|
|
М А С Т О Р А В А. КОЛМО КАЛАВАТ. АНГЕ. ЛОМАНЬ
М А С Т О Р А В А
КОЛМО КАЛАВАТ
Вете чить тевсэль Инешкипазось,
Важодсь дошузсто паро ежосо.
Котоце чистэ таго тевс кундась,
Мода-Масторонть поладсь кастомо.
Иневедентень нолдась колмо калт,
Колмонест калтнэ мазый калават,
Калавинетне сынь патят-сазорт.
Арсить, прят чавить колмо сазортнэ,
Вейке мельс кундыть калавинетне.
Мезде сынь арсить, мезде мелявтыть?
Мезень кисэ сынь прятнень майсевтить?
Сехте покш калось, васенце патясь,
Кармась кортамо лия калтнэнень:
— Ух и, сазорнэть, тынь монь раськинеть!
—Ух и, сазорнэть, тынь монь вечкевикст!
—Велявтынка тынь монь енов кургонк,
Седе малазон пиленк ладинка.
Мезе мон евтан, кунсолодоя,
Кавто пилесэ, сазорт, марядо.
Секс чачинек минь иневедентень,
Секс тей нолдымизь Инешкипазось —
Колмо стакань сон, сазорт, кирдеме,
Колмо стакань сон, сазорт, снартомо.
Масторонть улить колмо ужонзо.
Масторонть улить колмо отьманзо.
Колмо ужова миненек арамс,
Колмо отьматнес миненек молемс.
Тосо рунгонок минь ладясынек,
Эсь лангозонок Моданть путсынек.
Карматано минь пингеде пингес
Колмо стакатнень, сазорт, кирдеме,
Колмо стакатнень, сазорт, кандомо,—
Сехте покш калось, васенце патясь,
Корты, мель яви лия калтнэнень,—
Чилисемав мон, сазорнэть, туян.
Чикуншкинев тон, омбоцесь, туят.
Чивалгомав тон, веженсесь, туят.
Пазчангот, сазорт, тыненк мон мерян.
Коданя туян мон чилисемав —
Ведесь пешкеди чирестэ чирес.
Кода омбоцесь чикуншка енов
Туи уеме веденть потмакска,
Чачк иневеденть кавтов сон явсы,
Чипазонть несы вере менельстэ,
Лайме лангс сестэ лиси се ведесь.
Кода юводи* колмоце калось —
Чадыведь туи Масторонть ланга,
Лейть-латкт пешкедить ине ведтнеде.
Эрь ней явтано, сазорт, адядо,
Вейке-вейкенень сюконятано,
Одов зярдояк минь а нейтяно,
Вейке-вейкенень а васодтяно...
Арасть Масторонть колмо ужова
Колмо стакань сынь, калтнэ, кирдеме,
Колмо стакань сынь, калтнэ, кандомо.
АНГЕ
Кото чить тевсэль Инешкипазось.
Ва сисемеце чись зорясто сти.
Палы тол кирвазсь Пазонть седейсэ,
А содавикс мель чачсь мештезэнзэ.
Теке чи цитнить кавто сельмензэ,
Масторонть пештить сиянь валдосо.
«Мезень истямо орма саимим?
Мезень оймесэнь тантей майсема?» —
Шкипазось арси, снартни содамс сон
Те кецявтыця ормань тувталонть.
Арсесь, арсесь сон — арсевсь арсемась.
Варштась мёнелев, варштась ведентень,—
Вере менельсэнть чись пейди-налкси,
Сонзэ ало сэнь ведесь сияжды.
— Чи ды ведь,— сон мерсь,— вейс сюлмаводо,
Анге, Ава-ни монень чачтодо!
Ва ведьсэнть виев толкунт кепететсть,
Човсто кувтолт сынь пивтсть ды ематотсть.
Човонть потсто лиссь нусманя Ава.
Ашо панарсо рунгозо оршазь,
Сырнень карнесэ пильгензэ карсезь.
Конянзо ланга валдо чись лиси,
Касмонзо ланга ожо ков валги,
Черензэ пева тештне цивтердыть.
— Анге, чалгака Мастораванть лангс,
Ультяя монень, Ава, ни-пола,
Мазый эйкакшонь, Анге, чачтыця,
Кудонь-парочинь, Ава, ванстыця.
Ульть тон мазыйчинь, Анге, Пазава,
Эрямо лувонь ульть азорава.
— Тон, Инешкипаз, вешить ни-пола.
Вана сынь тонеть арсемат коряс.
Мезе мерят тон, полакай, теян,
Ков кучсамак, тов, азором, молян,
Кудонь раштыцякс карман улеме.
Эрязь-аштезь чачсь Анге сисем эйдть,
Сисем пакшат кандсь Инешкипазнэнь:
Ниле церынеть, колмо тейтернеть.
Васенце церась ульнесь Верепаз,
Омбоце церась ульсь Пурьгинепаз,
Колмоце церась ульнесь Веленьпаз,
Нилеце церась ульнесь Масторпаз.
Васень тейтересь ульнесь Кастарго,
Омбоцесь ульнесь ежов Везорго,
Колмоцесь ульнесь мазый Ведява.
Весе Шкипазнэнь сынь вельть вечкевикст,
Кастыть мелензэ, витить ежонзо.
Ансяк мекс-бути Пазось а ойми, —
Сон седейсэнзэ покш мелявкс кантни.
ЛОМАНЬ
Ваны Шкипазось Мастораванть лангс —
Арась эризэ, арась аштизэ.
Арась виртнесэ чувтонь керизэ,
Пиже лаймесэ — тикшень ледизэ.
Апак керя вирь стяко сявори,
Пиже тикшетне истяк наксадыть.
Арси Шкипазось койне нолдамо,
Бажи Инешкись илань тееме.
Ськамонзо тензэ те эзь арсеве,
Эсь превнесэнзэ те эзь цётаво:
Кодамо койне нолдамс эряви,
Кодамо ила теемс эряви.
Тердизе Пазось мазый Кастаргонь —
Верепаз мельга сонзэ кучизе.
Мерсь сон куроксто церанть тердеме,
Вейсэнь превнесэ само арсеме,
Вейсэнь кортамот само кортамо.
Омботькс тейтеренть, важов Везоргонь,
Нейке тердизе Инешкипазось.
Пурьгинень кисэ сонзэ кучизе.
Омботькс теранзо кармавтсь тердеме
Вейсэнь кортамот само ветямо,
Вейсэнь превнесэ само арсеме.
Вана Верепаз Пурьгине марто
Инешкипазонь кудос молекшнесть,
Вейке превнесэ сакшность арсеме,
Тетянь кудосо тевень цётамо.
Инешкипазось келей столензэ
Кудо куншкантень сынст кис путызе
Ды кши руцясо сэрьсэ ацызе.
Кастарго путнесь тантей кши-салнэ,
Везорго нуртясь медень пурине.
Пурьгинепазонть ды Верепазонть
Пазось эземень пряс озавтынзе,
Сонсь кшнинь мукорь лангс озась каршозост.
Кармасть симеме пазтнэ, ярсамо,
Ушодсть вейке сынь превсэ арсеме,
Вейке кельсэ ды валсо кортамо.
Уш кечень-кечень пазтнэ симекшнесть,
Уш кавтонь-кавтонь пазтнэ комавтнесть,
Вейке арсемас колмонест совасть.
Уш колмонь-колмонь пазтнэ копордасть —
Вейке мелявксос колмонест пачкодсть.
Сестэ Инешкись столенть экшстэ стясь,
Кшнинь оршамопельть рунгова оршась,
Кшнинь касмовельтявкс сон прязонзо путсь,
Кшнинь цетмаронзо вить кедьс саизе.
Мейле евтызе потмо валонзо:
— Тон, Пурьгинепаз, ды тон, Верепаз,
Монь кунсоломизь, парсте марямизь,—
Ушодсь кортамо инжетнень марто,—
Мезекс таркасто мон сыргавтыдизь
Ды тетянь кудос инжекс тердидизь —
Вейке превнесэ мартон арсеме,
Вейке кельнесэ мартон кортамо.
Монь чачи-касы Масторавиненть
Араеь эризэ, арась аштизэ.
Арась виртнесэ чувтонь керизэ,
Пи же лаймесэ тикшень ледизэ,
Модань сокизэ, сюронь видизэ.
Мон арсинь, арсинь — ськамон эзь арсевть,
Кодамо ломань теемс эряви,
Кодамо койне нолдамс эряви.
Кодамо кирда путомс эряви.
Вана мезде мон эсь пачкан арсинь,
Ва мезе седей потмосон кирдинь:
Эряви теемс Мастор лангс Эрзя,
Эрзянь лувнестэ койть-илат нолдамс.
Кодамо превнес тынь совавтсамизь?
Кодамо мельнес тынь аравтсамизь?
Кодамо монень вал евтатадо?
Эрьга, церат, тетянстэнь лездадо,
Эрявикс превс-мельс сонзэ путодо.
Верепазось ды Пурьгинепазось
Кунсолызь-маризь Инешкипазонть.
Шнызь сынь превензэ, валдо мелензэ
Вейке кельнесэ, вейсэнь валнэсэ:
— Тонь, Инешкипаз, мелеть эсь кедьсэть:
Кода арсесак, истяня тейсак,
Кода евтасак, истя топавтсак.
Кодамо ломань, Инешки, теят,
Истямо койне Мастор лангс нолдат,
Истямо путат тон эрямо кель.
Вечкиндерят руз — руз ломань теят,
Вечкеви татар — тон татар теят,
Вечкеви чуваж — тон чуваж теят,
Вечкеви эрзя — тон эрзя теят.
Кунсолокшнынзе Инешкипазось
Верепазонть ды Пурьгинепазонть,
Верев ертынзе кавто кедензэ,
Алов нолдызе ашназа прянзо,
Яволявтызе потмо валонзо:
—Эрзянь ломанесь мелезэнь тукшны.
Мон васня Эрзя теян Мастор лангс,
Эрзянь кель нолдан, эрзянь кой ладян.
Кадык сон, Эрзясь, азорокс ули —
Сюронь видицякс, вирень керицякс,
Тикшень ледицякс — тевень теицякс.
Пазось сатышка ашо севонь сайсь
Ды кармась, Шкинесь, ломань тееме.
Важодсь седейга, нежедсь покш мельсэ.
Косо ломаненть сон кенярдозь тейсь,
Косо анокстась азор Модантень?
Ине лей лангсо, Равонть чиресэ,
Пичень вирь потсо, цецянь кужосо.
Вана ломанесь теезь, анокстазь
Инешкипазонть эсензэ тюссо.
Ваннызе Шкинесь кедень теевксэнть —
Весеме ендо Эрзя удалась:
Рунгозо виде, мештезэ келей,
Черензэ ашот, сельмензэ валдот,
Чамаежозо сэтьме ды мазый,—
Сон комсь иесэ паро од цера.
Ансяк оймензэ зярс а тарксесы.
Эряви максомс ней тензэ ежо,
Прязонзо путомс превть, мельть, арсемат,
Кармавтомс сонзэ кельсэ кортамо.
Инешкипазось арси, превть ташты,
Масторавантень азор аноксты:
Коень кандыця, илань ванстыця,
Модань сокиця, сюронь кастыця.
Чись куншкас пачкодсь.Масторонть ланга
Чевте варминесь лоткась пувамсто.
Ведесь а лымби. Виресь а увны.
Те шкасто Пазось вечки оймсеме,
Мадни удомо путонь кудосо.
Кадызе Шкинесь теезь ломаненть
Цецянь кужонтень цютькес ськамонзо.
Идемевсь вана чикуншка ютксто
Лисни якамо Масторонть ланга,
Ваны, мезть тейни Инешкипазось.
Нейгак сеск сон мольсь тона таркантень,
Косо ськамонзо аштесь ломанесь.
«Вана кодамат тон, Пазонь эйкакш!—
Серьгедсь Идемевсь эсь потмованзо.—
Вейкеяк ильветькс, берянь енкс арась.
Пазонь превнесэ парокс кантнезят.
Ансяк истяня, содак, а ули.
Мон витевкст теян, мон петевкст кадан.
Виде рунговат, мазый чамават
Мон Идемевсень сермадовкст тештян...»
Сявадомадонть ятось — Идемевсь —
Тарка а муи, натой ормалгадсь,
Прась мельсапарос ды кежиявтозь
Кундась зыянов тевень тееме.
Васня ломаненть сон сельгенизе,
Мейле тарадсо сонзэ нерькстнизе,
Снартнесь пильгстэ пряс мик коламонзо.
Натой оймензэ арсесь максомо
Инешкипазонь теевть Эрзянтень.
Ансяк Апарось важодсь чавосто,
Стяко ломанень чаманть лангс пувась.
Эзь лисе истя, кода сон арсесь:
Раужо оймесь эзь совавтово,
Нама, рунгозо весе колызе.
Вана чись чиремсь валгома пелев.
Инешкипазось сы мекев кужов.
Ваны: тамашат! Эрзянзо перька
Чары Идемевсь, вели Апарось.
— Велянзяк тестэ, аксун Анамаз!
Таго тон тевем снартнят коламо.
Ансяк а лиси одов мезеяк.
Ломанентькак мон мекев витнеса,
А улить колавкст рунгонзо лангсо.
Азе тов, козонь мон тонь панитинь,
Ды аштек тосо пингеде пингес.
Идемевсь оргодсь пандо удалов,
Пазось ломаненть кармась витнеме.
Шлизе, нартнизе парсте рунгонзо,
Ваны — редявить сельгень чахмантнэ*.
Сестэ саизе Пазось ломаненть —
Ингельде пельде сэрьс велявтызе.
Кекшевсть колавкстнэ, емасть аксоркстнэ,
Ансяк кадовсть сынь ломаненть потмос
Ды те шкас ванстовсть ормань тувталокс.
Кандыть сынь тензэ пек ламо з.ыянт,
Эрямонзо перть эйсэнзэ нарьгить.
Зярдо ванськавтовсь теезь ломанесь,
Пазось казизе сонзэ оймесэ,
Эрямонь печтямс виев ежосо.
Идемевсь нейгак маласо аштесь —
Пандо чиресэ покш кев удало.
Тосто салава вансь Пазонть мельга:
Кода витнинзе сон ломанентень
Кежей серетькстнэнь, ламо колавкстнэнь;
Кода Эрзянтень ойменть путызе
Ды виев ежонть тензэ максызе.
Зярдо ломанесь весе теезель,
Лиссь Идемевсесь кевенть удалдо,
Нулготькс вайгельсэ кармась гонгомо:
—Монгак, Инешким, теинь ломаненть,
Секс энялдан теть тунь апак пеле,
Кортан апак виздть ва мезень кувалт:
Сонзэ рунгосо, чама чачосо
Кадык монь пельде ули мезеяк.
Мейс арсят кадомс тон монь пайстомокс?
Инешкипазонть арась мелезэ
Анок ломаненть, пек паро Эрзянть
Кавтов явомс те Апаронть марто.
Секс сон мерсь тензэ, сюдозь ятонтень:
Тон эзить тее ломаненть эйсэ.
Тон яжить сонзэ, пештик сэретькссэ,
Нарьгий ормасо недик рунгонзо.
Мон эсень койсэ теинь эйсэнзэ,
Секс ве пельксэзэ ялатеке монь.
Эрьга максыка ве пельксэнть монень!
Кодамояк пелькс тонеть а максан.
Аволь пелькстэ те ломанесь теезь,—
Кежей вайгельсэ пшкадсь Инепазось.
Окойники сон истя кортазевсь:
Эрзянть чачозо, паро тюсозо,
Сюпав оймезэ, валдо превензэ,
Виде рунгозо, лембе верезэ,
Ванны сельмензэ, моли пильгензэ
Монь пельде саезь, монь мельсэ теезь.
Тонь кадык улить ансяк орматне —
Стака зыянтнэ, нарьгий серетькстнэ.
Нетнень тон теить, нетнень тон максыть.
Ней таго азе тук Мастор лангсто,
Оргодть мода поте, эсеть таркантень.
Вана истя сынь явизь ломаненть,
Кавто лувнева тетькизь вейкиненть.
Вейке лувозо канды парочи,
Рашты валдо превть, седей вечкема.
Омбоце лувось сюпав зыянсо,
Рискссэ-мелявкссо, стака ормасо.
Весе парочись, седей вечкемась,
Эрямсто валдо превень раштамось
Инешкинть пельде сонензэ максозь.
Рискстнэ-мелявкстнэ, орма-тармотне
Апаронь раштынть кедьсэ казезельть.
Вана секс, зярдо ломанесь кулы,
Сонзэ оймезэ верев кепети,
Сэняжа кива кенярдозь ливти,
Инешкипазонь кудонтень сови.
Рунгозо туи начко модантень,
Чувтомозь мади кельме севонь поте.
Тосо емавтсы сон Пазонь тюсонть
Ды понги урекс Идемевсентень.
Зярдо теизе Пазось ломаненть,
Макссь сонензэ лем: Эрзя-эриця.
Мейле мерсь: «Тон ульть, Эрзя, эриця,
Масторонть лангсо васенце азор:
Кудонь теиця, сюронь видиця,
Тикшень ледиця, вирень кериця.
Эряк-аштек тон, таштак парочи.
Тевтнень эйсэ тейть свал эсеть койсэ,
Весементь лангс вант эсеть сельмесэ —
Яла ульть, Эрзя, тон эрзянь превсэ».
|
| Категория: Стихи | Добавил: tati (17.10.2009)
|
| Просмотров: 1569 | Комментарии: 1
| Рейтинг: 5.0/2 |
|
| Всего комментариев: 1 | |
|
1
Richard
(06.06.2012 01:01)
0
Sharp thikinng! Thanks for the answer.
|
|
|
|
|
|
