ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Александр Тикшайкин. КЕМЕНЦЕ ПИНГЕСТЭ ИНЖЕ. Евтнема
см.Начало

***

Озность-тейсть, пештясть керень кептерьс товзюрот, понгавтызь карькс вельде мештезэст ды сыргасть видеме. Кувака сакало мартось мольсь васенцекс, мельганзо — лиятне. Весть эскельдить — видьметь ёртыть, омбоцеде — таго сравтыть.

Кодамо мельспаро неявсь чачостост те шкастонть, кодат сяткот палсть сельмесэст! Мерят ве текеньс пингест перть бажасть, ды, паряк, те истя ульнеськак?

Видизь соказенть, кундасть паксянь омбоце пельксэнть вансь-кавтомо. Топавтсть те тевенть истя: кавто цёратне якасть тей-тов минань вешнемка марто. Мезе муить, путсызь крандазс. Зярдо крандазось пешкеди, сакаловось усксы лишмесэ сэрей латко чирес ды чукадьсы потмаксос.

Пелезь ладсо молинек латко чирентень. Верепаз, мезе ансяк тосо арасель! Снарядт, минат, кодат-бути химикатсо пештязь кедьгеть ды лият мезть.

Седе тов ванськавтыцятне озасть чувто алов ярсамо. Минь молинек ваксозост. Кортазевинек.

— Кода леметь? — кевкстимим сакаловось.

Михаил.

Тетят-ават косто саизь истямо лементь? Сон эрзянь, нать? Вай,  эрзят,  эрзят!  Апаро  онсояк эзинь некшне  истят нуцькат! Аволь ансяк леменк, превенкак полавтынк. Те мезе истя пертьпельксэнть  марто  теиде?  Икеле  вирьс  соват    сеске  нумолос эли сярдос эртеват. Эрькесэ, лейсэ экшелямо пелилить — калтнэ тувошкальть, секень вант, сявордтадызь. Ней тесэяк, тосояк мезеяк а неят.

Паксятнень сюронь таркас минасо, снарядсо, ракетасо, лия апаросо виднетядо. Мезе, арсетядо, кши ланга вадемс эли якшамо шкане лангозонк оршамс сынь тенк маштовить?

 

***

Видицятнень вакссто туинь нусмакадозь. Алкукскак, эрямосонок ламось теезь аволь пек превейстэ.

Теке марто сакаловонть валсто кой-мезесь эзь чарькодеве, савсь пшкадемс Петровичнень.

Те мень нуцькадо тосо кортась? Ломанесь сон аволь сыре, секс нуцькакс тензэ кодаяк а ладятано.

Ды тон мезть?! Содат, кодамо пингестэ чачсь те Тумаесь? Кеменцестэ!   Чачсь   сестэ,   вельмевтезь   ней.   Московонь   вейке профессор вельмевтизе, калмсто таргазь ловажасто теизе. Мезе, а кемат? Минекак превенек васня чаракадокшность теде, мейле  аламонь-аламонь кемезевинек. Наукась, неяви, ламо мезе машты тееме.

Тумаень валонзо коряс, икеле сон пек сюпаволь. Ульнесть, келя, эрькензэяк, леензэяк, вирензэяк, паксянзояк. Весе сынь аштесть минек веленть перька, секс, нать, лемезэяк истямо. Калмсонзо ульнесть сырнень ды сиянь эрьва кодат кедьгеть, таташкеть. Ней эйстэст кой-конатнень миинзе ды идезь ярмактнень лангс рамась лишме, видьметь. Теде башка эсензэ кедензэ-як сырнень, эрьва мезе машты тееме.

Мартонзо важодиця цёратне косто саевсть?

Минек велень. Эйстэст вейкесь тюрсь Афганистансо, омбоцесь — Чечнясо. Войнась, кода содазь, парс а пачти. Превест аламодо   велязькадомо    кармакшность,    наркотикте    симсть-таргасть. Зярдо вастовсть Тумай марто, теке одс чачсть, ней а симить, а таргить. Аваст Тумай лангс озномодо а лотксить.

Сыньгак Тумаень кой-мезес тонавтызь — пушканть, минатнень перька чарамо. Тынсь рединк — ней сон виде-паро артилле­рист.

Те весе апарось косто паксятнень лангс саевсь?

Ведьгеменьшка иеде икеле минек колхозонь весе паксят­нень максокшнызь войнань склад алов. Косо складт — тосо ламо солдатткак,   столовойтькак,  лавкаткак,   машинаткак.  Тозонь  эсь олясо важодеме понгокшность Тумоюронь ламо эрицят ды тень кувалма пек кеняркшность. Содатадо мекс? Пандсть тенст тосо вадрясто, вана мекс.

Шкань ютазь складтнэнь саизь лияв, паксятнень кадызь апак ванськавто. Теде мейле велесэнек ушодовсть истят тевть, конатнеде ёвтнемскак стака: ломантнень эйс кармасть педсеме минень-сюнонь ормат. Вай, минас уш зярот кенерсть сезевеме! Шабрань цёрынест оно. Истямо мазый ульнесь. Мусь паксясто снаряд, ушодсь эйсэнзэ молоткасо панжомо. Колмоце чистэнть ансяк панарнэнзэ муизь... Секс ков а эряви ней а якатано. А вана ракшатненень тень а толковасак. Коромось тенст свал а сатны. Весть скалонь пельстада совась минадо пешксе пакся лангс. Кавто цёрат мольсть панемест, ды теке неевтест ульнесь.

Зярдо Тумай марясь теде, сеске кундась нист туртов лездамо: зярдо пирест сокасынзе, зярдо уштомапель тенст уски. Неть самай сеть од аватне, конатнень неинек течи попонть вальмалдо.

Тумаень тевензэ бачканть мельс эзть туе. Сон кармась нолдтнеме Тумайде минень-сюнонь апаро кулят: язычник, марят, сон, шарлатан... Тень кисэ патясь ды сазорось кодак куродсызь весть попоить веле куншкасо! Весе сакалонзо ноцоризь. Те, келя, кие апаро ломанесь?! Тумай оно чинек-венек важоди, паксят ванськавты, а тон мезе вадря теить? Саить велень-сядонь ломантнень меельце трёшникест, алтыть лангозост церькова стявтомс, тонсь тень таркас эстеть алцек-верцек кудо варсодить.

Мезе, видестэ сёвнызь?

Кие соды? Ансяк, алкукскак, ярмакт аватне велень келес пурнакшность, церькова ялатеке те шкас арась.

Вирь чиресэ кудыненть ваксос ракетатне кода понгсть?

А-а-а! Сеть ракетатне...— пейдезевсь Петрович. — Те Ту­май стявтнинзе.  Сестэ эзь сода,  мезть неть истятнэ.  Вансы — валанят,   сювозь,   теке   анок   палманть,   ды   кувать   апак   арсе ёвкстнинзе кудонть перька. Ней, паряк, мекев таргсевлинзе, ды косто  таргасыть —  муевсь вейке  пеедькшниця,  тонавтызе  алк-
сост бетонсо валомс. Ней азё варчить токамс...

Мекс велень прявттнэ ковгак а ёвтыть неть ракетатнеде, пушкадонть?

Начальниктнестэ тесэ ансяк вейксэ иень школань директорось. Сон, виде, воинской се частентень сёрма кучнось. Тосто каршонзо ёвтасть: келя, ярмаконок арасть, секс зярс тынк ёнов а молевтяно.

Петрович марто явовомадо мейле туинь машинам варштамо. Содавлиньгак, мезе мартонзо тейсть, а молевлинь. Весемесь, мезесь таргави нурька шкас, таргазель-калавтнезель: чаротнеяк, озамо таркатнеяк, натой рулеськак. Тень неемстэ ледстявсть тень Петровичень валонзо. Кевкстеман лангс: косо ды мезть тейнить велень цёратне, сон та-кода а пек кеместэ мерсь: «Кие мезть... Кортыть, мень-бути кооперативсэть...». Паряк, самай те «кооперативесь» тесэяк нежедсь?

Райцентрав «Раськень культурань музеенть» варштамо, конань, келя, янгизе Тумай, савсь сыргамс тень ялго.

Музеенть муия райононь библиотекасто. Сонзэ туртов пирязель тесэ апокш таркине. Карминь содамо вана мезе: алкукскак, иешкадо икеле Тумоюр велень зярыя эриця марто музеентень совсесь кумажа видьга панарсо пек покш, сакалов цёра. Васня лоткась теитерьавань оршамкатнень малас, мейле — стенас понгавтозь картнень ваксс. Апак учо сон ёртынзе неть картнень ды серьгедсь: «Истят карьсэ минек эрзятне эзть яка!»

Теде мейле те ломаненть музейстэ кияк эзизе нее.

***

Омбоце чистэнть вастневинь велень ламо ломань марто. Пельдест маринь: кодаткак священникть Тумай эзь чавно, музейть эзь янга. Закононть ялатеке колась — пушкасто леднесь. Пекставтса?


Категория: Мои статьи | Добавил: tati (20.03.2010)
Просмотров: 273 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz