Чачома чистэм

Кизэнь пе. Пиресэ умарь чине.

Чиньжарамось стака прянть нолдызе.

Ливтясть ниленьгемень сисем иеть,

Зярдо бабась починем керизе.

Ниленьгемень сисемксть умарьговось

Вармань ялтсо правтнесь умарензэ,

Ды вень-вешка чова тарваз-Ковось

Нусь менеленть кенерезь тештензэ.

Колмо эскелькст пельсядонтень кадовсть.

Тосо карми сыречись неждямо.

Пингесь юты тундонь ведекс чадозь,

Капшан вечкемантень сюконямо.

Бажан кундамс сень, мезесь менстязель,

Капшан явшемс муезенть, таштазенть,

Эрямонь парьсэм мезесь пекстазель,

Лиянь сельмсэ апаколь варштазе.

Сюконян сенень, кие вечкимим!

Нолдык чумом, зярдо а тонь вечкинь…

Модас сюк сенень, кинь мон вечкия:

Пазонь Чансть тонь марто сестэ печтинь!

Кадык майсесь, кадык тардсь седеесь:

Кодаяк лиясто а кардасак.

Майсематне валдо морокс теевсть-

Тон те моронть питнензэ содасак!

… Кизэнь пе. Пиресэ умарь чине.

Чиньжарамось стака прянть нолдызе.

Ливтясть ниленьгемень сисем иеть,

Ванды одов лиси маней чизэ!