Чокшнэ ланга

Зярдо чизэ валги,
Менель чополгады-
Экшесь алов чалги,
Коштось шождалгады.

Сиземадонть оймси
Вирьсэ-кальсэ вармась,
Цёков гайкстась лёмсонть,
Цёкордомо кармась.

Эрзянь велетнесэ
Ломанть таргизь оймест,
Эрьвачинь тевтнестэ
Явсть. Ярсамо ойсесть.

Чулгсетиця кедьсэст
Шожда чувтонь пенчкеть,
Мезть ломантнень мельсэст?
Мелявксост сынст секеть...

-Косто ледемс тикшеть?
-Кода пенгтнень таштамс?
-Вазонть - сюлмамс пиксэс...
-Чапакс путомс каштомс...

Мельтне чарыть превсэ,
Оймамо а максыть...
Эрзянь велетнесэ
Истя чокшнэть вастыть...

Таго чизэ валги,
Менель чополгады,
Экшесь алов чалги,
Коштось шождалгады...