СУМАНЬ

Ледстнян, васенце лов прась валскень шкава.

Вальмалов, теке артовкс, килей  стясь.

Тетянь шинельстэ, окойники, авам

Монень сумань телень самонтень стась.
 

А олы се умонь кенярксось мельстэнь.

Савкшнось якшамот ки лангсо вастомс.

Идесь суманем, сон стазель шинельстэнть,

Кона кувать кудосонок ванстовсь.
 

Школав капшилинь эряза эскелькссэ.

Тосто таго оян-ялган несынь.

Сельмень сявадстозь яла, паро мельсэ,

Суманем ланга, сэрьган ванность сынь.
 

Содамочинь таштазь яла тонавтнинь

Ды эрьва чистэнть вадрялгавтсть ёжом

Книгатне, прям конатнень вельксс комавтнинь,

Суманем, школась — эйкакшчинь кужом.
 

Яла эрян  умок ютазень шкасо.

Валске. Менелесь велькссэнек келей.

Прась васень лов. Ашо кужонть куншкасо,

Прок артовкс, ашти ашназа килей.