ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Андю Петрянь. Модамарь лукшонь тансть ды «тетяй» валось

Модамарь лукшонь тансть ды «тетяй» валось

Алтави монь вечкевикс Аляндрань Лиза сырькайнень ды Петрянь Вихтор покштянень,конат казизь-максызь тень сехте васеньце лембе ёрокчинть, гайтев эрзя келенть ды виев коенть, конатнес нежедезь мон молян эсь эрямо кивам, конантень мерить – Монь Вечкевикс Эрямом.


Монь покштям Вихтор-атя вишка пингстэ кайсь кажовсто. Секс миненек мериль, кода минь нулгодекшнынек куя сывельде ямсонть, эли эзилинек севе кши сускомонть весемензэ: - «Эзиде сода тынь кажочи, цёрынем, секс вешнетядо тантей печтть, - у…у…» - ды сельмсэнзе лымбадиль сельведь эрьге. Ёжосом мон марилинь, покштянок кундызе мельсэнзэ эсензэ вишкапингензэ, стака читнень-ветнень, сетнень, конатненень мерить - «яттнэненьгак истямо эрямочи а максовлинь печтямо-ютамо». Истя сон эстедензэ мериль. Арсян, кинеяк неть стакачитнеде сон пек эзь ёвтне. Ансяк мартом чуросто, зярдо а зярдо, кортнесь, лецтнесь эйстэдест тев юткова…

Кода мельсэм кирдян, ёвтниль Лиза сырькаем, покштянень ульнесть котошка-сисемшка пиже иинеть, зярдо сон сась эрямо Одпиче велев Од Маколейужо велестэ (рузокс – Маклауш) Спиридонов покштянстэнзэ. Сонзэ тесэ содылизь, мерильть тензэ - Аляндра атя. Кудолемтне сынст ульнесьть вейкеть, секс а эрявиль молемс ЗАГС-ов сюлмавкс сёрмадовкс конёвтнэнь эйс тееме. Секскак сыре атась кувать апак арсе нолдызе од аванть. Атясь ульнесь ёроков, колонькемень иеде седе сыре Лиза сырькайстэнь, конантень сестэ ульнесь кемкотово ие, ансяк сонензе зняро а максат.

Молиль 1946 ие. Аляндра атя эсь кедьсе тейниль парьнеть, крандазонь чарыть, весе кудоютконь кедьёнкстнэнь маштыль тееме чувтосто. Кардазонь пирявкснэнь-ортатнень томбалев пачкодиль-чадыль чувто чинесь ушов, кудонть перька сравтовиль поень-пичень чине, тумонь-килеень чувтонь тансть. Се ламбамо чинесь прянть сюлмиль-чаракавтыль, мик пильге лангсто правтыль. Полазо умонь кшкасто кулось, кадызеть сонзэ кавто тейтерь-пакшанзо марто. Секскак, кода Лиза тейтерьнесь сась сонензэ совамо полакс, сон вейкеяк пельвайгель эзь кавтолдо саемензэ, содыль - кудосонть эряви азорава. Пек стака ульнесь сонензэ кудоававтомо, кардазонь лездыцявтомо. Ней вана седеезе лембелгадсь – карми улеме кинень мельганзо якамо ды кардаз тевтнень мельга ваномо.

Атясь таргонть перть теиль парьть, шлямочистэ крандаз пештязь туиль Клявляв, базаров. Миилинзе теевксензэ курок, велень ломантне парсте саильть парьтнень. Кинь куроксто тейтерензэ чиямо сыть - эряви пурнамс чиямо парь, кинь ташто паресь вариясь – курок эряви полавтомонзо. Велесэ паресь ульнесь ломанентень лезэвдеяк лезэв улипарокс, сонзэвтеме вейкеяк кардазсо эзь вельмакшно эрямо, сон ульнесь эрзянь эрямооймень кирдицякс, паресь ульнесь васенце неицякс-редицякс – кода вельмиль эрзянь эрямось. Крандазонь чарытнеяк туильть-микшневильть парсте – сы сюпав ломань лия буестэ, соды – сехте парт, кеметь-нардевть чарыть теи Одпичень Аляндра. Секс сонзэ ярмункасо содылизь весе. А весть сюпав рузось максниль атянтень мик кеменьшка целковойть верьга паро теевкстнэнь кис. Чокшнэ ёнов Аляндра атясь рамиль «пиже ведтенть», пря колсема симемканть, ды тунь превень веляскадомс педе пес нолдылинзе саень ярмактнэнь. Истя ульнесь икеле, зярс сонзэ эзь ульне полазо. Ней эрявсь трямс кавто ломанть эсензэ кавто тяканзо марто – поланзо ды цёранзо, кона касы сонензэ лездыцякс, кода арсесь атясь эсь пачкаванзо тевтнень юткова. Весть-кавксть сась ярмактомо атясь - мурнизе сонзэ Лиза-мазавась. Лия микшнема читнестэ сась атясь казне марто – цёранстэнзэ рамась кемть, Лиза поланстэнзэ казсь мазый сюлгамо. Аляндрань кудосонть се чистэнть ульнесь алкуксонь кенярксчи.

Ансяк аволь эрьвачистэ ульнесь истяня парсте ды видьстэ. Таргонть перть ульнесь седе стака, - седе пек стака ульнесь Вихторнэнь. Аляндра атясь эзь нолда цёрыненть эсензэ «чувтонь» тевтненть юткс, ды покшке тейтерензэ пеедекшнесть тень кувалма лангаванзо, секскак цёрынесь эрясь-аштесь эйстэст та-кода явозь. Стязь валске, сон куроксто пурныль кардазов - эряволь урядамс ракшатнень мельга, кандомс ведь аванстэнзэ – се пижеть ванозь анокстыль уштоманть, куроксто ярсамонь пидеманть эряви ушодоманзо. Вихтор ульнесь аволь серей цёракс, кода мерить истямотненень - «эзь лиси сэрьсэ», ансяк тень кувалма алясь пек эзь ацирьгавтне, сон содыль - куроксто сонзэяк шкась сы ды сон касы. Эрьва чокшнэ ёнов капшазь чииль утом ютков, тесе сонзэ ульнесь салаватевезэ – сон кирдиця чочксонть тейниль тешкст. Эрьва чокшнэ ваныль - кайсь-арась сон течи? Меельцекс чарькодиль: касомась эзь сырьга… Сон нусмакадыль.

Ансяк церась ялатеке капшиль малавгавтомс се чинть, зярдо сонензэ лоткить мереме «нурькине». Сонзэ рунгозо ульнесь келей лавтов, ашназа черензэ, сельмензэ молилть сэнь менеленть ёнов, ды те пек мазылгавтнесь сонзэ эсь шкасто лия цера пакшатнень ютксто.

Вихтор эзь пеле кодамояк важодемадо, вишка пингстэнзэ редизеть вейкенть - аванстэнзэ эряви лездамс апак кевкстне – мейсь ды кинень те эряви. Сон содыль, авазо теи тевенть, секс те видестэ молема тев, эряви весе вийсэ сонензэ лездамс тень эйсэ. Сон вишка пингстэ саезь содыль эсензэ киськесэ-рунгосо, эсь прясонзо, мезе сон истямось - кажочись. Аволь киньгак ёвтнемасто, сон содыль эсензэ эрямокистэнзэ: сеть кежей читнень-ветнень ютыль косо кепе, косо штапо. Секскак покштояк покш мелезэ, конань сон учось Инешкепазонть пельде – зярдояк вадрясто ярсавомс пештязь пекес. Зярс, мельс саезь эсензэ эрямонть, сон ульнесь вачо, пекень апак пештязь. Урномась-мурномась пексэнзэ ульнесь урень морокс, арсесь Вихтор. Секс, кода аванзо марто пурнасть само Од Маколейужосто тей, Одпичевелев Аляндра атяньтень, Вихторонь оймезэ мизолгадсь - тесэ карми шождасто сатовкшномо ярсамопелесь! Ансяк, лиссь весе лиякс, аволь кода арсесь од церась. Васенце само чокшнэнть Лиза тейтересь пидесь пакшатненень марчонь ям, конас каясь суро коморо, керсесь вейке модамарь, каштомсто таргамодонзо икеле петизе човазь алсо, тантейгавтызе вецаямонть пенш кансёро ой пенчсэ. Истямо тантей чине удалсь кудованть тусь! Вихторонь пексэ курок стясь Инеормась, ушодсь урномо - вешеме ярсамо. Церась ловсь шкань пелькстнэнь, училь кода весе озыть морганть экшс. Аляндра атясь ульнесь теке шержей киска, ансяк эсь тутманзо пештиль. Мерсь Лизанень пидеме эсьтензэ колмо апак ватксе модамарть. Истямо литнестэ явицякс невтизе прянзо, тынь ярсадо вецанадо, мон ярсан модамарьде. Вихтор, пидемстэст састыньге варштниль лакиця ваканонть лангс каштом кургованть. Сельгесь састыньге пурнавиль кургсонть, сон сонзе салава нильниль. Модамарень чинесь чаравтызе и сюлмизе прянзо. Сон арсезевсь, кода сон куроксто од велень ялганзо марто карми пуштамо модамартнень толбандясо. Истямо пуштамось ульнесь Од Маколейужо велень церынетнень ютксо Ине коекс, конань содыль-топавтыль эрьвась. Вихтор арсесь, тесэ, Одпичевелесэяк те коесь ули. Якиль истямо ёвтнема шержей атятнень пельде: киртазь-пултазь модамарень лукшось ульнесь салавачикс, мартонзо а эрявиль налксемс. Теде содыль эрьва пакшась. Сонзэ а ёртылизь, а поцилизь. Сонзэ эряволь севемензэ педе пес, паморьксоньгак апак кадо. Сэвсак - мейле а кармат пелеме мик вергиздэяк вирьсэ. Теде содыль эрьва пакшась. Велесэ, те ульнесь сынест невтевксэкс верде, мезес кияк эзь кортавтне, эзь тонавто! Секс Вихтор истяня ваныль-ванстыль лакиця ваканонть, конань севильть ёроков, киштиця толгельтне галанкасонть ды ацирьгалезь арсесь – зняро лукшт ёмасть стяко. Те арсемась мадстизе церанть оймензэ, сельмензэ пекставсть. Стака чись ульнесь течи, онстонзо несь, кода сынь рудазганть ардсть Одпичевелев, мельгаст сась сонсь шержей Аляндра атясь, кода ашназа алашась рысьсэ ардовтызе кудо видьс – тесе сонзэ училь ярсамозо, секс ардсь апак лотксе… Се шканть марязевсь Лиза аванть вайгелезэ: - «Озатано ярсамо, атяй, пакшат! Адядо коршамо мезе максь течи Нишкепазось миненек,» - Лиза путызе покш чакшонть морганть куншкас, эрьва пакшаньтень макссь чувтонь ямкедьге чувтонь пенч марто. Атаньтень венстинзе колмо модамартнень. Сон венстизе ве ёнов ваканонть, саизе эсензэ покш пееленть, пекстазь кшипарьстэ таргась кши калаця, кармась канзёрдозь керсеме кши печтьть. Пакшатне кургонь автезь ваныльть те керсеманьть лангс. Тейтертне умок эзть маря кудосо панезь кши танстенть. Кода аваст кулось, атясь рамсиль кошксеть, эли шабратне сонензэ шкань-шкань микшнесть кши. Омбоце ёндо, те ульнесь васень тев - Лиза течи васенцеде невтизе кшинь панема ёрокчинзэ. Атась колмксть кенерьсь ярсамодонть икеле ёвтамо соненде лембе валт – тестэ лисиль, панемась пек тусь атянть мельс. Те паро, кирдсь мельсензэ Лиза.

Вецаямось ульнесь пек тантей, пакшатне эсть кенере марямс-содамс сонзэ тантензэ, - истя куроксто сынь коршасть. Ансяк марявиль чувтонь калькстнемась ярсамонть перьть - пенчнэ ёзыльть ярсамокедьгтнень. Аштесь каштмолема. Ярсамонть юткова а кортыльть – теде содыль эрьва вишкенесь. Косто те коенть саизь, кияк аздыль, ансяк весе ярсыльть чатьмонезь. Эрьва пакшантень сатотовсь кши печть, покшоньтень - кавто, истя кастыльть вечкема важодема тевеньтень ды сыре ломаннень. Велесэ эрьва кудосонть панилть ансяк розень кши, панезь ашо кши эрсиль ансяк сюпав ломанень кудосо.

Пакшатне учильть кшинь ярсамонть, розень кшись максыль паксянь чине, эйстэнзэ молиль ломанень важодима виень тансть. Пакшатне содылть кшинть питнензэ, секс эрьва паморьксэсь кепедевиль-саевиль морганть ланксто. Ярсамонть перьть Вихтор ваныль, кода Аляндра атясь ярсыль модамартнень. Сон ватксиль лукшонть, почодыль салсо ашназа модамаренть, сускиль кшиде ды пиже пейчурькадо… Вихтор теке эсь кельсензэ мариль модамарень тантензэ. Те мельденть-арсемадонть кургсонзо кармась пек пурнавомо сельгезэ. Ансяк эсензэ ярсамось ульнесь аволь истямо ламбамо.

Атась куроксто прядызе ярсамонзо, стясь морганть экшстэ, лиссь кудыкелев – пурдась пыхадемканть. Тень шканть, уштома икелькссэнть Лиза пурныль ярсамонть мельга, Вихтор сонензэ лездыль. Зярс авась велявтсь уштома кургонть пелев, Вихтор ёндолокс судринзе коморозонзо лукшнэнь, конат кадовсть атянть ярсамодонзо эйстэ, ды курокке ёвкстынзе зепезензэ. Оймезэ ойкадевсь церыненть, сон содыль – лукшнэнь сон идинзе. /////

Куроксто лисезь кардазов, Вихтор латотнень пачк вармакс чиезевсь утомонть ёнов – эсензэ салава таркантень. Тесэ сонзэ ульнесь мельсэ налкома ды арсема тарказо, косо сон кортниль эсензэ омбоце «Мон» март ды, шкань-шкань, Инешкепазонть марто. Понань сурестэ ды алашань пуло черьстэ сон понась нурсема пикс, кеместе сюлмизе сонзэ теске касы чувтонь эчке тарадс. Ней ульнесть эсензэ нурсеманзо. Сон кекшниль сынст тейтертнень эйсте, а мезекс сынест тесэ ульнемс, арсесь церакаесь. Озась нурсематнес ды кармась таргсемест зепс кекшезь лукштнэнь ды капшазь-капшазь ёвкстнемест кургозонзо, ва кияк аволизе нее. Сон эрьва лукшкенть путылизе келензэ лангс, пурнавсь арсеманзо марто ды ансяк ней таргизе оймензэ. Весе виензэ путозь ушодсь поцеме лукштнэнь. Шкань-шкань сон кель чирькссэнть велявтниль лукшонть ды кармиль поцемензэ седеяк виевстэ - мезеяк аволь кадово апак севе. Теде мейле кургоньтень понгиль омбоце, колмоце, нилеце… лукшкесь. Вихторонь оймезэ тень пингстэ менельга ливтнесь. Ансяк… Мезеньгак виев таньте сон кургсонзо эзь маря. - Мекс? - кевкстнесь эсь прянзо алясь?!!! Прязонзо сыль вейке ёвтамось: – Аляндра атясь весе модамарь товонть севизе, лукшоньтень мезеяк паро эзь кадовояк. Теде цёраньтень теевсь берянь. Инеормась пексэнзэ урнозевсь, мекс мезеяк эзь муе ярсамо. Содазь, вецаямось ульнесь ансяк веднекс, эйсэнзэ эзь ульне ярсамонь топодема пелькст, секскак пекесь вачсь, эзь кенере топодеме.

Виктор алясь аволь куроксто кармась Аляндра атянть лемдямонзо тетякс, цёрынесь сондензэ виздиль, аздыль, косто саемс зняро ойме вий аволь раське ломаненьтень пшкадемс те паро валсонть - «тетяй». Цёрась содыль, те шкась зярдо а зярдо сы, кода киньгак апак кевкстя пры-ацы лов сексенть мельга. Секс сон эсь пачкаванзо те пшкадема валонть ёвтниль ды ёвтниль… Ансяк, зярдо сон ёвтасы седейстэ-ойместэ лисевезь «тетяй» валонть, сон аздыль.

Ды Инешкипазось макссь сонензэ истямо уцяска, кода мерить, ютавтомс арсеманть эрямо лувс. Мерить, Верепазось верде весементь несы, соды, мезде арсить-мелявтыть эрзятне, кие сонзэ лецтни, кие сельме икельга эли удалга сонзэ марто корты, сонсь тень пингстэ рузонь ознома кудов бачканьтень ярмактнэнь канды. А эрзянь Пазонть а лецтнияк эрзянь озномасо.

Ведь лисьмась Аляндрань кудонть эйстэ ульнесь аволь васоло, кинть трокс, теяк тейтерьаватнень туртов марявиль аволь маласо. Рудаз, эли давол шкасто стака ульнесь ведьс пандо ёнов кузнемс. Истя, тунда Лиза кандтнесь ведь. Ульнесь шлямочи, куроксто Инечись сыль, секс эряволь муськемс-лопавтнемс, урядамс-пурнамс ды мазылгавтомс кудонть. Атянть тейтерьнетне, Олда Наста марто, эзть лезда Лизанень, пряудемест берянстэ важодсть, секс шкань-шкань тень коряс сынст кудосонть ульнесть сёвномат. - Кавто покш тейтерьть, а лездамо а капшить пек! – А парсте лисиль… Нейгак вана Лиза ськамозо кандтни ведь виев вармань пачк, рунгозо ливезь потсо, ды ушосонтькак тарькс якшамо. Кеменьцеде сась лисьма кургонтень, панжизе лисьма лангонть, куроксто нолдызе амольдямо ведранть – капшиль, суньдерьгалесь, а сонзэ ёвариматне а прядовить кодаяк. Бадиянь кундамкась меньсь кедьстензэ ды парсте охризе. Тейтерьнесь ёртовсь лисьмапрястонть ломанень кавтошка эскелькэс. Оймезэ аванть ёмась, ков - сон сонсь аздыль … Терявтокшнось стямо – арась, виезэ тусь весе, кода мерить, модас. Тейтерьавась сетьминестэ аварьгадсь. Мельс саекшнесь ранкстамо, ансяк вайгель сантнэ эзть максо мезеньгак гайть, а сатыльть виензэ коштонь саеме. Сон содыль, куроксто сы виесь, эряви ансяк парсте саемс кошт, сестэ куроксто сон стяви модастонтькак. Вихтор се шканть лазныль пенгть кардайсэ, неиль, авазо капшазь кандтниль ведь муськеме. Церась саизе мельс, авазо ютась лисьманьтень, ансяк одов кудов эзь ютакшно, мекс истя?! Аволь ва меньгак зыян мартонзо теевсь, кевкстнесь алясь эсь прянзо?

Седеезэ кармась токномо седе виевстэ ды сеедьстэ. Ёртызе узеренть пенгень костёронть ёнов ды курокке вармакс чиевсь ортатнень трокс. Теке шканть сельмензэ вешнесть аванзо. Лисьмапрясонть неявсть ведень канднема парькатне, авазо тосо арасель. Сон ёндолокс чийсь лисьма прянтень, косо тикше потсо редизе аванть рунгонзо. Седеезэ церанть тусь мода алов, седеезензэ пштикс совась пшти салмукссо, кармась сеземе мештензэ, сельмсензэ чоподавсь… Сон курокке комась аванзо вельксэс. - Авай, мезе мартот ?! - сорныця кедьсэнзэ токадевсь Вихтор аванть рунгозонзо. Сурсонзо штюпизе седеензэ, сон, марявсь, сорныль. Те пароль, мельс саизе церась. Куроксто чийсь кудов, совась уштома кудос ды, зняро ули вий, рангстась Аляндра атяньтень: - Тетяй! А тетяй! Курок, листь курок! Аванень берянь! Сон лисьмапрясо мода лангсо празь!.. - церанть сельмсэнзэ пурнавсть сельведь повнеть. Сон сынст куроксто нардынзе панар ожасонзо. Аляндра атянть седеезэ тусь каськав – церазо мерьсь сонензэ «тетяй». Кургсонзо лимбалгадсь мизолксось… Ансяк, аволь шка ульнесь теде арсемс, эряволь курокке чиемс лисьмапряс. Сон кутмордызе Вихторонь лавтовс, сорнозь, тонгинзе лембе кемензэ ды чиезевсь церанзо мельга лисьмапряв.

Мезеньгак покш зыян Лизань шумбрачизэнзэ эзь ульне. Сонензэ путсть мештезэнзэ салов ведень тапярямо. Секе чинть томбазь кедезэнзэ сась шумбрачи, кода сынст вейсэнь эрямозосткак – сась шумбрачи!

Те ёвтнемадонть Лиза сырькаем сельмезэнзэ пурнавсть сельведть. Ютасть ламо кизэть-телеть те эрямо шакстонть. Ансяк, мон несать - сынь кадовсть монь Лиза сырявань седейсэнзэ, оймсензэ. Курок сонензэ топоди сядо иеть, ялатеке сон «се эрямонть» кирди мельсэнзэ-прясонзо, кона а максы тензэ удомо, а максы эйстензэ а кортамо ды а ёвтнеме. Туи Тоначив, сон «се эрямонть» сайсы мартонзо, секс мезде-мезде сон ёвтниль монень – эсензэ вечкевикс нуцьканстэнзэ, Андямонень. Арсян сон монень истя мериль «андямо» эли «андомс» валтнэнь эйстэ. Мон содан, пакшатне тензэ весе трявсть-андовсть!

Андю Петрянь, С-Петербург ош, Медьков-таштамков, 2006 ие.

Категория: Мои статьи | Добавил: tati (04.01.2010)
Просмотров: 705 | Рейтинг: 5.0/2 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz