***
Кода сон лавшомгадсь, кода сыредсь...
Кода кецни — окойники сынь.
- Тетяй, мезе... пирявкстомо пиресь?
- Пирявкстомо... Зярдо сат, учинь.
Тетят-цёрат, кавто штапо колгант,
Пирятано пире — тев моли!
Узересь шождыне, теке толга,
Виеськак кедь сантнэсэ ули.
Ансяк курок стакалгады тетям,
Пандя чирес новоли, сизи...
Сёксень тюст сонзэ вановкссто редян,
Сёксень тарькс чамаванзо якси.
Малазонзо аран, венстьса кедем —
Ахолды ды апак капша сти.
— Мезеяк а теят — шка. Сырединь... —
Стакасто, кувакасто лексти.
Эсень пачка арсезеван: «Тетяй,
Сы ли шка истямо, зярдо мон
Эсь кастозь эйкакшом вакссо лекстян
Вана истя, кода течи тон?»
| 
