ТИКШЕНЬ ЛЕДЕМА

Ледян-теян, оймсеме озан.

Варшты ёном ды кевкстьсамам покштям:

«Кода арсят, кенертяно чокшнес?»

«Кенертяно», — сонензэ кортан.

Сэрейстэ тедеде тикшесь кассь,

Мекс а касомс — валсь менелесь веденть.

Пелюмантень сонсь венстеви кедем, —

Саты оймсемс, чопоньпельксэнь шкась.

Покштянь эйстэ кадовинь, сасан.

А сасави...

Зярдо сундерьгады,

Сон, ветицясь, пейдезь ладсо пшкади:

«Вант, кочкарян керясыть, шайтян...

Парсте ледят. Тонадыть, ванан.

Ськамозон сатоволь байтяк пиксемс.

Сы иестэ, кодак касы тикшесь,

Содак, пек учомот тонь карман...»

Мартонзо кудов пурнан-сэрнян.

Вейкеде ансяк а содатано —

Меельцеде кавонек ледтяно...

Сы иестэ ськамон лугас сан.