Колмо штатолт

Колмо штатолт Пазонтень кирвазтян,

Шумбра кши ды сал Шкинентень путан,

Инзей ведь чувтонь покш кечес каян,

Цяпор тикшень тансть кудовам сувтан.

Ве штатолось – тиринь авань кисэ,

Омбоцесь – Эрзянь Мастором кисэ,

Колмоценть – сонгак валдсто палозо! –

Путса вечкемам – сэредьксэм кисэ.

Верев ёртсынь кавто ашо кедем,

Сюконямсто вейс недясынь суром.

Паряк, несы Пазось сюконямом,

Марясы пиштий седеень мором.

Колмо штатолт Пазонтень вельмевтян,

Колмонь кисэ Инешкинтень пшкадян.

Колмонь кисэ, бути лети – сави,

Апак янксе тюжа сёвоньс мадян.

1991 г.