...Таго пачкодинь

Се таркантень, козонь пансимизь.

Вана тесэ ютавтынь кавто иеть —

Уш кемень иеть ютасть теде мейле.

Ды полавтовсь эрямосон пек ламо;

Монськак вана, вейсэнь закононтъ коряс,

Лиякстоминь — но тесэ таго ней

Ютазесь пек курок мелезэнь леди.

Ды, маряви, чокшне буто яксинь

Те вирьпулованть.

                             Вана опальной кудось,

Конасонть эринь нянянь марто мон.

Уш бабинесь арась — уш стена экшка

А марян мон сонзэ стака молевксэнть,

Ды сонзэ седей мелявксонь ризнэманть.

Вана вирь панд ось, конань прясто яла

Мон ваннынь алов, эрькень веденть лангс,

Озадо аштезь. Ды пек ризнэзь ледстнинь

Лия берёк чиреть ды лия толкунт...

Пакся юткова ды пиже лугава

Эрькенть сэнь ведесь таргави келейстэ.

Тува венчсэ уи калонь кундсиця,

Уски мельганзо сон ташто алтыма.

Те эрькенть а пек крута чиреванзо

Сравтовсть велетне — тосо, сынст удало,

Чиремсь вармаведьгев, конань стакасто

Чарыть сёлмонзо вармадонть...

                                                    Паксясонть,

Куваня таргавсь покштянь модань межась

Ды пандо прянтень менчевезь кись кузи,

Конань лангс тейсть пиземетне ямат, —

Аштить колмо пек сэрей пичеть.

                                                          Вейкесь

Касы ве пеле. Но кавто пичетне

Аштить малацек ды монь

                                            а весть вастасть

Эсь шалномасост, зярдо валдо вене

Ардылинь ласте. Нейгак ардан тия

Ды вана таго сынст неинь икельдень.

Сынь истят жо. Маряви  монень пилес

Умонь содавикс, вечкевикс кашторксост.

Ансяк ней сынст ташто корёнтнэнь

                                                           вакссто

(Косо икеле ульнесь чаво тарка)

Кармась касомо од пичень

Пиже семия. Прок эйкакшт касыть сынь,

Сэрей чувтотнень сулей алов кекшезь,

Васоло ашти сынст нусманя ялгаст,

Прок сыре цёра, кона эзь урьваксто,

Перьканзо таркась чаво.

Шумбра ульть, од плема,

Асодавикс монень! А мон неса

Виев мазычить, кода покшсто касат,

Кода улят неть пичетнеде сэрей

Ды пижесэть сынст сыре пряст вельтясыть

Ютыцянь сельмеде. Кадык монь нуцькам

Марясы тынк вечкевикс те шалноманть,

Зярдо карми паро арсема марто

Чопода вестэ малаванк ютамо

Ялганзо пельде, кадык седейшкава

Монь сестэ ледстясамам.

Эрзянь кельс ютавтынзе ПавелЛЮБАЕВ

                                     ...Вновь я посетил