|
|
Артур Моро. А улян ськамон
А улян ськамон
Зярдо ломась а эрси вакссом,
Сестэ сонсь Музась капши само,
Налксезь-цивтердозь оймень сятксо,
Канды поэзия, морамо.
Ды апак учо эйсэнь теи
Селмовокс, виевекс ды одокс...
Сонзэ вийсэ часия неян,
Неса мон мазычинзэ Моданть.
Эрьва тикшинесь ды лопинесь
Кармить улеме монь маласо.
Паксясо, розь юткова кинесь,
Тердьсамам ковгак васов-васов...
Секс покш кемемась монь а кады
Ды зярдаяк а мери ризнемс.
Мештем пештяви тундонь садокс,
Допрок весе апаронть изнясь.
Истя вана а улян ськамон
Мик вейке час, вейке минута...
А стяко весе монь эрямось
Поэзиява чиезь юты.
1979
|
| Категория: Стихи | Добавил: tati (25.09.2009)
|
| Просмотров: 1402
| Рейтинг: 0.0/0 |
|
|
|
