мекшвелекс. Якшаматякс Кира Петровна арсесь тердеме артист, ды истямо, кона молевель Вишка-Вишкинень покштянзо ёнов. Текень кисэ сон ардтнесь се велентень, косто ускизь тейтерненть.

Эйкакштнэнень стасть од костюмт-платият, максозельть тонавтнемс стихть, морот, анокстазельть сценкат. Актовой залсонть уш варчнизь кирвазтемс гирляндань толтнэнь. Тевтеме эзизь кадо Вишка-Вишкиненьгак — совавтызь киштицятнень юткс. Кира Петровна кеняркшнось кисэнзэ: кунсолыця, превсэ весементь кундылизе, ды, кода неявсь тензэ, сехте мазый.

Ютавтсть репетиция. Киштеме вишкинетне лиссть лов тюсонь платиинесэ. Налксезевсь фортепианась, ды сынь ушодсть велямо. Кира Петровна Якшаматянь таркас тенст пшкадсь:

— Кить сельмень икеле цитнить?

Тонат моразевсть:

 

Минь, ашо ловнетне,

Кандыловонь повнетне!..

 

Од иенть весе эйкакштнэ учость. Сехте пек — Вишка-Вишкине, эдь варштамонзо сы покштязо!

Ды вана праздникесь! Эйкакштнэ наряжазь, кузонть перька ойсезь. «Ашо ловнэтне» понгсть кенкшенть икелев. Вишка-Вишкинень чамазо ловтаняль, неявсь, кода сон талнось. Оймензэ стакасто таргсесь, мерят седеезэ мештьстэнзэ ливтиксэль. Кенкшентень вановтонзо педявтозь педявтызе, покштядонзо башка киньгак нееме эзь бажа.

Зярдо кудыкельде эйкакштнэ маризь цёрань эчке вайгеленть ды мандосо вачкоеманть, залось пижнемадо пешкедсь:

— Якшаматясь сы! Якшаматясь!..

Вишка-Вишкинень сельме икеле теке кирвитолт велязевсть, сон мерят тунь лоткась лексемеде.

Якшаматянть вайгелезэ виевгадсь.

Покштязо свал ульнесь весёла, зярдо копордыль. Тейтернесь кармась пацинесэ сельведензэ нардтнеме.

Панжовсь кенкшесь ды залонтень совась… сэрей ды келей лавтов цёраломань. Лангсонзо якстере шуба, кедьсэнзэ пухонь варьгат. Ашо сакалонзо меште видьга. Прясонзо ашо шапка. Залганть сон келей эскелькссэ яказевсь, сонсь яла кедтнесэ ахолясь.

Вишка-Вишкине покштянзо лангс пштистэ вансь: истямо оршамкасо сон эзь яксе, чамазояк куяволь. Мезесь сехте пек дивавтызе — сон эзь лотка ваксозонзо. А, паряк, а неи эйсэнзэ? Вишка-Вишкине стясь стулонть лангсто ды…

Мандосонзо вачкоезь, Якшаматясь ютась ёлканть перька, лоткась залонть куншкас ды гайтевстэ кевкстинзе пакшатнень:

— Эйкакшт, мекс а неян Ловняське-нуцькинень? Паряк, содатадо, косо сон? Лездадо монень, сырентень, муемензэ!..

Тесэ сон маризе, кода кие-бути ноцковтызе шуба педе. Варштась алов — несь блёсткасо почодозь платиинесэ пелькапряшка тейтерне. Ашола чаминесэнзэ палсть лёмзёр тюсонь сельмть.

— Покштяй! — каня дивазь, каня кенярдозь пшкадсь сон.

Якшаматясь пульзясь икелензэ ды чевтестэ мерсь:

— Вай, ды те тон, вишкинем...

Эйстэнзэ мольсь винань ды таргамонь содавикс чине.

Тейтерненть вановтозо кивчкадсь покштянзо чамава. Якстересэ артозь чачось ды судось ульнесть ансяк чамаксокс. Вишка-Вишкинень кавтолдомазо солазь солась: те алкукс покштязо, эдь лемензэяк ёвтызе! Тейтернесь эзь кирдеве, кутмордызе кирьгадо ды лашсо аварьгадсь. Якшаматясь истямонть эзь учне — Вишка-Вишкине марто весе сэрьсэнзэ стявсь. Тейтерненть рунгинезэ сорнозевсь. Покштянзо марто а явомга кедензэ саеме эзь снартнеяк. Сон парсте топавтсь урозонь кудонь вешематнень, сэтьместэ ветясь прянзо ды тень кисэ, окойники, покштянзо марто васодевсь. «Покштяй, покштяй!» — тошксесть турвинензэ, кедензэ седеяк кеместэ лепштясть Якшаматянть кирьганзо.

Кира Петровнань теке лакиведьсэ валызь. Мезть ней теема? «Лездак, Осподи!» — эськанзо тошказевсь. Якшаматянтень салава, кияк аволизе маря, мерсь:

— Эйкакшкенть чавовсть тетянзо-аванзо, а умок покштязояк кулось, вейкине нежезэ. Инеськеть, озадо ваксозонзо, ладсинк-оймавтынк, праздникенть монсь карман ветямо.

Якшаматянть кедьстэ саизе наряжазь мандонть, лиссь залонть куншкас ды эчке вайгельсэ мерсь:

— Эйкакшт, праздникенть ветямо Якшаматясь монь кармавтымим! Ды тень, кемемизь, парсте топавтса.

Залось цяпазевсь. Якшаматянь таркасо неемс директоронть —дивань тев, теке марто сонзэ вейкень пес вечкилизь.

Эйкакштнэ киштсть-морасть, невтнесть сценкат. Ве валсо, кеняркшность. Ськамнензэ Якшаматясь тарка-эзем эзь мукшно. Натой винась, конань чияк мелень кепедемга симекшнизе, тензэ эзь лезда. Содазь, покштнэнь ютксто аволь эрьватась машты эйкакш марто озямо. Вишка-Вишкинень элесэнзэ нурсезь, сон натой псилгадсь. Ды тесэ тензэ ледстявсь… Зепезэнзэ кадовсь пей алов путомапелесь. Винанть копордамодо мейле стувтызе сэвемс, ды вана… Тонгизе кедензэ шубанзо зепс ды таргась тосто… мандарин! Сонзэ неезь, Вишка-Вишкине лоткась авардемеде, натой мизолгадсь. Ней сон то Якшаматянть чамас вансь, то мандаринэнть лангс. Казненть кекшизе коморо потс, таго покштянзо эйс лекшкадсь. Весе неезденть-марязденть сизезь, натой матедевсь.

Зярдо сонзэ кандызь эрямо нупалезэнзэ, Кира Петровнанень Якшаматясь мерсь:

— Вай, некак, пильге лангсто сяворян. Казнетнень тынсь явшинк, тень теемс виень а сатыть…

Копордась стопка вина ды автобусонь лотксема таркав капшазевсь. Сон истя муцявсь, теке вагон пенгть чамдсь.

Тейтернесь несь маней он: покштянзо марто кудост киякска кеверькшнесть мандаринт. Покштязо Якшаматянь оршамкасо, пейдсь-киштсь. Мейле кузонть перька кармасть велямо…

Зярдо валскестэнть сон панжинзе сельмензэ, тарканзо песэ озадоль Кира Петровна, кона вень перть эзь удо. Авась яла арсесь, мезе ёвтамс Вишка-Вишкиненень, бути кевксти покштядонзо. «Эрьва мезть карман манчеме, ансяк ёжонзо а коламс, — ютась пряванзо. — Обуцянь коряс тейтернесь седеймариця, тень исень чись невтизе. Верепаз, лездак тенек!» — эськанзо энялдозевсь.

— Сыргозить? — мизолдозь пшкадсь сон Вишка-Вишкиненень. — Течи праздникенть поладсынек. Ёвксонь невтеме тердинек някань театра.

— Мартонзо покштямгак сы?! — кеняргадсь тейтернесь.

— Кодамо покштядо кортат? — буто эзь чарькоде Кира Петровна.

Эйкакшонть чамасто мизолксось ливтязь ливтясь, сельмензэ позакадсть. Апаронь марязь, сон стакасто лексезевсь.

— А-а, покштят!.. — буто дивазевсь Кира Петровна. — Дык сон больницясо. Седе тов прянзо лецявтомо тусь.

— Покш-тям… — кувсезевсь тейтернесь.

— Иля мелявто, тосо сон а куватьс кирдеви. Тонеть кармавтсь: бути, келя, нуцькам вечксамам, кадык учи эйсэнь.

Петь… петь… — тусть Вишка-Вишкинень сельведензэ.

— Покштят энялдсь а авардемс, — Кира Петровнань вайгелезэ сорнозевсь: жаль тензэ марявсь эйкакшкесь, ды манчеманзо кисэяк визделгадсь. — Покштят истя мерсь: «Кадык Вишка-Вишкине весень эйсэ кунсолы. Курок варштамонзо токан. Сы Од иестэнть». Ие юткось а покш… — менсь аванть кельпбрясто.

— Сы Од иестэнть? — Вишка-Вишкине кепедизе прянзо тодовонть лангсто. Кевкстсь кемема ды теке басом чумондома марто: — А манясамам?

— Покштят велявты, вансак ва. Алтнеманзо сон свал топавтни, тонсь содат. — Кира Петровна таргась пацине, нардтнинзе тейтерьканть сельмензэ, мейле эсь чамантькак. — Ансяк, дочам, эряви маштомс учомо. Учомс сави цела ие. Тон тейсак тень, кеман. Истя?

— Истя, — мерсь Вишка-Вишкине, куш эзь содаяк, зярошка иесь.

— Превейнем-мазыйнем, ашти мельсэть, мезе теть покштят казсь? Вантая!

Тумбочкасто Кира Петровна таргась пешксе кулёк. Тосо ульнесть конфеткат ды… исень мандаринэсь. Конфеткатнень лангс тейтернесь эзь варштаяк, а вана мандаринэнть мештезэнзэ лепштизе.

«Верепаз-Инешке, улема, аламонь-аламонь ойми… Аволь тейтерне — сырнень поколь. Иень перть весемес тонады, тувако покштянзояк стувтсы. Эсень мартояк истя ульнесь», — оймазевсь директорось.

Мандаринэсь, конань казизе Якшаматясь, тейтернентень теевсь ялгань кондямокс. Мартонзо сон ютавтнесь оля шканзо, эйсэнзэ палсиль-вадяшиль, тошксиль тензэ мезде-бути. Тень салава тейнесь, зярдо ськамонзо кадновиль. Виде, неть минутатне пек чурольть. Урозонь кудосонть шкась истя явшезель — тевтеме кияк эзь аште. Кира Петровна эрьва ков кенериль. Содась: эйкакштнэнень ламось эзь сатно. Васняяк — тетянь-авань лембесь. Воспитательтнень марто сон весементь тейсь, ансяк кандомс тенст седе ламо кеняркст. Ветнесть пакшатнень музейга, кинова-кува. Сеедьстэ тердтнесть артистт, ошонь содавикс ломанть. Кира Петровна маштсь ярмаконь «теемеяк». Секс эйкакштнэнь чизэнзэ натой ветексть андсть.

Обуцянь коряс вишкинетне нусманячис а вайсекшнить, сыненст эряви касомс-кепетемс, пурнамс вийть. Уцяскаст мартояк а пелькстнить — тосо эрить, ков совавтсызь. Вишка-Вишкинеяк тонадсь од эрямонтень, косо весемесь чадыведекс чадсь.

Ве чистэнть мартонзо се лиссь, мезентень зярдояк ды лисемаль. Тумбочкасто мандаринэнть таркас сон таргась тюжа ваткавкскеть. Ялгатнень ютксто конась-бути эзь кирдеве ды лембе масторонь умаренть сэвизе. Тейтернесь васня талакадсь, мейле сельведть нолдась. Виде, а куватьс: покштянзо самс сон алтась а авардемс, нусмакалемскак тензэ а зярдоль. Кира Петровна пурнась эйкакштнэнь артомань урокс, сеть уш капшасть рисовамонь нупалентень.

Артомо Вишка-Вишкине вечксь. Артнеськак веенст мандаринт — моданть лангсо сехте мазыйтнень ды малавикстнэнь. Седе ледстязь: тумбочканть ваньксстэ кирдема, — ваткавкстнэнь сон ёртынзе шукшпрянь кирдема ведрантень ды ношкстась ялгатнень мельга.

Онстонзо шкань-шкань некшнесь покштянзо марто кенярксов налксематнень, ансяк Сёма атянь чачозо, сулей ладсо, аламонь-аламонь олыль. Чарькодеви, сон истя жо вечкилизе, ансяк иесь — кувака шка, пингстэнзэ пек ламось стувтневи.

Ды вана сась Од иесь! Эйкакштнэнь пурнызь наряжазь кузонть перька, весе седеень токнома марто учость Якшаматянть. Вишка-Вишкине, кода меляткак, «ловнэнь» платиинесэль. Сон секе тев талнозь ванкшнось кенкшенть пелев. Иень перть кассь-кепететсь, тонадсь ялгатненень ды Кира Петровнанень. Ней эзь содаяк, кода прянть ветямс покштянзо марто, бути тона варштамонзо сы. Пельсь эрямо кудостонть саемадонзо — тесэ вечкевикс ялганзо ды воспитателензэ, тесэ…

Кира Петровнаяк мелявтсь: мезе Вишка-Вишкиненень ёвты? Теке марто ёжонзо пек колызе телефонсо чиень гайневтемась — тензэ пачтясть: Якшаматясь, конань сыненст кучиксэлизь, пек, марят, ормалгадсь ды а сави. «Апарос понгат рузонь неть Якшаматятнень марто. Лекась, улема, куломс, минденек а ледстнияк, — эськанзо мурнезевсь директорось. —Ловняськетнеяк истят жо… Косто ансяк сынст мукшносызь? Мелень Якшаматяськак само а бажи. Мерсь, уроз кудосонть седеесь лотки чавомодо…»

Кира Петровна оршась Якшаматянь шуба, педявтынзе левштапокс тарныця сакалотнень ды, мандосо вачкоезь, сыргась актовой залонтень. Лоткась пекстазь кенкшенть икелев, пижакадсь:

— Косот эйкакшон? Учозь, нать, сизесть! Капшан тенк, вечкевиксэнь, капшан!..

Зярдо залонтень совась, весе канкстомозь канкстомсть. Якшам-атясь сельмукшсо, турванзо артозь. Директоронть вайгелень коряс содызь. Эйкакштнэ пижнезевсть:

— Те аволь Якшаматя, те Кира Петровна!..

Оятне Вишка-Вишкинень эшксесть лавтовс, куш тона сынтеместкак тень неизе. Вейкень эзь чарькоде: мекс покштянзо таркас директорост?

Кира Петровна налксесь Якшаматянь роленть каня кода. Вайгелезэяк сезневсь.

Вишка-Вишкине мольсь ваксозонзо ды кевкстизе:

— Кира Петровна, мекс покштям эзь са?

Аванть кедензэ нолдазь нолдавсть. Сон пульзясь тейтерненть икелев, панжизе кургонзо — ёвтамс мезеяк эзь ёвта.

— Кира Петровна, мон эзинь аварькшне, кода алтыньгак. Мон учинь покштянь, сон сайсь ды манимим. Истя а лади…

Вийтемечиденть ды колазь ёжодонть Кира Петровна чамас якстерьгадсь. Тейтернесь неизе, кода сельмукшонзо алдо поцерьсэ, покш кснавокс, тусть кевереме сельведть.

Вишка-Вишкине сонзэ вечкилизе весе седейсэ, ней директорось теевсь тензэ седеяк малавиксэкс. Зепстэнзэ таргась пацине, састынька кепединзе аванть сельмукшонзо ды чатьмонезь ушодсь сельведензэ нардтнеме.

Апак учонь васькавтомадонть Кира Петровна урсо аварьгадсь. Ниреждемасонть, конадонть ванстась эйкакштнэнь, ней сонсь куродовсь. Кутмордызе Вишка-Вишкинень ды, эсь валтнэс лепиякшнозь, бойкасто-бойкасто кортазевсь:

— Превейнем, мон истя тонь вечктян, кода кияк! Покштят а сы варштамот, теде содак. Сон сэредсь-сэредсь ды кулось. Ули истямо стака орма — сыречи лемезэ. Эйстэнзэ надобият арасть. Зярдо покшсто касат, тень тонсь чарькодьсак. Ней тонеть минек марто сави эрямс. Касомазот. Вечкть эйсэнек, кода минь тонь вечктядызь. Моньгак вечкть! Истя, кода ялгат вечксамизь!..

Зярдо, окойники, залось оймазевсь, ушодовсь Од иень праздникесь. Казнетькак ульнесть. Эрьвантень кулёконь-кулёк мандаринт макссть.

Веть Вишка-Вишкине несь тантей он: буто сон, покштязо ды Кира Петровна сынст покш кудонь залсонть, наряжазь кузонть ало кеверькшнесть мандаринт. Колмонест пейдезь пейдсть, а уш мандаринтнэде зярольть — ве оровтскак а кельгить! Ожола-якстереть, сынь чиньжарамонь панжовксокс неявсть ды кирвазтезь гирляндань толокс…

 

Категория: Мои статьи | Добавил: tati (26.08.2018)
Просмотров: 737 | Комментарии: 1 | Рейтинг: 5.0/1 |
Всего комментариев: 1
1 tati  
0
Пек мельзэм тусь ёвтнемась! Седейсэм совазь.

Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz