Стинь чоподава-зорява,

Валскень пиже порава.

Шлия-нардыя чаминем,

Оршия рунгом, сэринем:

Маконь лопа палинем,

Маконь цеця руцинем,

Чилисема пацинем.

Саия кедезэнь

Пекшень шожда бадиям.

Панжия сиянь лисьминенть —

Саия валскень ведьбрянзо.

Уштыя лембе ёжо каштомнем,

Мастор вакска ацыя пси паронть.

Пидинь-панинь-анокстынь

Седей витемань ярсамнеть.

Ямонть пидинь сал марто,

Кашанть пидинь пря марто,

Пряканть панинь ал марто.

Якан-пакан кенкшкевам,

Лисян-сован ортавам.

Учан учонь инжетнень,

Вастан тердень гостетнень.

Ашо ловось чикоргадсь,

Орта нежесь калдоргадсь —

Совасть инжетне кудозом,

Ойсесть эземпринезэнь.

—Ярсадоя, ялгинем!

Симедея, оинем!

Течи минек покшчинек,

Течи минек валдо чи.

Текень кисэ ёрыя-арыя

Тантей ярсамопеленть,

Текень кисэ пидия

Човов браганть, тантеенть.

Эрь, симеде, ярсадо,

Седейнезэнк седей вийкс,

Арсий прязонк валдо превкс,

Эрь, кепединк кечетнень

Уцяскавсто эрямга,

Улипаронь таштамга,

Масторонок славамга!

Мазый садокс цветязо

Минек ине масторось!

Шумбрынестэ эрязо

Минек виев раськенек!