***

Миньгак, миньгак ульнинек одт!

Миньгак од айгорокс ульнинек!

Миньгак виенек ёмавтнинек!

Миньгак од тейтерть кутморинек,

Ды истя карми свал, кеминек, —

Эзть сода седеенек сод!

Миньгак, миньгак ульнинек одт!

Эйстэнек эрьвась кочкась ки,

Ды эрьвась кочкась тев эстензэ:

Ки кода маштсь кепедсь лемензэ,

Ки кода маштсь пурнась пизэнзэ,

Ки кода маштсь невтнесь виензэ,

Тейсть истя — ки кода вечки.

Эйстэнек эрьвась кочкась ки!

Ульнесть моронок! Гайгезь гайгсть!

Ульнесть, ульнесть тевенек минек!

Минь ков а эряви эцнинек

Ды мезень-бути кис тюринек,

Эрямонть мейленень каднынек, —

Те «мейлесь» яла айгсь ды айгсь...

Ульнесть моронок! Гайгезь гайгсть!

Ней кить минь? Ярмункась прядовсь...

Кудов — берякшке алашасо...

Пря шнынек одсто: вана шка сы —

Тень тейса ды тонань ютаса!

Кияк эйстэнек пек эзь касо,

Хоть эрьвась превейкс прянзо ловсь.

Ней кить минь? Ярмункась прядовсь...

Ютась, эзь марявояк шкась,

А кемевияк — истя ламо.

Течи молят... ялгать калмамо...

Сонгак арсесь кувать эрямо...

Мольтяно, сизезь, сыре чамат, —

Кинь шержей, кинь чертеме прясь...

Ютась, эзь марявояк шкась.

Миньгак, миньгак ульнинек одт!

Миньгак од айгорокс ардтнинек!

Миньгак эсенек лангс кеминек,

Миньгак мезе-бути учинек!

Миньгак, миньгак, миньгак у л ь н и н  е к!

Арасель седейсэнек сод!

Миньгак, миньгак ульнинек одт!