начало

Вана икелест кассь сырнень кудо.

Истя цитнесь сон мазый валдосо,

Мерят Чипазось эрясь эйсэнзэ.

Теяк кудонть ваксс Атякш валгонесь.

—  Сырнень кудонтень азе ней совак,—

Суралянень пшкадсь Тумоатякшось,—

Вастыцятненень истяня кортак:

«Мон куломадо лелянк идия,

Оймень саицянть кедьстэ нельгия.

Мезе макстадо монень кисэнзэ,

Бути нейке мон сонзэ невтьса тенк?

—  Весенть макссынек! — евтасть сонензэ.—

Вешат — сия сайть, вешат — сырне сайть,

Вешсак — гигирень паргонть макссынек,

(Ансяк куроксто невтик лелянок!

—  Эрьга гигирень паргонть максынка!

Гигирень паргонть максызь сонензэ,

Кекшезь таркастонть ливтизь кенярдозь.

—  Зярс-мейс учомизь! — евтась Сураля

Ды паргонть марто ношкстась кудостонть.

—  Гигирень паргонть сынь монень максызь,—

Мерсь паро мельсэ сон Атякшонтень,—

Кодак лецтитинь, сеске кандызь сынь.

Бажить нееме тонь седе курок.

—  Тумоатякшось чувто прясто валгсь,

Стясь икелензэ, од церакс велявтсь.

— Ней, паро ломань, азе тон кудов.

Кись стака ули, молемс теть васов.

Ламо чить мартот тей минь ливтинек

Те питней паргонть муеманзо кис.

Ней сон тонь кедьсэ. Ней тон сюпават.

Мезе тон вешат, сень сон макссы теть.

Ансяк те паргонть кандык тон селгозь,

Кудов самс сонзэ иляк панжокшно.

Бути топавтсак монь кармавтоманть,

Бути превс сайсак монь тонавтоманть,

Весе мелявксот сон идесынзе,

Ламо парочи сон тонеть максы.

—  Прядовсь кортамось. Тумоатякшось

Паро од церакс совась кудонтень.

Суралянь сельме икельде емась.

Кода ведьс ваясь, прок сон арасель.

Сураляяк тусь кудов, Равлеев.

Моли-эскели вирьга, паксява,

Пиже лаймева, иневедень троке.

Колмо ковт истя, нама, молекшнесь.

А евтавияк, кода сизекшнесь —

Пильге лангсто прамс, паргонь эрдекстамс.

— Мезень кис кирдян истят майсемат?

Пандошкань сталмо те паргсонть кандан,

Мейсэ лезэзэ, те шкас а содан.

Озась Сураля вирень кужинес,

Арси, мезть тейнемс тензэ седе тов.

Потмо мелезэ допрок сыремкшнесь.

Эзь цидярдо сон, паргонть панжизе.

Кодак панжизе гигирень паргонть,

Ушодовсть тюнголькст, теевсть тамашат:

Виресь увнозевсь, модась гайгезевсь,

Цецят киштезевсть, нармунть моразевсть,

Менельстэ мастерс  пиземе вачкодсь,

Лейтне тыц пешкедсть лажныця ведте...

Ваны Сураля сельмензэ тетькезь:

Весе парочись лиси паргостонть,

Прянь-полдань синдезь, оргоди ушов:

Лисить вирь пачат, леень куяв калт,

Менелень нармунть, кудонь кильдемат,

Сыреждиця мекшть, медень кандыцят...

Нединзе церась кемень суронзо,

Виев пиземекс сельведензэ тусть.

Велявтыть мекев исень мелявкстнэ.

«Нать, стяко майсинь — васолга якинь,

Сизьгемень сисем масторт ашардынь.

Весе парочинть ней емавтыя,

Эрзянь раськенть мон вачо кадыя...»

Гигирень паргось  мерят аварьгадсь,

Панжовсь сизьгемень сисем кургосо,

Емась мазычинь сонзэ тюсозо.

Васень стакачись кода арасель.

Ваны Сураля чаво паргонтень,

А соды, кода улемс ней тензэ.

Вачкодинзе сон кавто кедензэ,

Пувордынзе сон кемень суронзо.

Емазь уцясканть кувалт мелявты.

Те рисксэв шкане чиньстямо ендо

Мольсь малазонзо сыре атине.

—    Шумбрачи тонеть, паро од цера!

Мезень кисэ тон истя мелявтат?

Мезень кувалт тон, ломань, сюмордат?

—    Вай  кода, покштяй, тень а мелявтомс!

Уш кода монень ней а сюмордомс?

Весе парочись ульнесь паргосон —

Весе сон, покштяй, ванта, тусь-оргодсь.

Ней мекев сонзэ кода пурнаса?

Пингень пес паргось чаво кадови.

Улемс ней монень сюдозь ломанекс.

Ней мон пайстоман, уцяскавтоман.

—  Превс путовлитинь, цера-парочи,—

Суралянень мерсь шержев сакалнэсь,—

Пурнаволь мекев парось паргозот,

Бути алтавлить тень кисэ монень

Вана кодамо, Сураля, казне:

Тон тетянь-авань тиринь кудосот

Макссак сень монень, мезде а содат.

Суралянь мельс ледсь весе пингезэ.

—  Арась се, мезде, покштяй, а содан

Мон тетянь-авань тиринь кудосо.

Теян истяня, кода тон мерят:

Мезде а содан, се тонь улезэ!—

Апак кавтолдо мерсь сон атянтень.

— Пек ен, Сураля, цера-парочи!

Ней мон тонавттан тевенть тееме,—

Кенярдозь кортась сыре атинесь,—

Азека, цера, пиже лайментень,

Мольть ды сюконяк мазый таркантень,

Конань куншкасо чави лисьмапря.

Лисьмапрянть вакссо касы килейне.

Тосо панжик тон палы седееть,

Мазый моросо евтак лембе валт.

Седе морак тон, Сураля, моро,

Мезе вельть бажат пурнамс паргонтень,-

Ды емась атясь сельме икельде.

Продолжение