***

Од иень каршо кемематне вельмить,

Учат уцяска поровтонть икеле.

Талномась – мелень. Седеесь эзь кельме,

Ансяк сон теке мезде-бути пели.

Талномась – мелень, аламодо олась.

Менеленть каршо ашти оймесь штадо:

Пурны од валдо… Косо мелень толось?

Шешкизь сонзэ а мезень теемадо.

Таго од вармат вешкить-рангить велькссэть,

Таго од корёнт нолдтневель кенярксось.

Капшат тееме од эрямос эскелькст,

Стувтомо иенть, кона ризкссэ карксась.

Од ие каршо кемематне вельмить…

Учат…Мезе? Теде тонськак а содат.

Кенярксось вейке – седеесь эзь кельме

Ды зярс виеват, манчевицят, одат…