ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Александр Тикшайкин. КЕМЕНЦЕ ПИНГЕСТЭ ИНЖЕ. Евтнема

КЕМЕНЦЕ   ПИНГЕСТЭ ИНЖЕ

              Евтнема

Ансяк совинь важодема тарказон, сеске дирнезевсь телефонось. Те ульнесь Гребнев, отделэнь прявтось.

     Совака, — буркстась     сон. — Ды трубкась кувакасто бикаезевсь.

Гребнев марто пиксетяно ве таркасо ветешка иеть, секс вайгелензэ коряс тонадынь чарькодеме, кодамо ёжозо. Ней сон аволь партнэдель.

Эзинь кенере совамо, сеске яволявтсь:

Вана мезе, нейке сыргак Равчирень областень Тумоюр ве­лев. Тосо мень-бути идемевсь появась, чавсь священник, янгась музей.

Мои  покш тевень коряс  яксян...  Мезе,  тосо участковой арась? — эзинь кирдеве.

Иля лака! — сорнозевсь генералонть вайгелезэ. — Монгак тонь ладсо арсинь, секс вана те сёрманть (кепедсь столензэ лангсто   та-кодамо   конёвпанкске)   васов   кекшекшныя.   «Вере»   содат  кода  «пезымизь»?  Келя,  секень вант,  кодамо-бути язычник цела область тюшумбар нолды, минек угрозыскесь уды! — Илить савтне кежень, подполковник ялгай, кавто милиционерт саят мартот — ды Тумоюров!..

Мезеяк а теят, савсь пурнамс килангов.

Равчирень областень куншкакуронть видьс ардынь парсте, мейле апак учо кепететсь давол, менелесь прок почкодсь, тусь виев пиземе. Курок кись теевсь кусля чакшокс. Монь ташто УАЗ-икесь пезнась, савсь сыргамс ялго.

Зярдо окойники пачкодинь Тумоюров, лангсом ве коське сурине арасель. Кудотнесэ толт эзть пало. Лосьсэ валыця пизементь пачк сынь неявсть чопачань кондямокс: ёмить — чачить, ёмить — чачить. Сыргинь васенце кудонть ёнов.

Вачкодинь кенкшес. Лиссь чопода оршамкасо ава. Кедьсэнзэ липниця штатол.

Ванымим прясто пильгс.

     Тон кие? — кевкстимим сон пелезь.

Милициянть велесэяк, ошсояк а пек вечксызь, секс прям ёвтыя историкекс.

     Ютак эно, — седе чевтемезь вайгельсэ мерсь кудазоравась ды невтсь кенкшенть ёнов. Кудосо теевинек содавиксэкс. Трофи­мовна, истямоль кудазораванть лемезэ, макссь тень коське оршамопельть, уштызе голландканть, эждясь ям, каванимим.

Валске удомань пачк маряса — кить-бути лангозон ваныть. Панжинь сельмень ды мик соракадынь — эйстэнь авасоло озадоль кемголмовошка иесэ цёрыне, конань чамазо неявсь ожо-якстере сыявксокс. Истятольть кедензэяк. Сынь путозельть самай се столенть лангс, конань экшсэ мои исяк ярсынь... Теде арсезе-везь, потсон теке мезе-бути велявтовсь.

Иля пеле, — каятотсь каштомикельде кудазораванть вайгелезэ (сон, нать, редизе апаро ежом). — Те ормась лия ломаньс а педи. Эйсэнзэ минек велесэ кудонь трокс сэредить,  кода вети прянзо, содатано... — Сон чатьмонезевсь, мейле таго поладынзе валонзо:

А вана превензэ ванькст, — паця песэ сельмензэ нардамсто мерсь Трофимовна.— Тонавтыцяст свал эйсэнзэ шны. Вейксэце классто мейле, келя, Чуварлеев эряви ильтемс, кадык средней школа пряды. Ды ков истямо чама марто кучсак? Нарьгамо лангсонзо кармить. Кадык уш теске лияды, монень лездыцякс. —Трофимовна  салава  нардынзе  сельмензэ,  кувакасто  таргизе  ой-
мензэ. — Сыре ломантне кортыть, те истя Пазось лангозонок кежиявтсь, мекс аламо ознотано. Ней попонокак ули, чинь-чоп чекатано-покатано      сэредицятне   ялатеке   эзть   аламолгадо,   авась  стакасто укстась,  нардынзе сельмензэ ды  чатьмонезь  совась каштомикелев.

Мои стинь, оршнинь. Оршамкан муськезельть-ванськавтозельть, пси каштомонть вакссо коськсть. Варштынь кудопотмованть.

Кода эзь мазылгавто эрямо тарканзо мелявтыця кудазоравась, сон ялатеке мольсь артонь турва сырькайне ёнов: вейкине нупальнесь парсте шлязь, пеельсэ коцькерязь потолоконь ды кияксонь лазтнэнь юткова цёрань кедьсур кельги. Каштомось чиремсь, лазнототсь, шпалертнэ тюжалгадсть, чемениязь частнэ-ходиктне лоткасть.

Кенкшентень вачкодсть. Сон чикордозевсь. Поровтонть трокс эскельдясь сизьгеменьшка иесэ атя. Понкстнэ-панартнэ, сивес-тэнзэ нурьгиця галстукось истя оласть — тюсосткак а содави, текенень, ванькст, апак мерька. Атясь путызе олгонь шляпанзо чалгамо лангс, нардызе пацинесэ чертеме прянзо, ды, кедензэ венстезь, ёвтызе лемензэ:

Афанасий Петрович.

Шумбрат, Петрович, шумбрат! — варштась каштомикельде Трофимовна.— Мекс а совсят?

Ды   тувтал   та-кода     арасель, — ёзолдызе   човонензэ. — Ней вана ансяк... Хе-хе... — прок визделгадсь атясь.

Трофимовна чарькодсь:

Прясь, Петрович?

Ды    теня...   Хе-хе... Сон, идемевсесь, — эзь карма сёпомо атясь.    Вадря улевель,  Трофимовна,  нуртявлитька цяркашка. Исяк, теня... копордынь аламошка...

Кудазоравась апак корта лиссь кудыкелев, совавтсь тосто пешксе стопка, венстизе инжентень.

     Те шабранок,— теке чумонь марязь, велявтызе ёнон прянзо Трофимовна.— Эрьва мейсэ тенек лезды...

Атясь копордызе самогононть,  никстясь кши, ёвтась:

     Мои  тесэ  кинот  невтнян.  Нама,  зярдо  тол  ды  ваныцят эрсить. Седе сеедьстэ савкшны оймсемс. А тон, мерят,  историкат? Ули, ули мезе тынк ялгантень минек велесэ ёвтнемс. Монсь-как кой-мезть тештнекшнинь, эрявить неть сёрмадовкстнэнь таргамс ды  невтемс теть.

Зярс кортнинек, чипаесь кепететсь верев. Сась шка кундамс тевс. Московов сёрманть кучицязо ульнесь те велень попось. Косо сон эрясь, теде, нама, а содылинь. Пшкадинь Петровичнень. Атясь прянь апак покшкавтне сеске сыргась ильтемень.

Продолжение следует


Категория: Мои статьи | Добавил: tati (20.03.2010)
Просмотров: 1171 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz