 Валморот
Александр Васильевич Арапов чачсь 1959 –це иень сундерьковонь1-це чистэ Дубёнской райононь Кенде велесэ. 1977-це иестэ прядызе Кобалень школанть. М.В.Ломоносов лемсэ МГУ-нь журналистикань факультетэнть прядомадо мейле (1983) малав кавто иеть важодсь «Мордовский университет» газетань корреспондентэкс. 1985-це иестэ тердизь роботамо «Сятко» журналонь редакцияв. Ульнесь литсотрудникекс (1985-1989), поэзиянь ды публицистикань отделэнь редакторокс (1989-2000). 2000-це иестэ саезь – «Сятко» журналонь главной редактор.
Россиянь Писателень союзонь член (1994. Мордкизэсь нолдынзе поэзиянь ниле книганзо: «Вайгель» (1990), «Вальма» (1992), «Взмах» (2001), «Мейле» (2006). Стихензэ совасть вейсэнь сборникс, конат лиссть Саранск, Челябинск, Самара, С-Петербург, Москов, Хельсинки, Будапешт, Таллинн, Тарту оштнесэ.
«Литературная Россия» газетань лауреат (2000). Мордовиянь заслуженный поэт (2003).
Ютко шкасто седи гитарасо, ладси морот эсь стихензэ лангс.
Журнал "Сятко" №11, ноябрь 2009 г.
Паро, ули истямо поэт…
Чевте таркинесэ,
Лембе лушминесэ
Мадезь аштян — велькскам
Ков-бути васов
Шожда, теке валнэ,
Ашо пельне уи,
Ашо пельне уи,
Сонсь а соды ков…
Бути те стихотворениядонть-мородонть башка Александр Арапов мезеяк лия а сёрмадовольгак, арсеви, сестэяк улевельть сонзэ поэзиянть ламо содыцянзо-вечкицянзо. Пек уш оймень содазь, ноцк-ноцк седеень тантейстэ чавомас, невти неть зярыя строчкатнесэ эрямонть питнейчинзэ, мазычинзэ, моданть лангсо эрьвантень явозь марявикс-неявикс тарканть. Койсэнь, сонсь поэтэськак эсь творчествасонзо те стихенть лови тёкшокс, а стякояк од книгазонзо сон путозь васенцекс. Сонзэ эрьва книгась лемдязь башка смусть марто, вейке валсо: «Вайгель» (1990), «Вальма» (1992), «Взмах» (2004) ды вана — «Мейле». Истя лиссь, монень савсь улемс Александр Араповонь минек издательствасо весе лисезь книганзо редакторокс, секс, паряк, редявитькак тень сонзэ творчествасо кузематне-прамотне, од ёнкстнэ-тешкстнэ, полавтовоматне-кавтолдоматне. Сон свал ульнесь мелявтыця-ризныця поэтэкс. Истямокс кадовсь од книгасонтькак. Текень пес поладома: течи поэзиязо седеяк ризксэв-мелявксов. Тесэ, паряк, тувталось а шожда иетнесэ, лангозонзо празь стакачитнесэ? Ловнынк «Иванычень морозо», «Ильичень морозо» стихтнень, лиятнень, конат алтазь войнань темантень, авантень. Койсэнь, ава-поэттнэде домкасто А. Арапов маштсь невтеме аванть майсиця обуцянзо, эрямонзо. «Морось прядовсь», — прок лекстясь сон вейке стихсэнзэ. Эли ёвты истя: «Китне кольсть, ды молемскак а ков…» Ды прок виде ки лангс свал ливтить поэтэнть тетянзо марто кортамось, сеть малавикстнэ, кинь пельде а сави учнемс а кеж, а берянь, кинь марто чатьмонемаськак шожда, леци. Теке марто одс тешкстаса: кода сонзэ весе поэзиянтькак, тезэнь пурназь стихтнень яви домкачись ды оймень талномась. Кодат талновтыцят неень шкань сонзэ поэзиясь, стихтне, косо кортамось моли войнадо, армиясо служиця минек цёратнеде, сетнеде, кить ютызь Афганонть… А содангак, ёвтась-арась эрзянь поэзиясо кияк лия истя штавтозь ды истя ваньксстэ, мазыйстэ вечкемань ёжодонть … А. Арапов ёвтась. Те, нать, алкуксонь поэзиянть истямо виезэ — эрьва валось ёвтазь прок меельцеде, ды лиякс, — седе шождасто, седе парсте, — уш а ёвтавияк. Маряви, тон эсеть оймесэ кенерстить сынст ды поэтэнть марто ве вайгельсэ, ве лекстямосо ёвтыть весенень марямга. Ансяк содан, аволь эрьванть Пазось казизе истямо оймесэ-ёжосо: весень кисэ ёвтамс сехте домка, сёпозь-кекшезь, а ёвтавикс мельтнень ладсевикс валсо, панжомс оймень вальманть. Сюкпря Пазонтень — муизе самай те ломаненть. Сюкпря поэтэнтень ойменек сыргозтеманть, седе пек токновтоманть, ледстнеманть кисэ. Сон теке гайни струна — сурот эль токавтсак, вайгель максы. А стяко цёрась ламо стихензэ ладсинзе морокс, сонсь гитара марто морсияк эйсэст. Паро, ули эрзянь литературасо истямо поэт. Сон келес панжизе икеленек аволь ансяк эсензэ томбазь-раздезь седеензэ — минек ойметнень штавтынзе икеленек. Алкукскак, теке чопавтнят эсеть оймес, потмаксос неят весементь, мезе ули эйсэнек ды пертьпельганок…
Тамара Баргова |
