см.Начало

Минь аштинек каштом лангсо, ванынек ды учинек, зярдо авам кузи минек ваксс. Сон варштась минек ёнов ды мерсь:

-        Эйкакшт,   садо   монь   ваксс,    ванан,    пекенк
вачсть.— Минь текень учинекак ды секс вейке омбоце мельга кеверинек каштомонть лангсто ды керьксавинек авань перька.

Бабам аштесь столенть песэ ды мурнесь:

—      А пештявикс  мацейть,   ансяк  ярсасть,   таго, теке вачо масторсто ливтясть.

Бабам васня вачкодимим монь начко нардамосонть, мейле яходсь сазоркатнень ёнов. Мои тень чарькодия эсень койсэ ды секс меринь:

— Бабай,   эзть  кирдеве   кежеть,   ялатеке  муить тувтал монь лоштямс.

— Ярсак, кель парго, иля тапаря мезть понгсь. Мои тонь аволь сень кисэ, мекс правтымик... Цямкат, теке туляка,— идесь эсь прянзо бабам.

Чокшнень омбоцеде ярсамодо мейле минь ойсинек каштомонть ланга. Те таркась минек туртов ульнесь сехте вечкевиксэкс. Каштом лангось ацазель кендесэ. Мон сеедьстэ уроконгак анокстакшнынь сонзэ лангсо.

Се чокшненть бабам таго мерсь монень:

—      Нуцькинем, сёрма черькстака покштятень.
Мон валонь апак ёвта карминь сёрмадомо. Ансяк сёрмадомась эзь лисе кода эрявсь.

—  Кунсолок эно, мезде эряви сёрмадомс,— окойники пшкадсь бабам ды поладсь:

—  Сёрмадт:   «Шумбрачи,  покштяй! Течи  февралень комськолмовоце чи. Кучтано теть покш поздоровт.  Течи тонь праздникеть,  покштяй».— Кенерят мельган? — Бабанень савсь монь учомс.

«Минь весе шумбратано,— бабам удомо сакшны миненек. Сон ськамонзо пели кудосонть веть. Велентень совсить дезертирт. Вейкенть минь бабань марто нолдтнинек удомо. Мерекшнесь, сон дезертирэнь кундыця солдат. Валске тусь Дурасова веленть ёнов. Мейле сакшность сонзэ вешниця солдатт».

Седе тов сёрмасонть ёвтнинь, кодамо паро ульнесь кизэсь, зяро саинек сюро. Шнынь минек эрямонть.

—  Бабай,   удомам   сась,— меринь   мон,— паряк,
ванды прядсынек сёрманть?

—  Скалонь вазыямодонть, нать, арась мелеть сёрмадомс? — кевкстимим сон ды мерсь: — Тень тонсь
сёрмадык ды мадть, левкскем. Монгак зярскак сутяман. Бути мезе, кевкстьсамак...

Мон кувать апак  арсе поладыя сёрманть:   «Покштяй, бабань скалозо вазыясь. Сак топодо ярсамо. Чи-кавто эрят, ды бабам таго нолдатанзат Карелияв воёвамо. Монь вана кодаяк а нолды мик кирякстнеме Якстере пандо лангов. Чихан пандодонть пелян кортамояк бабань марто. Сак, покштяй, седе курок. Тон, содан, нолдасамак налксеме ушов. Бабам, тонсь содасак, кодамо. Ие аштек вакссонзо — сон а мери: «Азё ковгак, налксек». Покштяй, толось кармась липнеме. Нать, прядовсь керосинэсь. Ванды прядса сёрманть...»

Авам ды сазоркатне удость. Бабам онстонзо кувсесь ды кортась. Сон сеересь минек лемтнень. Зярдо лецтизе монсенть, раказевинь ды меринь:

— А-а-а,  мезе!  Онстоткак монстемень тюк  теть сакшны?

— Вай, цёрынем, он неинь. Неия, покштят сась. Мои истя тонь кучинь вастомонзо. Вай, мейс пшкадить, валгак покштят эзь кенере ёвтамо,— пеняцясь бабам.

— Бабай, мон прядыксэлия сёрманть ды кероси­
нэсь лампасон маштсь.  Ванды сави одс сёрмадомс.  Седе ваньксстэ...

— Поздоровт роднятнень пельде эзить стувто кучомс? Шабратненьгак стувтыть лецтямс?

— Бабай,   мон  эзинь  маря  поздоровонь  кучома
мель сынст ёндо.

Бабам кувсезевсь.

—      Кикс тон туить?.. Теке пазе пря. Апак лотксе тонавтан эйсэть, ялатеке мезеяк а чарькодят. Исяк шабратне кевкстнесть,  мезть сёрмады Аляся.  Косо ашти немецтнень  каршо.  Неть,  нать,  а поздоровт? Сёрмадт:   «Весе  шабратне   кевкстнить  тондеть,   покштяй, арсить теть кеме шумбрачи».

Бабам а вечки, зярдо сонзэ валонзо кувать а чарькодян. Омбоце чинть сёрмась сёрмадозель одс ды нолдазель почтань ящикс. Зярыя шкань ютазь покштянь пельде сась сёрма. Сёрмасонть покштям ёвтась покш пасиба паро кулятнень пачтямост кисэ ды сёрмадсь: «Нуцькинем, сёрмат ловныя ламоксть. Ракавтымик аволь ансяк монь, натой весе ялгамгак пекест ёзасть. Сынь ней эрьва чистэ лецтнить тонь вейке кулянть. Тон, нать, пек капшить сёрмадомсто ды секс теить ильведькст, конат вельть ракавтымизь. Тон сёрмадат: «Покштяй, бабам... вазыясь, сак топодо ярсамо». Зярдояк, цёрам, иля капша. Свал одс ваннык топавтозь тевенть».

Мон лоткинь ловномадо ды ниреждезь меринь:

—      Бабай, простямак. Мон весе валтнэнь сёрмадокшнынь. Паряк, сынь нардтневсть ки лангсо.

Мон невтия тензэ васенце сёрманть, косо арасель те ильведьксэсь.

Бабам ловномо эзь машто, ды ялатеке сон монень кемсь. Сон оймавтсь ды ладсесь монь эйсэ:

—      Тон а чумат, нуцькинем. Васенце пачалксесь свал лисни пултазь ды пельсверек. Вана касат-кепетят, левкскем, морояк, паряк, сёрмадат.

Неть валтнэде мештьсэнь теевсь лембе. Умок те ульнесь, ансяк эрямосом васень се сёрмась а стувтови зярдояк.