Валморот
Фёкла БЕЗЗУБОВА

1880-це иень таштамговонь 26-це чистэ Од Мурзасо (Кочкурбуе) чачсь тейтерне, лемдизь церьковань койсэ Фёклакс. Ансяк эрзятне а вечксызь ф гайтенть, а стяко сонзэ эйсэ ушодовиця валткак кельсэнек, ловт, арасть. Тейтернен-тень кармасть мереме эрзякс: Сёка. Кияк сестэ, чарькодеви, эзь сода: сон минек сы шкань морыцянок, мазычинь невтицянок.

Кассь тейтересь, максызь мирденень, тусть эйкакшт. Эрямось мольсь а шождасто. Стакачитнеде истякак байтяк ульнесть, текень пес ушодовсь 1914-це иень войнась, мирденть саизь. Мейле революциясь, гражданской вой­нась. Ансяк неть коволтнэнь энгамомадо мейле, зярдо аламодо сэтьме чудильмас совась эрямось, редязель Сёкань покштояк покш ёрокчизэ: сон содась ламо морот, ёвтамот, одирьвань урнемат-аварькшнемат, мазыйстэ морыль, вадрясто лайшиль, сонськак маштыль моронь ладсеме. Тень пингстэ тунь а содыль сёрмас. Эрзянь сёрмадыцятнень прявтост А.Я. Дорогойченко явсь покш мель ёроков авантень: аравтовтсь мельганзо сёрмадыцят. 1939 иестэ нолдазель моронь васенце пусминесь, конань лангсо аштесь лем: Ф.И. Беззубова. Се шкастонть саезь Сёка патясь свалшкас со­вась эрзянь раськенть эрямозонзо.

Ризнэзь-мелявтозь пачтясь сон од пингедензэ:

Од пингем ютась, прок чаво варма,

Од вийнем солась, прок тундонь ловне.

Тень кис сыречизэ ульнесь пек седе уцяскав. А стяко сыречидензэ Беззубова кортась:

— Куш мон сыречи — тонеть олячи.

Пирянь кинетне ней весе панжовсть,

Пекстазь кенкшкетне ней весе панжовсть.

1941 — 45 тюремань иетнестэ Беззубова ладсесь ёвтамот, морот, конатнесэ невтинзе ломантнень ёжомарямост, фашисттнэнень а вечкеманть. Артистэнь бригадасо сонзэ сайнизь фронтовгак, зярыяксть морась солдаттнэнь икеле.

50-це иетнестэ, сыречинзэ лангс апак вано, Сёка патясь тонавтнесь ловномо ды сёрмадомо. Теде икеле сонзэ мельга сёрмадыцякс ульнекшнэсть Абрамов, Платонов, Радаев, Карасев, Кавтаськин, Гайни ды цёразо Беззубов Ва­силий. Неень шкане стака мукшномс, кона моротнень кие мельганзо сёрмадынзе: сестэ секретаренть лемензэ эзть тешта, кедьсёрмадовкстнэ эзть ванстово. Беззубова казезель кавто орденсэ, медальсэ. Кулось Сёка патясь 1966 иень панжиковонь 12-це чистэ. Сонзэ лем ало лиссть 10 книгат эрзянь ды рузонь кельсэ, сондензэ сёрмадозь ламо статьят, косо  ванкшновить весе ладсевксэнзэ. Неть книгатне улить библиотекасо.