ТОЛБАНДЯ

«Мон прок зярдо-бути эринь Моданть лангсо ды вана таго эрян»,— неть арсематне сакшныть превс истямо шкасто, зярдо кувать ванан толбандянь толгельтнень велькска велиця сятктнэнь мельга.

Мекс? Косто ды кодамо вийсэ кандовить талновтыця арсематне оймсемань а содыця удемтнес? Мекс мон онстонгак неян толбандят, сэрей пандт ды латко потмакска чудиця лей? Неян толбандятнень перька ламодояк ламо ломанть, марян морот.

Зярдо толбандя вакссо аштемстэ конясынь сельмень, карми неявомо се лейнесь, конань некшнеса онстон. Ды мон прок аштян аволь неень чинь толбандянть икеле, а сень вакссо, кона монь эждясь ды ванстась ютазь шкань эрямосонть. Толбандянь лакштордомасонть монень маряви леень чольнема, вирень увнома ды васоло пурьгинень урнома.

Монень маряви, кода толбандянь лембесь канды оймем се шкантень, зярдо эскелясть эрзянь масторонть ланга минек сэнь сельме раськетне.

Зярдо толбандянь толось сизи ды мади раужо тонолтнэнь алов, зярдо сырнень сятктнэ сутямить ды чевте куловтнень пувсесынзе цецясо качадыця вармась, сестэ мон велявтан неень шкантень.

Аволь ансяк арсемат ды неемат сакшныть монень толбандя вакссо аштемстэ. Монь пилес гувныця толстонть ливтить валтомо морот, конатнень косто-бути марсинь ды мекс-бути стувтынь. Мон неть моротнень моракшнынь зярдо-бути ды вана стувтынь валост. Одс тень кодаяк а серьгедевить. Моронь гайтесь ашти васоло-васоло седеем потсо ды мекс-бути а лисеви ушов.

Тиринь народонь моротне совасть монь верентень ды кадовсть седеезэнь, паряк, сестэ, зярдо мои эринь се лейненть чиресэ, конань некшнеса онстон?

«Кода минек моротнень одс лецтямс? Кода велявтомс сынст гайтенть минек чачома кельс? Мекс а саты вием серьгедемс се моронть, кона бажи ливтямо седейстэнь ды кодаяк а сави келезэнь? Ков ёмасть, зярдо кулость эрзянь сеть валтнэ, конат кандсть кезэрь пингень моротнень гайтест? Кие тесэ чумось?»—кевкстнян мон эсь прям толбандянть вакссо аштемстэ.

Толбандясь нейгак корты монь марто, ансяк кодамо-бути пельс стувтозь кельсэ. Те келенть мон содылия, ней стувтыя. Паряк, толбандясь ёвтни ломантнеде, конатнень седейсэ чачсть эрзянь васенце моротне?

Зярдо лоткасть гайгемадо раськень толбандятнень перька минек моротне? Зярдо кармась коськеме эрзянь келень леесь? Зярдо...

— Кие ёвты, ков ды зярдо

Эрзянь келем тусь?

Ризксэсь седейсэнь, прок сардо,

Вай, авакай-Русь!

Эрзянь ломанть! Пурнавтано раськень од толбан­дянть перька ды вейсэ серьгедьсынек кезэрь пингень ды од моронок!

Зярдо кирвази минек раськень од толбандясь, мон пульзян сонзэ икелев ды серьгедьса се моронть, кона кенерсь седейсэнь.