БОЗАЙ  ПОЛЯ

Бозай Поля юты Паксяпева...

Нищей Поля... Пазось, нать, кандызе.

Сюконязь эскели сон велева,

Моли — теке менелесь мендизе.

Сизи — чочко лангс оймсеме озы,

Олазь пацянть витни кеднесэнзэ.

Кувать козы... Вайсесь таго козонь? —

Рудаз потсот ташто котынензэ.
 

Эрьва кудос кулдор-калдор сови,

Юты ансяк кежей азор вакска.

Поппень эрицятненень вастови,

Верепева юты ды Вирьалкска.
 

Ки кши печть, ки верек ал, ки пряка

Венсти тензэ. Сон панды мизолкссо.

...Хоть умок арасть нищейть-пиштякат,

Ансяк сонзэ кудось вельтязь олгсо.
 

Юты эсь малавиксэнзэ ёнга,

Озны — шумбрачист илязо ёма...

Сонзэ мельга кискатне а онгить.

Паряк, марить уцяска пайстомо?
 

Нарьги цёркась, згили: «Бо-о-озай нулав...»

«Чатьмонть! — пексты кургонзо бабазо,

Ды стакасто лексти: — Полянь кулось

Войнань шкасто вачодо цёразо...»

Паксяпева моли Бозай Поля,

Губорькстнэс понгони палкинезэ.

Састо моли... Моли ды каштмоли,

Прок сэпей кевкстема рунгинезэ:
 

«Мекс монь эйсэ Верепаз а мари?

Мекс эрямом — прок лия ломанень?

Мекс арась нуцькинем, кода Марюнь?

Мекс арась ярмаком куломанень?»