Войнань стака читне.

(Миколь лелянь войнань шкань ёвтнемастонзо)

65 иеть ютасть, кода прядовсь Ине Отечественной войнась. Зяро верь сон потясь ломантнень эйстэ, зяро ломанть кулость вачодо ды кельмеде, зяро эйкакшт кадовсть тетявтомо ды ававтомо, ялакстомо ды сазортомо… Война. Зяро сельведть валовить те валонть марямсто, зяро лецтнемат ды ёжомарямот  стить ломаненть икелев… Война. А фатяткак, кода бойкасто ливти шкась. Аламо кадовить ветерантнэде. Сынь свал лецтнить сехте стака шкадонть: тюрематнеде, ранявоматнеде, васенце вечкемадо, лия мезде. Теде башка  пейдемань сельведь марто кортыть эсь ялгадост, конатнень марто савсь вейсэ тюремс… Да… Покш питне макссь минек масторось учозь ИЗНЯВКСОНТЬ кис…

ЦЫПКАЙКИН НИКОЛАЙ НИКОЛАЕВИЧ, лиякс меремс, Миколь лелям -  сырькаень сазоронзо мирде, ВЕТЕРАН. Сехте вечкевикс ломань весе роднятнень ютксто. Эри Сурвелесэ. Тензэ 88. Сеедьстэ ёвтни атясь войнань шкадонть. Вечки, зярдо перьканзо пуромить кунсолыцят, ды  ансяк сестэ устави кортамо: «Ушодынь воёвамо 1942-це иестэ. Сестэ тень 20 иеть топодекшность. Понгокшнынь Ленинград ошонть алов, северо-западной фронтонтень. Самай сестэ ульнесь блокадась. Ошось раужо, весе качамо потсо. Менелесь стакасто таргси оймензэ эйсэ. Мезеяк а неят. Кудотне прок наксадо пейть. Ломантне вачодот… Косо-бути васоло марявсь автоматонь ледстнема… Маряви авань лайшема-авардема… Тень лангс ванозь седейсэнь теевсь апаро. Вана истямо артовкс стясь икелем, зярдо ускимизь фронтс. Васняяк монь арсесть путомс  ливтницякс. Кучимизь вышка пряв. Кузинь. Кода варштынь алов, превемгак сеске чаракадсть. «Арась»,- мерсть.- «Тенть эйстэ ливтниця а лиси». Истя понгинь 732-це лыжно-стрелковой батальонс, косо Мордовиянь ломантнеде лововсть аволь пек ламо. Котоце чистэнть минек полконть лангс каявсть ятонь самолёттнэ. Кувать чарасть велькссэнек: тей ливтить, тов, одов велявтыть… Ушодсть ледстнеме. Весемесь човорявсь: менелесь, модась, мик од килейтнеяк сезневсть сельменек икеле…  Весе эрямось ве секундас    ливтясь икелеть. Прявт командирэсь – Виктор Петрович рангстась: «Атакас!». Биноклянь пачк неизе паксясто чииця минек лангс ятонть. А мезть кортамскак , фашисттнэ анокстазельть прясто пильгс. Уставинек тюреме. Вийтнеяк ульнесть аволь вейкеть. Марявсь, оштё аламошка ды яжасамизь немецтне. Шкастонзо кенерсь лездамс лия батальонось. Веенст кармасть ледстнеме ятонть ланга, омбонстнэ жо лездасть ранявозтненень… Аламо шкань ютазь ятось кармась потамо удалов. Седе тов вийтне эзть сато, ды сестэ «Гитлерэнь ойметне» сынсь максызь эсь пряст. Содавлиде бу зяро ломанть ломанть кулость те тюремасонть?! Э-э-х… Ламо ялгам ёмавтынь сестэ. Вадрят цёратне: мазыйть, превейть, виевть, эсь тевень содыцят… Ва-а-й… (Тесэ атясь стакасто таргизе оймензэ, чаманзо лангсто кармасть неявомо сельведть). Эстеньгак савсь а шожда. Ранимизь лавтовс, прясонтькак марявсь мень-бути увнома. Теде мейле понгинь госпитальс. Куватьс эзинь кирдеве, ульнесь покш мелем аштемс эсь масторонть кис…».

 «Лецтявсь тень оштё вейке тюрема», - аволь покш лоткамодо мейле ёвтни атясь.- « Те ульнесь 1944-це иестэ Поляконь масторсо, Краков ошонть ало. Сестэ ульнинь танкистэкс. Минек танкатне «Т-34», «Иосиф Сталин», «Ворошилов», фашистнэнь жо – «Тигра», «Пантера», «Леопард», «Фердинанд» ды лият. Мезе мерят, лемтненьгак ракшань саизь… Танковой тюремась мольсь аволь кувать. Вийтне тагояк аволь вейкеть. Ятонть ланга савсь ледемс виде ударсо(наводкасо). Ятоськак макссь каршо вал. Снарядось понгсь баконтень. Теде мейле танкам кирвазсь, эрявсь бойкасто лисемс. Коштось эзь сатно. Арсинь панжомс люконть ды скокадемс палыця танканть лангсто. Монсь весе палынь. Сехте пек пилем токавкшность. Прынь кельме моданть лангс. Аламодо панжозь сельмтне вансть верев. Тесэ кить-бути ютасть алашасо. Фатясть монень ды ков-бути кармасть ускомом… Ёжос сынь ансяк госпитальсэ. «Тонь ламо пицевксэть»,- мерсь лецицясь. – «Сехте пек пицевсь прясь. Карматано тейнеме процедурат… ».  Вана истя чачиньгак «панарсо».  Ансяк ниле оятнень ютксто ськамон кадовинь живстэ. Седе мейле лецинь Львовсо. Карминь аламодо пичкамо, но ялатеке кудов сынь 1947-це иестэ. Инвалидэкс. Тиринь велесэяк тевтне пешксельть. Важодинь паксясо ды фермасо. Урьвакстынь. Войнань тюрематнень эйсэ изнямотнень кис тешкстымизь «Отвагань кисэ» ды «Боевой заслугань кисэ» медальтнесэ, Якстере Тештень орденсэ…».

Кодамо аволь уле войнась, минь свал карматано содамо эсенек ветеранонок ды покш мель марто кортамо сынст подвигест ланга. Те ломантне виень ды оймень апак жаля тюрсь минек кисэ, минек вадря эрямонть кисэ… Сюкпря тенк!